Xəbər verildiyi kimi, dekabrın 10-da Azərbaycan Respublikası Hökuməti və Türkiyə Respublikası Hökuməti arasında qarşılıqlı olaraq vizadan azadetmə haqqında 2020-ci il 25 fevral tarixində Bakı şəhərində imzalanmış Sazişə dəyişikliklər edilməsi haqqında Azərbaycan Respublikası Hökuməti və Türkiyə Respublikası Hökuməti arasında 1 saylı Protokol imzalandı. Protokol hər iki ölkənin Xarici İşlər nazirləri tərəfindən imzalandı.
Məlum olduğu kimi, bu ilin 25 fevralında imzalanmış Sazişə əsasən, iki ölkənin ümumvətəndaş pasportlarına malik vətəndaşları vizasız səfər edə və ölkə ərazisində 90 gün vizasız qala bilərdi. Sazişə əlavə olaraq imzalanmış Protokol qüvvəyə mindikdən sonra iki ölkə vətəndaşları artıq şəxsiyyət vəsiqəsi və digər sərhədkeçmə sənədləri ilə vizasız səfər edə və 90 gün vizasız qala biləcəklər.
Xarici İşlər Nazirliyindən verilən məlumata görə, bu qayda yalnız Türkiyə ilə Azərbaycan arasında birbaşa səfər edən iki ölkə vətəndaşlarına münasibətdə tətbiq olunacaq. Türkiyə və Azərbaycan ərazisi vasitəsilə üçüncü ölkələrə səfər etmək istəyən vətəndaşlarımız pasportdan istifadə etməlidirlər. Azərbaycan öz tarixində ilk dəfə şəxsiyyət vəsiqəsinin sərhədkeçmə sənədi kimi istifadə olunması üçün müqavilə imzalayıb.
Tərəflər habelə saxta sərhədkeçmə sənədlərindən istifadənin qarşısının alınması məqsədilə əməkdaşlıq etməyə qərar veriblər. Bu isə iki ölkənin sərhəd təhlükəsizliyinin gücləndirilməsi sahəsində yeni imkanlar yaradacaq.
İki ölkə arasında yalnız şəxsiyyət vəsiqəs ilə gediş-gəlişin təmin edilməsini ekspertlər necə dəyərləndirirlər?
“...yeni işgüzar münasibətlərin qurulmasına səbəb olacaq”
Məsələyə münasibət bildirən Konstitusiya Araşdırmalar Fondunun rəhbəri, hüquqşünas Əliməmməd Nuriyevin fikrincə, bunun bir sıra üstünlükləri var: “Bu, iki qardaş ölkə arasında əlaqələrin daha da genişlənməsinə gətirib çıxaracaq. İnsani əlaqələr baxımından mühüm əhəmiyyət kəsb edir. Vətəndaşlarımızın Türkiyəyə gedərkən şəxsiyyət vəsiqələrindən istifadə etməsi, faktiki olaraq, həmin ölkənin vətəndaşı qədər səlahiyyətə, hüquqlara malik olmağa gətirib çıxaracaq. Bu addımla azərbaycanlı bütün Türkiyədə, türk vətəndaşı isə Azərbaycan ərazisində sərbəst hərəkət etmək hüququ əldə edəcək. Belə şəraitin yaradılması insanları əlavə xərclərdən də azad edəcək. Bununla istənilən vətəndaşımız daha rahat şəkildə qardaş ölkəyə səfər etmək imkanı əldə edir. Bu da, öz növbəsində, yeni işgüzar münasibətlərin qurulmasına səbəb olacaq. Bir millət, iki dövlətiksə, onda bu millətin nümayəndələri bir-birinə sərbəst gedib gəlməlidirlər. Necə deyərlər, Türkiyəyə səfər etmək elə bil ki, Azərbaycanın hansısa bir bölgəsinə getmək kimi bir iş olacaq. Türkiyə vətəndaşları da əksinə, Azərbaycana səfər edərkən elə bil ki, öz ölkələri daxilində səfərə çıxacaqlar. Azərbaycanlı Türkiyədə özünü bu ölkənin vətəndaşı kimi hiss edəcək. Eyni zamanda, türk də Azərbaycanda özünü ölkəmizin vətəndaşı kimi hiss edəcək. Bütün hallarda, həmin addım Azərbaycanla Türkiyənin öz aralarında daha dərin inteqrasiyaya getməsinin nümunəsidir. Hər şeydə vahid yanaşma olacaq”.
Hüquqşünas hesab edir ki, bunun sayəsində iki ölkə arasında əlaqələr daha da dərinləşəcək.
Vidadi ORDAHALLI
