Ermənistan 44 günlük müharibədə uduzduqdan, məğlub olduqdan sonra bu ölkədə mövcud olan siyasi-iqtisadi böhran daha da dərinləşməyə başlayıb. Erməni xalqı və bu ölkənin müxalifət partiyaları baş verənlərə görə baş nazir Nikol Paşinyanı ittiham edərək onun istefasını tələb edirlər.
Düşmən ölkədə günü-gündən daha da şiddətlənən siyasi didişmələr zamanı Prezident İlham Əliyevin müharibə dövründə Paşinyana verdiyi adlar, onun haqqında səsləndirdiyi fikirlər artıq bu ölkənin siyasi leksikonunda Paşinyana qarşı geniş istifadə edilməkdədir. Xüsusən də Prezident İlham Əliyevin Paşinyana verdiyi “dabanyalayan” adı tez-tez ona qarşı istifadə edilir. Bu gün “dabanyalayan” adı Ermənistanda siyasi mübarizə leksikonuna çevrilib. Paşinyanı bu adla çağıranlar sırasında Serj Sarkisyan tərəfdarları daha çox seçilir. Belə ki, Serj Sarkisyanın lideri olduğu Respublikaçılar Partiyasının mətbuat katibi Eduard Şarmazanov Paşinyanı belə ittiham edir: “Sən türkün dabanını yalamısan, indi də xahiş edirsən, Moskva onun dabanını yalamağa icazə versin”.
Prezident İlham Əliyevin lətifəyə çevrilən “nə oldu, Paşinyan” ifadəsi də ermənilərin siyasi ittiham mətnlərində istifadə olunur. Erməni hərbçi, “Krım komandiri” kimi tanınan separatçı Armen Marotyan “nə oldu, Paşinyan” ifadəsinə işarə vuraraq deyir: “Paşinyan Azərbaycanda yumor qəhrəmanına çevrilib”.
“Ermənistan müxalifəti İlham Əliyevin verdiyi adlardan ittiham vasitəsi kimi Paşinyana qarşı istifadə etməyə başladı”
Siyasi icmalçı Asif Nərimanlı bizimlə söhbətində qeyd etdi ki, Prezident İlham Əliyevin Paşinyan haqqında dediyi hər bir söz, ifadə, bənzətmə bu ölkənin siyasi leksikonunda geniş yer alıb. A.Nərimanlı vurğuladı ki, bunun fonunda İlham Əliyevin Ağdamda səsləndirdiyi “Paşinyan heç kimdir... Biz Koçaryan, Sarkisyan ordusunu məhv etmişik” bəyanatından sonra Paşinyan komandasının Koçaryan-Sarkisyan hakimiyyətinə qarşı “ordunu siz dağıtmışdınız” ittihamları sürətləndi. “Paşinyan bu ittihamlarla məğlubiyyətinə haqq qazandırır, lakin İlham Əliyevin müharibə dövründə Nikolu, müharibədən sonra Koçaryan-Sarkisyan cütlüyünü vurmaqla didişən erməni siyasi seqmentinə yön verdiyi diqqətdən qaçmır. Ermənistanda siyasi rəqiblər indi bir-birinə, xüsusən də Paşinyana İlham Əliyevin ifadələri ilə hücum edirlər” - deyə A.Nərimanlı qeyd edir.
A.Nərimanlı bildirdi ki, müharibədən əvvəl Prezident İlham Əliyev Paşinyanla onun hakimiyyətə gəldiyi ilk vaxtlarda apardığı danışıqların detallarını açıqladı və Paşinyan Azərbaycan Prezidentinə “siz hakimiyyətimi möhkəmləndirməyimə imkan verin, hakimiyyəti formaşdırım, danışıqlara gedəcəyəm” vədini xatırlatdı. “Lakin bildiyimiz kimi, Paşinyan vədini yerinə yetirmədi və nəticədə də müharibə Ermənistanın biabırçı məğlubiyyəti ilə başa çatdı. Azərbaycan Prezidentinin Paşinyanla danışıqların detallarını açıqlaması Ermənistandakı siyasi çəkişmələri daha da sürətləndirdi. Mənə elə gəlir ki, sanki bu açıqlama Ermənistan müxalifətinin Paşinyanı daha sərt şəkildə ittiham etməsinə əsaslı şərait yaratdı və Ermənistanda kəskin siyasi qarşıdurma yarandı. Bilirsiniz ki, Prezident İlham Əliyev müharibə dövründə hər çıxışında Paşinyana bir ad verdi, bu adlar erməni baş naziri gülüş qəhrəmanına çevirdi. Kapitulyasiyadan sonra isə Ermənistan müxalifəti İlham Əliyevin verdiyi adlardan ittiham vasitəsi kimi Paşinyana qarşı istifadə etməyə başladı. Ən maraqlı detal isə Prezident İlham Əliyevin Ağdamdakı çıxışında dediyi “Paşinyan kimdir ki, biz Sarkisyan-Koçaryan ordusunu məhv etmişik” fikirlərindən sonra Paşinyan komandası-hakim komanda bunu gündəmə gətirərək, bundan Koçaryana və Sarkisyana qarşı istifadə etməyə başladı. Hakim komanda iddia etdi ki, guya Ermənistanın müasir ordusu “nizam-intizamlı imiş”, amma ordu Koçaryandan və Sarkisyandan qalan hərbçilərə görə məğlub edilib. Faktiki, görünən budur ki, Azərbaycan Prezidentinin çıxışında Ermənistanla, Paşinyanla bağlı səsləndirdiyi hər bir söz elə-belə söz deyildi, bu, hesablanmışdı. Belə düşünürəm ki, Prezident İlham Əliyev bu fikirləri ilə Ermənistanın daxili siyasətini dizayn edib. Çünki onun çıxışlarından sonra Ermənistanın siyasi aləmində vəziyyət daha da kəskinləşdi və onlar bir-birini İlham Əliyevin səsləndirdiyi fikirlərlə, ifadələrlə qarşılıqlı olaraq ittiham edirlər. Bu ittihamlar zamanı onlar Azərbaycan Prezidentinin çıxışlarına əsaslanırlar” - deyə A.Nərimanlı qeyd etdi.
İradə SARIYEVA
