AXCP və Müsavat Fransa Senatının Qarabağ qərarına münasibətdə antimilli mövqe tutdu…

Elşad Musayev: “Ortada Azərbaycanın milli maraqları varsa, hamı mövqe ortaya qoymalıdır”

img

Fransa Senatının səs çoxluğu ilə hökuməti qondarma “Dağlıq Qarabağ Respublikası”nı tanımağa çağıran qərarına Azərbaycanın müxalifət partiyaları da sərt mövqe bildirib. Qeyd edək ki, bu məsələ hələ Senatda müzakirəyə çıxarılan zaman artıq bir sıra partiyalar, o cümlədən Azərbaycan Xalq Partiyası etiraz bəyanatı ilə çıxış etmişdi. Daha sonra isə ölkədə fəaliyyət göstərən 50-yə yaxın siyasi partiya birgə bəyanat yaydı. Müsavat və AXCP isə bu dəfə də birgə bəyanata imza atmaqdan kənarda qaldı.

Bəyanata imza atmayan bu iki partiyanın mövqeyini necə dəyərləndirmək olar?

Sözügedən bəyanata imza atan müxalif  Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, həmin bəyanata imza atmaq vacib şərtdir: “Siyasi oriyentasiyasından asılı olmayaraq, istənilən siyasi partiyanın imzası həmin bəyanatda olmalıdır. Çünki ortada Azərbaycanın milli maraqları var. Bu məsələdə Fransa həm beynəlxalq hüquqa hörmət etmir, həm də Azərbaycanın ərazi bütövlüyünü təhdid altına salır. Sözsüz ki, bu məsələdə hər hansı bir siyasi qüvvə kənarda qalmamalıdır. Bu iki partiyanın sözügedən sənədə imza atmamasını nə ilə əsaslandırdığını deyə bilmərəm. Adətən belə məsələlərin təşəbbüsü hakimiyyətdən gəlir. İndi mən bilmirəm, təşkilatçılar həmin iki partiya ilə əlaqə saxlayıblar, yoxsa yox.  Bəyanat atmasalar belə, həmin partiyaların bu məsələ ilə bağlı ayrıca bəyanatı olmalıdır. Ortada bu bəyanat da yoxdursa, onda ciddi şübhələr ortaya çıxa bilər”.

Partiya sədrinin sözlərinə görə, bu məsələdə müxalifçilik etmək olmaz: “Ortada Azərbaycanın milli maraqları varsa, hamı mövqe ortaya qoymalıdır. Azərbaycandakı müxalif siyasi partiyaların böyük əksəriyyəti Qarabağ probleminin hərbi yolla həllinə tərəfdar çıxmırdı. Onların yanında Qərbin əleyhinə danışmaq qeyri-mümkün idi.  Şamil Qurbanov adlı bir deputat demişdi ki, Jak Şirak qudurub, o yazığı elə müxalifət öz qəzetlərində tənqid edib, çərədib öldürdü. Bu iki partiya ilə bağlı texniki detalların dəqiqləşdirilməsinə ehtiyac var”.

Tural Abbaslı: “Müharibədən sonra nə olacağı ilə bağlı narahatlığım yoxdur”  | KONKRET

“İstənilən halda, heç bir partiya Fransa Senatının bu addımını təqdir edə bilməz”

Bəyanata imza atan digər müxalif təsisat olan Ağ Partiyanın sədri bəyanata qoşulmayan partiyalar haqqında mövqeyini belə ifadə etdi: “Sözün düzü, mən bu məsələnin texniki tərəflərindən məlumatsızam. Yəni mənə məlum deyil ki, onların da bu bəyanatda iştirak etmələri üçün təklif olunub, ya yox. Bildiyiniz kimi, təşəbbüskar kimi adətən YAP və yaxud hökumət çıxış edir. İndi təşəbbüskar təşkilatlar onlara da müraciət edibmi, bunu deyə bilmərəm. Əgər onlara da təklif olunubsa və adıçəkilən partiyalar imtina edibsə, bu başqa yanaşma, yox, təklif edilməyibsə və ona görə də həmin partiyaların imzası yoxdursa, bu da başqa yanaşma tələb edir. İstənilən halda, heç bir partiya Fransa Senatının bu addımını təqdir edə bilməz. Təqdir edən varsa, bunun bir adı var - Vətənə xəyanət…”.

Məhəmmədəli QƏRİBLİ

 

Son xəbərlər