Lukaşenko Azərbaycandan öyrənilməli hansı təcrübələrə işarə etdi...

Vüqar Rəhimzadə: “Şübhəm yoxdur ki, “ASAN xidmət” modeli Belarusun da, birmənalı olaraq, maraq çərçivəsində olan bir məsələdir”

img

Belarus Prezidenti Aleksandr Lukaşenko Azərbaycan Prezidenti İlham Əliyevlə görüşdən sonra mətbuata açıqlamasında bildirib ki, vaxt gələcək, biz Azərbaycanın təcrübəsini öyrənəcəyik.

“Biz sabahdan etibarən Belarus əhalisinin kütləvi peyvəndlənməsini başlayacağıq. Vaksinlər özümüzünküdür, Rusiya Federasiyasının “Sputnik V” texnologiyası əsasında yaradılıb. Biz ölkədə yarım milyon doza vaksin istehsal edəcəyik. Bu qədər vaksini özümüz istifadə edə bilməyəcəyik. Bu vaksini Azərbaycanla bölüşməyə hazırıq.

Sənaye, kənd təsərrüfatı, ağac emalı, informasiya texnologiyaları, səhiyyə, turizm sahələrində kooperasiya əlaqələrinin inkişafı üçün böyük potensial var. Bizdə daha çox sayda gəncin təhsil alması üçün nə lazımdırsa edəcəyik. Vaxt gələcək, biz Azərbaycanın təcrübəsini öyrənəcəyik”.

Lukaşenko bununla Azərbaycandan öyrənilməli hansı təcrübələrə işarə etdi?

  • “Bu münasibət Azərbaycanın real həyatda dünya siyasətində artan roluna bir mövqe nümayişidir”

“İki Sahil” qəzetinin baş redaktoru Vüqar Rəhimzadə “Bakı-Xəbər”ə şərhində bildirdi ki, müasir dövrdə Azərbaycanın dünya siyasətində, iqtisadiyyatında, sosial həyatda rolu kifayət qədər böyükdür. Bu baxımdan, Azərbaycanda bütün istiqamətlərdə dünya üçün örnək olan və öyrənilməli kifayət qədər praktik cəhətdən özünü doğrultmuş model var ki, onların tətbiqində başqa ölkələr də maraqlıdır. “Azərbaycan davamlı şəkildə inkişaf etməkdədir və Azərbaycan yeni iqtisadi, sosial modellər ortaya qoyur. Ölkəmiz yerli, həm də beynəlxalq miqyaslı nəhəng layihələr reallaşdırır.

Belarus Prezidenti Aleksandr Lukaşenkonun da Azərbaycana səfəri strateji əməkdaşlıq baxımından çox əhəmiyyətlidir. Belarusla davamlı şəkildə əlaqələr qorunur, strateji xarakterli əməkdaşlıqlar formalaşır və inkişaf edir. Təbii ki, Lukaşenko son illər Azərbaycanın nail olduğu inkişafı, həyata keçirdiyi uğurlu sosial-iqtisadi layihələri görür. Məsələn, Azərbaycanda gerçəkləşdirilən dünyada analoqu olmayan layihə - “ASAN xidmət” modelinin formalaşmasıdır. Azərbaycanda əhaliyə xidmətin yaxşılaşdırılması ilə bağlı kifayət qədər uğurlu layihə var. Mən onlardan biri olan “ASAN xidmət”i qeyd edirəm. “ASAN xidmət” bir Azərbaycan brendi kimi dünyanın bir çox ölkəsini maraqlandırır, cəlb edir. Şübhəm yoxdur ki, “ASAN xidmət” modeli Belarusun da, birmənalı olaraq, maraq çərçivəsində olan bir məsələdir”.

V.Rəhimzadənin fikrincə, eyni zamanda, Azərbaycanın bütün dünyanı bürümüş koronavirus pandemiyası ilə bağlı qlobal mübarizənin önündə gedən ölkələrdən biri olması, bu istiqamətdə həyata keçirdiyi beynəlxalq layihələr, dəstək nümunələri ölkəmizi örnəyə çevirib. Ölkə başçısının rəhbərliyilə yürüdülən xarici və daxili siyasətin, həmçinin, regionun inkişafına da böyük töhfələr verdiyini deyən V.Rəhimzadənin sözlərinə görə, bunun da arxasında həyata keçirilən uğurlu layihələr, uğurlu siyasət dayanır. O qeyd etdi ki, Belarus Prezidenti bir çox layihəni, görülən işləri nümunə çəkə bilər, gözü ilə gördüyü inkişaf, iqtisadi-sosial layihələrlə bağlı öz fikirlərini, təkliflərini səsləndirib. “Lukaşenkonun bu fikri Azərbaycan reallığının obyektiv qiymətləndirilməsi baxımından çox əhəmiyyətlidir. Bu münasibət Azərbaycanın real həyatda dünya siyasətində artan roluna bir mövqe nümayişidir” - deyə V.Rəhimzadə qeyd etdi.

İradə SARIYEVA

Son xəbərlər