Azərbaycanın azad edilmiş rayonlarla bağlı siyasəti beynəlxalq hədəfləri dəqiq vurur - Ağdam əgər erməni şəhəri idisə...

Şakir Ağayev: “Komissiya sədrinin “Twitter” hesabından dünyaya verdiyi mesaj da göstərir ki…”

img

Azad olunmuş rayon və kəndlərimizin ermənilər tərəfindən vandalcasına dağıdılması, Ağdamda, Füzulidə, başqa rayonlarımızda, yaşayış məntəqələrimizdə daşın daş üstdə qalmaması bütün dünyaya erməni vəhşiliyinin bir görküdür. Azərbaycanın azad edilmiş rayonlarına ən müxtəlif ölkələrdən rəsmi nümayəndələr, diplomatlar, media mənsubları səfərlər edir, bu acı mənzərəni gözləri ilə görürlər.  

İtaliya Senatının Xarici işlər və emiqrasiya daimi komissiyasının sədri Vito Petroçelli “Twiter” hesabında Ağdamdan şəkillər paylaşıb. “Trend”in məlumatına görə, paylaşımda deyilir: “Mən Ağdamın qalıqlarına səfər edirəm. Sual verirəm: əgər Ermənistan buranı öz ərazisi hesab edirdisə, niyə buranı darmadağın edib?”

Ermənistanin törətdiyi vandalizmə beynəlxalq aləm artıq öz yanaşmasını sərgiləməyə və qiymət verməyə  başlayıb. Azərbaycanın azad edilmiş rayonlarla bağlı yürütdüyü siyasət, gördüyü işlər artıq diqqəti çəkir və siyasətimiz beynəlxalq hədəfləri dəqiq vurur.

  • “Azərbaycan öz hədəfinə çatmaqdadır, bundan sonra digər ölkələrin dövlət rəsmiləri tərəfindən də bu reallıq düzgün qiymətləndiriləcək”

Əslən Ağdamdan olan və Ağdam dəhşətlərini gözləri ilə görüb yaşayan “Novoye vremya” qəzetinin baş redaktoru Şakir Ağayev hesab edir ki, Azərbaycanın azad edilmiş rayonlarla bağlı siyasəti beynəlxalq aləmdə öz təsirli rolunu oynayır və reaksiyalar yaradır. “Təbii ki, İtaliya Senatının Xarici işlər və emiqrasiya daimi komissiyasının sədrinin bu cür haqlı sualla beynəlxalq aləmə müraciət etməsi Azərbaycanın azad edilmiş ərazilərinin ermənilər tərəfindən dağıdılması faktının dünya ictimaiyyətinə çatdırılması baxımından əhəmiyyətlidir. Komissiya sədrinin bu açıqlaması ermənilər tərəfindən dağıdılaraq, viran edilərək daşı daş üstündə qoyulmayan Ağdamın ermənilər tərəfindən dağıdılması faktının dünya ictimaiyyətinə çatdırılmasından xəbər verir. Biz istərdik ki, nəinki İtaliya Senatı, bütövlükdə, dünyanın aparıcı dövlətləri, Fransa da, Almaniya da, İngiltərə də daxil olmaqla, Avropanın digər ölkələri bu reallığı düzgün qiymətləndirsinlər. Azərbaycan nə istəyir? Azərbaycan heç bir tarixi, heç bir faktı saxtalaşdırmır və eyni zamanda, xaricdən azad edilmiş rayonlara səfər edənlərə heç bir təbliğat aparmır, onlar hər şeyi öz gözləri ilə görürlər. Söhbət bölgəyə səfər edən yüksək vəzifəli şəxslərin, KİV nümayəndələrinin səfərlərindən gedir. Xaricdən gələn yüksək vəzifəli şəxsləri, o cümlədən də KİV-i azad edilmiş rayonlarımıza aparırıq və onlara, sadəcə, faktları göstəririk.   Kimliyindən asılı olmayaraq, hər bir vicdanlı insan bu faktlara düzgün qiymət verir. Fakt budur ki, Ermənistan Ağdamı viran qoyub. Təkcə Ağdamı yox, bütün işğal olunmuş əraziləri darmadağın edib. Biz 30 ildir bu sualı qoyurduq ki, erməni bu torpağın “sahibi” idisə və burada yaşamaq istəyirdisə, onda nə üçün bu torpaqları viran qoyub? 30 ilə yaxın torpaqlarımız ermənilərin əsarəti altında olub və bu müddətdə ermənilər bu torpaqdan istifadə edə bilərdilər, amma etməyiblər, onu dağıdıblar. Bu, vəhşilik, faşist təfəkkürünün göstəricisidir”.

Ş.Ağayevin sözlərinə görə, Ermənistanın yürütdüyü siyasət, ideologiyası faşizmə xidmət edib, bunu dəyişdirmək mümkün deyil. Müsahibimiz qeyd etdi ki, 30 illik işğal və işğaldan azad edilmiş torpaqlarımıza “miras” qalmış vandalizm aktları ermənilərin olduqları yeri viran qoymasıdır. “Təbii ki, Azərbaycan dövlətinin həyata keçirdiyi siyasətin əsas məqsədi beynəlxalq aləmin diqqətini erməni vandalizminə, faşist təfəkkürlü ermənilərin dağıtdığı ərazilərimizə cəlb etmək və baş verənlərin düzgün qiymətləndirilməsinə nail olmaq olub. Komissiya sədrinin “Twitter” hesabından dünyaya verdiyi mesaj da göstərir ki, Azərbaycan öz hədəfinə çatmaqdadır, bundan sonra digər ölkələrin dövlət rəsmiləri tərəfindən də bu reallıq düzgün qiymətləndiriləcək. Azərbaycan indi UNESCO-ya müraciət göndərib və qurumun nümayəndələrini bura dəvət edib. UNESCO nümayəndələri də gəlib baş verənlərə obyektiv tarixi qiymət verəcəklər. Yenə də deyirəm, Azərbaycan heç bir hadisəni saxtalaşdırmır və saxtalaşdırılmasını istəmir, sadəcə olaraq, beynəlxalq aləmin erməni vandalizminə, faşizminə düzgün qiymət verməsini istəyir. İstəyir ki, dünya reallığı olduğu kimi qiymətləndirsin” - deyə Ş.Ağayev qeyd etdi.

İradə SARIYEVA

Son xəbərlər