Ermənistanın baş naziri Nikol Paşinyanın Moskvaya səfəri baş tutmayıb. Ermənistan mətbuatında yayılan bu məlumatda rəsmi Moskvanın onunla görüşdən imtina etdiyi bildirilir. Halbuki, bu görüşlə bağlı bir neçə gündür rəsmi mətbu orqanlarda məlumat verilirdi: “Nikol Paşinyanın Moskvaya səfəri təxirə salınıb. Ona görə ki, onun Rusiyanın yüksək rəhbərliyilə görüşünə dair razılıq əldə edilməsi mümkün olmayıb. İkitərəfli Putin-Paşinyan görüşünün təşkili üçün bütün səylər uğursuzluqla nəticələnib. Baş nazirin protokol xidmətinin rəhbəri İrəvana geri çağırılıb”.
Göründüyü kimi, rəsmi Moskva Ermənistan rəhbərliyini və dövlətini sözün əsl mənasında alçaldaraq, ona layiq olduğu yeri göstərmiş olub. Əgər bu xəbər rəsmi təsdiqini taparsa, sözügedən hadisə Ermənistan siyasi tarixinin növbəti biabırçı səhifəsi olacaq. Moskvanın Paşinyanla belə məsafə saxlamasının kökündə hansı səbəblər durur və prosesin sonu nə ilə nəticələnə bilər?
“Paşinyanın Baydenə meyllənməyi, hətta onun yanına emissarlarını göndərməsindən belə, ola bilsin, Rusiya məlumatlıdır”
Politoloq Əhəd Məmmədli “Bakı-Xəbər”ə açıqlamasında bildirdi ki, bu vəziyyət Azərbaycanın tam xeyrinədir: “Bir daha məlum olur ki, Moskva ilə Ermənistan arasında ziddiyyətlər qalmaqdadır. Görünür, Putin duyub ki, Paşinyan yenə ikili oynayır. Moskva ilə immitasiya edib, əslində Qərbin maraqlarına qulluq edir. Paşinyanın Baydenə meyllənməyi, hətta onun yanına emissarlarını göndərməsindən belə, ola bilsin, Rusiya məlumatlıdır. Qarabağ yükündən qurtulandan sonra Paşinyanın Qərbə kurs götürəcəyi təxmin edilir. Ola bilsin ki, Moskva bununla bağlı aydın işartıları sezib. Paşinyanın Putin tərəfindən qəbul edilməməsinin bir səbəbi bununla bağlı ola bilər. Bu, Ermənistan üçün ciddi zərbədir. Azərbaycanın maraqlarına cavab verən bu situasiyadan biz istifadə edib, qısa müddətdə Qarabağda ermənilərin kompakt yaşadığı 4 rayonda da öz yurisdiksiyamızı təmin etməliyik. Rusiya Ermənistanla bağlı daha ciddi addımlar ata bilər. Amma görünür, hələ tələsmir. Ermənilər onsuz da Rusiyanı sevmirdi, bundan sonra daha da uzaqlaşmağa meylli olacaqlar. Rusiya istəyir ki, Ermənistanın başına öz adamını gətirsin. Hələlik rusiyayönümlü qüvvələrin mitinqləri Ermənistanda effekt vermir. Çünki anti-Paşinyan mitinqləri rəngarəngdir. Biz həmin sırada qərbyönümlü müxalifəti də görürük. Vəziyyət daha da gərginləşsə, Rusiya orada dövlət çevrilişi edə bilər. Hansısa generalı qaldırıb, hökuməti devirə bilər. Bu parktikadan Surət Hüseynovun timsalında Azərbaycanda istifadə edib. Daha yaxşı olar ki, Rusiya Ermənistanı tam ram etmək üçün Azərbaycana geniş imkanlar yaratsın. Keçmiş Dağlıq Qarabağla bağlı məsələdə Rusiyanın tutacağı obyektiv mövqe Azərbaycanın mövqeyini daha da gücləndirib Paşinyanı zəiflədə bilər. Onsuz da Paşinyanın vəziyyəti acınacaqlıdır. Onun hakimiyyətdən gedişi həm də fiziki məhvi anlamına gələ bilər. Bunu bildiyi üçün dirəniş göstərir. Həm də Qərb onu dirənməyə məcbur edir. Ancaq belə dirəniş çox uzun sürə bilməz. Çünki hərbi uğursuzluqla məsələ bitmir. Ermənistanda həm də iqtisadi vəziyyət acınacaqlıdır. Sosial problemləri də həll etmək Paşinyan komandasının gücü daxilində deyil. Məsələnin başqa tərəfi isə budur ki, Paşinyanı indiki məqamda əvəz edəcək siyasətçilər də ağır məsuliyyətin altına girəcəklərini bilirlər”.
Ekspertin sözlərinə görə, məhz bu səbəbdən də Ermənistandakı siyasilər hakimiyyətə gəlmək üçün lazımi dirənişi göztərmir.
Məhəmmədəli QƏRİBLİ
