44 günlük müharibədə uğradığı ağır məğlubiyyət Ermənistan daxilində siyasi qüvvələr, hakimiyyət və xalq arasında qarşısıalınmaz qarşıdurmalar yaradıb.
Müxalif siyasi qüvvələrin hakimiyyəti, hakimiyyətin isə rəqiblərini qarşılıqlı olaraq ittiham etməsi, hətta Azərbaycan, türk casusu olaraq günahlandırması adi hal alıb. Gizlin deyil ki, məğlub Ermənistanda hazırda türkofobiya və Azərbaycanofobiya mühiti formalaşdırılıb.
Ermənistanda müharibə məğlubiyyətinin səbəbləri barədə siyasi qüvvələr arasında kəskin mövqe fərqlərinin və türkofobiyanın, Azərbaycanofobiyanın güclənməsinin səbəbi nədir?
Azər Həsrət: “Ermənistanın siyasi rəhbərliyi ölkədə rəzil duruma düşüb və bu durumdan çıxmaq, insanların fikrini başqa məsələlərə yönəltmək üçün isə məhz hədəf kimi türk düşmənçiliyini körükləndirməyi seçib”
Siyasi şərhçi Azər Həsrət hesab edir ki, Ermənistanın reallığı tam dərk etməməsi fikri səsləndirilsə də, bu ölkənin daxilində baş verənlər, yaşananlar Ermənistanın reallığı anladığını deməyə əsas verir. “Ermənistanda başa düşürlər ki, Azərbaycan qarşısında böyük hesabla uduzublar. Nəticədə bütün xülyaları, mifləri alt-üst olub, dağılıb. Əlbəttə, vəziyyətdən çıxmaq üçün hansısa əlavə yollar, üsullar tapmalıdırlar. Ona görə də türkofobiyanın, bütün türk millətinə qarşı düşmənçiliyin körükləndirilməsi Ermənistanın vəziyyətdən çıxış üsulu axtarmasından qaynaqlanır. Yəni xalqın başını nə iləsə qatmalıdırlar. Ermənistanın siyasi rəhbərliyi ölkədə rəzil duruma düşüb və bu durumdan çıxmaq, insanların fikrini başqa məsələlərə yönəltmək üçün isə məhz hədəf kimi türk düşmənçiliyini körükləndirməyi seçib. Yəni bunun başqa adı və səbəbi yoxdur”.
A.Həsrətin sözlərinə görə, çünki indiki şəraitdə həqiqətən də Ermənistan rəhbərliyinin öz xalqının başını qatmaqdan ötrü türkofobiya, Azərbaycanofobiyadan başqa bəhanəsi yoxdur. “Müharibədə uduzublar, Azərbaycanın qarşısında rəzil duruma düşüblər, biri var elə-belə uduzmaq, biri də var rəzil duruma düşmək. Eyni zamanda, dünya qarşısında rəzil duruma düşüblər. İllərdir təbliğat aparırdılar ki, Qarabağ “erməni torpağıdır, Azərbaycan təcavüzkardır”. Bu saxta təbliğatla da bu və digər şəkildə beynəlxalq təşkilatları Azərbaycana qarşı qaldırmağa nail ola bilirdilər. Lakin 44 günlük müharibədə onların bütün bu təbliğatı alt-üst oldu, xülyaları puç oldu. Xalq da ayağa qalxıb öz hakimiyyətindən məğlubiyyətə görə izah istəyir. Ermənistanın da öz məğlubiyyətinə izah verməsi mümkün deyil. Ona görə də türkofobiyanı, Azərbaycanofobiyanı körükləndirirlər ki, ermənilərin başını qatsınlar. Əslinə qalanda Azərbaycan dövləti də, Azərbaycan xalqı da, eləcə də Türkiyə xalqı da, Türkiyə dövləti də erməniləri düşmən gözündə görmürlər. Biz bilirik ki, insanlarımız qətlə yetirilib, kəndlərimiz, şəhərlərimiz dağıdılıb, əlbəttə, bunu edənlərin hamısı öz cinayətlərinə görə cavab verəcəklər, layiq olduqları cəzanı alacaqlar. Amma biz, bütövlükdə, dinc erməni xalqı ilə bundan sonrakı mərhələdə yanaşı, normal şəkildə yaşamağa hazırıq. Təəssüflər olsun ki, Ermənistan rəhbərliyi buna hazır deyil. Yəni biz düşmənçilik etmək istəmirik, amma Ermənistan düşmənçiliyi davam etdirmək istəyir və bunun üçün də bəhanələri türk düşmənçiliyidir, bunu körükləndirirlər” - deyə A.Həsrət vurğuladı.
İradə SARIYEVA
