Prezidentin Hərbi Qənimətlər Parkında fotolarından narahat olan bəzi soydaşlar - ifrat müxaliflik, ya erməni təəssübkeşliyinə bərabər düşmənçilik...

Azər Həsrət: “Biz onların bir qismini tanıyırıq, bilirik ki, onların beyni çoxdan xarab olub, genlərində, qanlarında problem var, bu adamlar...”

img

Aprelin 12-də Bakıda Hərbi Qənimətlər Parkının açılması və orada düşmən qənimətlərinin, öldürülmüş hərbçilərinin dəbilqələrinin və mum manikenlərin nümayişi Ermənistanda qıcıq yaratmaqla yanaşı, bəzi “azərbaycanlıları da həyəcanlandıb”.

Xüsusən də Prezident İlham Əliyevin parkın açılışında iştirak edərkən burada şəkil çəkdirməsi bəzi “azərbaycanlıları” da qıcıqlandırıb. Onların qıcıqlanmasının səbəbi nədir - ifrat müxalifətçilik, yoxsa erməni təəssübkeşliyi?

Ekspertlər deyirlər ki, bu adamların ermənidən heç bir fərqi yoxdur, çünki onlar Azərbaycanın möhtəşəm zəfərini həzm edə bilməyən ermənibaşlılardır.

  • “Bunlar ruhunu şeytana satmış antimilli ünsürlərdir”

Siyasi şərhçi Azər Həsrət hesab edir ki, Hərbi Qənimətlər Parkının açılması 2020-ci ilin Qələbə paradı qədər möhtəşəm bir effekt yaradıb: “Ümumiyyətlə, Hərbi Qənimətlər Parkının açılması ötən ilin dekabr ayının 10-da Bakıda keçirilmiş hərbi parad qədər əhəmiyyətli və diqqətçəkən bir təbirdir. Necə ki, Zəfər paradında bütün dünyanın diqqəti Azərbaycanın üzərində idi, bütün azərbaycanlılar çox məğrur və qürurlu idilər, bütün dünya bizim qələbəmizin möhürünün vurulmasını seyr edirdi, dostlarımız sevinirdi, bizə qarşı olanlar isə kədərə boğulmuşdu. İndi də Hərbi Qənimətlər Parkının açılışı eyni qaydada eyni təsiri göstərdi. Necə ki, Ermənistan 10 dekabrda bizim möhtəşəm Zəfər paradını izləyərkən şok keçirmişdi, indi də Hərbi Qənimətlər Parkının açılışından sonra Ermənistan və onun dostları həm şok keçirdilər, həm də çox əzildilər. Yəni onlar həqiqətən də çox müti bir duruma düşdüklərinin fərqinə vardılar. Anladılar ki, Azərbaycanın qarşısında bütün dünya üzündə biabır olublar. Əlbəttə, biabır olduqlarını gizlətmək, malalamaq üçün müəyyən hərəkətlərə əl atırlar. Çox təəssüf ki, onların bu məkrli davranışlarına bizim azərbaycanlı olub, amma “azərbaycanlı” deyə bilməyəcəyimiz insanların da az bir qismi dəstək verib. Əlbəttə, biz onların bir qismini tanıyırıq, bilirik ki, onların beyni çoxdan xarab olub, genlərində, qanlarında problem var, bu adamlar həmişə anti-Azərbaycan qüvvələrlə bir yerdə olublar. Bir qismi isə millət, dövlət anlayışından uzaq olanlardır, onlar hər fürsətdən pul qazanmaq, özlərini reklam etmək üçün yararlanmağa çalışırlar. Belə adamlar Hərbi Qənimətlər Parkı və orada sərgilənən eksponatlarla bağlı gərəksiz və əsassız ifadələr yayaraq özlərini cəmiyyət içində təbliğ etməyə çalışırlar. “Uzaqgörən” və “uzaqgedən” məqsədləri ondan ibarətdir ki, bu yolla özlərini “humanist”, “bəşəri maraqlara qulluq edən” şəxslər kimi göstərsinlər, ardından da belə məsələlərdə maliyyə yardımını əsirgəməyən və bir çox halda da ermənilərə bağlı olan fondlardan pul alsınlar. Yəni bunlar ruhunu şeytana satmış antimilli ünsürlərdir. Azərbaycanın uğurlarına nəsə qoşmağa cəhd göstərirlər, bu dəfə də eyni işi gördülər. Lakin unudurlar ki, Azərbaycan xalqının böyük əksəriyyəti Ali Baş Komandan İlham Əliyev başda olmaqla bu qələbəni haqq etdiyi kimi yaşayır, tarixə yazır və heç bir qüvvə də bizi bu yolumuzdan çəkindirə bilməyəcək” - deyə A.Həsrət bildirdi.

İradə SARIYEVA

Son xəbərlər