Azərbaycana Türkiyə Silahlı Qüvvələrinin gəlişi başladı - hələlik minatəmizləyənlər...

img

Türkiyə Silahlı Qüvvələrinin minaların və əldə düzəldilmiş partlayıcı qurğuların zərərsizləşdirilməsi üzrə mütəxəssisləri işğaldan azad edilmiş ərazilərdə Azərbaycan ordusuna kömək göstərməyə başlayıb.

Azərbaycan Müdafiə Nazirliyinin mətbuat xidmətinin verdiyi məlumata əsasən, Türkiyənin hərbi mütəxəssisləri bu ərazilərin minalardan və partlayıcı qurğulardan təmizlənməsini həyata keçirəcək, o cümlədən də Azərbaycanın mühəndis bölmələri üçün tədris məşğələləri təşkil edəcəklər.

Qeyd edək ki, Türkiyə parlamenti ölkə prezidenti Rəcəb Tayyib Ərdoğanın Türkiyə hərbçilərinin Azərbaycan ərazisinə göndərilməsi qərarını dəstəkləyib. Razılaşmaya əsasən, Türkiyə və Rusiya hərbçiləri birgə monitorinq mərkəzi çərçivəsində Qarabağda sülhməramlı qüvvələrin fəaliyyətinə, o cümlədən də tərəflərin atəşkəsə əməl etməsinə nəzarət edəcək.

Hələlik Türkiyə hərbçilərinin Azərbaycana tam tərkibdə gələcəyi tarix bəlli deyil. Minatəmizləyənlərin gəlişini Türkiyə hərbçilərin bölgəyə gəlişi istiqamətində atılan ilk addım saymaq olarmı?

“Artıq deyə bilərik ki, Türkiyə Silahlı Qüvvələrinin sülməramlı missiya çərçivəsində Qarabağa gəlişinə start verilib”

Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bu olduqca önəmli hadisədir: “Türkiyə Silahlı Qüvvələrinin Azərbaycanda təmsilçilyi çox genişdir. Səfirliklərdə olan attaşelərlə müqayisədə Türkiyə daha geniş heyətlə fəaliyyət göstərir. Bu faktın özü bir daha  Türkiyə ilə Azərbaycan arasındakı hərbi-strateji əməkdaşlığın yüksək səviyyədə olmasından xəbər verir. Bunun məntiqi davam olaraq, biz 44 günlük müharibə dönəmində Türkiyənin geniş dəstəyini hiss etdik. Bu gün baş verənlərin hamısı həmin addımların məntiqi davamıdır. İmzalanan üçtərəfli bəyanatdan sonra prosesin diplomatik müstəvidə davamında da biz Türkiyənin dəstəyini hiss edirik. Artıq deyə bilərik ki, Türkiyə Silahlı Qüvvələrinin sülməramlı missiya çərçivəsində Qarabağa gəlişinə start verilib. Qardaş ölkənin mühəndis istehkamçı  bölmələrinə aid hərbçilərin artıq öz işlərinə başlaması bunun ən bariz göstəricisidir. Bu o anlama gəlir ki, Türkiyənin prosesdə hərbi təmsilçiliyinə  mane olan bütün amillər aradan qaldırılıb. Türkiyə Silahlı Qüvvələrinin gəlişi mərhələli şəkildə həyata keçirilir. Ordunun apardığı minatəmizləmə əməliyyatları həm hərbi, həm də humanitar əhəmiyyətlidir. Güman edirəm ki, dekabr ayı ərzində Türkiyə qoşunlarının bölgədəki sayı da artırılacaq. Türkiyə nüfuzlu, dünyada söz sahibi olan bir ölkədir. Əlbəttə ki, qardaş ölkənin Qarabağa gəlməsi, burada Rusiya ilə sülhə nəzarət etməsi müsbət haldır. Həmçinin, Türkiyənin Qarabağda olması ümumilikdə region üçün önəmli bir məsələdir. Bildiyimiz kimi, əvvəllər regionda təkcə Rusiyanın sözü keçirdisə, artıq Türkiyə də burada söz sahibi olacaq, regionun inkişafında müəyyən addımlar atacaq”.

Ekspertin sözlərinə görə, Türkiyə Azərbaycan üçün həm siyasi, həm də hərbi baxımdan çox önəmli bir ölkədir: “Türkiyənin Azərbaycanla yaxınlığı, rəsmi Ankaranın Dağlıq Qarabağla bağlı mövqeyi Rusiyanın bu münaqişəyə açıq şəkildə müdaxilə etməsinin qarşısını aldı. Bu dəstək müharibənin bitməsində, qalan ərazilərin sülh yolu ilə qaytarılmasında önəmli rol oynadı. Əlbəttə, işğalda olan ərazilərin çox hissəsi Ali Baş Komandan İlham Əliyevin nəzarəti altında Azərbaycan Ordusunun uğurlu əks-hücum əməliyyatı ilə azad edilib. Qardaş ölkə Türkiyə açıq şəkildə Azərbaycanın haqlı davasına dəstək oldu. Əlbəttə ki, bu dəstək bizim qələbə qazanmağımızda önəmli rol oynadı”.

Ekspertin sözlərinə görə, Türkiyənin sülhməramlı prosesdə təmsilçiliyi həm də ciddi balans yaratmış olacaq.

Məhəmmədəli QƏRİBLİ

Son xəbərlər