Azərbaycan Prezidenti, Ali Baş Komandan İlham Əliyev Vətən müharibəsində Qələbəyə həsr olunmuş Zəfər paradında çıxışında deyib ki, biz bu qələbəni həm peşəkarlıq, qəhrəmanlıq hesabına, eyni zamanda milli ruh hesabına qazanmışıq: “Biz haqlı idik, haqq-ədalət bizim tərəfimizdə idi və bizim əsgər və zabitlərimiz hücuma keçəndə bir amalla yaşayırdı ki, öz doğma torpaqlarını işğalçılardan azad etsin”.
Prezident sözünə davam edərək deyib: “Noyabrın 10-da Ermənistan məcbur olub kapitulyasiya aktına imza atıb və bu kapitulyasiya aktına görə bir güllə atmadan Kəlbəcər, Laçın və Ağdam rayonları Azərbaycana qaytarıldı, Azərbaycan bayrağı orada qaldırıldı. Bu onu göstərir ki, biz müharibəni həm döyüş meydanında, həm siyasi müstəvidə qazanmışıq. Halbuki bir çoxları, xüsusilə bu məsələ ilə məşğul olan vasitəçilər dəfələrlə demişdilər ki, müharibənin hərbi həlli yoxdur. Amma biz sübut etdik ki, münaqişənin hərbi həlli var. Əks-təqdirdə, bu nə hərb, nə sülh vəziyyəti bundan sonra da 30 il davam edə bilərdi”.
Azərbaycan Prezidenti bildirib ki, dəfələrlə Azərbaycan xalqının səbrinin tükəndiyini vurğulayıb: “Bildirmişdim ki, əgər Ermənistan öz xoşu ilə işğal edilmiş torpaqlardan çıxmasa, biz onları oradan qovacağıq, onlar rədd olmalıdırlar bizim torpaqlarımızdan. Bunu mən müharibədən əvvəl və müharibə dövründə demişəm, xalqa müraciətlərdə demişəm, xarici mətbu orqanlarına verdiyim müsahibələrdə demişəm. Dedim ki, rədd olmalıdır Ermənistan bizim torpaqlarımızdan öz xoşu ilə, etiraf etməlidir və çıxmalıdır. Əks-təqdirdə sona qədər gedəcəyik və sona qədər getdik. Ona görə biz döyüş meydanında qələbə qazandıq. Ondan sonra siyasi müstəvidə qələbə qazandıq, düşməni məcbur etdik ki, o, Kəlbəcər, Laçın və Ağdam rayonlarını azad etsin və bizim torpaqlarımızı tərk etsin”.
Göründüyü kimi, Prezident bizim qələbə əldə etməyimizdə üç vacib komponentin adını bir-bir sadalayıb. Ölkə başçısının qeyd etdiyi şərtlərin qələbədə rolu barədə ekspertlər nə düşünür?
“Biz bu müharibə dönəmində bir dənə də olsun fərarilik halına rast gəlmədiksə, bunun özü xalqımızın necə yüksək ruhda olduğundan xəbər verir”
Hərbi-siyasi ekspert Ramil Məmmədli “Bakı-Xəbər”ə bildirdi ki, Prezidentin dediyi üç şərt bütün müharibələrdə qələbə qazanmaq üçün xarakterikdir: “Peşəkarlıq , ruh və qəhrəmanlıq olmadan heç bir ordu zəfər qazana bilməz. Azərbaycan ordusu 44 gün ərzində göstərdi ki, bütün bu komponentlərin vəhdətini özündə cəmləyə bilib. Bu illər ərzində Azərbaycan ordu quruculuğuna xüsusi diqqət yetirib, ordumuz ən yüksək texnologiyalara əsaslanan silah-sursatla təmin edilib, orduda yüksək peşəkarlığa, yüksək nizam-intizama, mobilliyə, yüksək mənəvi-psixoloji duruma nail olunub. Bununla yanaşı, Azərbaycanın müdafiə sənayesi xeyli inkişaf etdirilib, ordumuz üçün lazım olan silah-sursatın böyük qismi daxili istehsal hesabına təmin edilib ki, bu da müharibə şəraitində olan bir ölkə üçün olduca vacib əhəmiyyət kəsb edir. Bütün bu illər ərzində düşünülmüş fəaliyyət 44 günlük müharibə zamanı öz bəhrəsini verdi. Bütün Azərbaycan xalqı bir yumruq kimi Ali Baş Komandanın ətrafında sıx birləşdi və bütün diqqət cəbhəyə, torpaqlarımızın işğaldan azad edilməsinə yönəldi, 10 minlərlə vətəndaşımız könüllü olaraq döyüşlərə qatılmaq üçün sıraya durdu, kimin nəyə gücü çatırdısa orduya, dövlətimizə, Vətən müharibəsinə dəstək oldu. Bu da ruh yüksəkliyinin lazımi səviyyədə olduğunu şərtləndirdi. Qəhrəmanlıq isə dastanlar yazılacaq səviyyədədir. Hər gün sosial şəbəkələrdə, KİV-lərdə ordumuzun hansı qəhrəmanlıqlara imza atdığından danışılır. Canlı şahidlər başqalarının necə rəşadət göstərdiyindən fəxrlə bəhs edir. Dünyanın bir çox analitikləri, jurnalistləri ordumuzun Şuşanı heç bir texnikanın köməyi olmadan necə aldığımızdan danışır. Belə qəhrəmanlıqların adını 100-lərlə çəkmək olar. Bu baxımdan da Prezidentin qeyd etdiyi üç vacib şərti biz ordumuzun fəaliyyətində tam gördük. Biz bu müharibə dönəmində bir dənə də olsun fərarilik halına rast gəlmədiksə, bunun özü xalqımızın necə yüksək ruhda olduğundan xəbər verir”.
Ekspertin sözlərinə görə, bütün bu amillər bizim gələcək nəsillərimizin milli-mənəvi tərbiyəsində mühüm rol oynayacaq.
Məhəmmədəli QƏRİBLİ
