Fransa prezidenti Emmanuel Makronun Dağlıq Qarabağın Azərbaycan ərazisi olmasını etiraf etdiyi videogörüntü yayılıb.
Videogörüntünü Paris Azərbaycan Evinin rəhbəri, Fransada Azərbaycanın Dostları Assosiasiyasının baş katibi Mirvari Fətəliyeva özünün facebook sosial şəbəkəsindəki hesabında paylaşıb. O, Fransa prezidentinin çıxışından da sitat gətirib. Emmanuel Makron 7 rayonun Azərbaycana aid olduğunu qeyd edib. Beynəlxalq hüquqa əsasən bu ərazilərin Azərbaycana məxsus olduğunu deyən Makron bildirib ki, bu rayonlar Azərbaycan ərazisidir və suveren xahişlər yoxdursa, bu məsələyə qarışmamaq lazımdır: "Beynəlxalq hüquqa əsasən, Birləşmiş Millətlər Təşkilatı tərəfindən Dağlıq Qarabağ və digər rayonlar Azərbaycan ərazisi kimi tanınır. Buna görə də suveren dövlətdən istək yoxdursa, bu məsələyə qarışmayın". Qeyd edək ki, Fransa dövlət başçısının bu etirafı ilk olaraq onun "Instagram"dakı səhifəsində paylaşılıb.
Açıq ermənipərəst mövqeyi ilə tanınan Makronun bu qəfil səmimi etirafı nədən doğa bilər?
- “Fransa hökuməti baş verən proseslərə obyektiv yanaşmasa, yaxın gələcəkdə Qarabağ məsələsinin nizamlanmasında iştirak etmək hüququnu itirə bilər”
Politoloq Elşən Mustafayev “Bakı-Xəbər”ə açıqlamasında bildirdi ki, Emmanuel Makronun son dönəmlərdə səsləndirdiyi fikirlər ATƏT-in Minsk Qrupu həmsədrlərindən biri olan Fransanın tutmalı olduğu neytral mövqeyə ziddir: “Fransa Minsk Qrupunun həmsədr ölkəsi olaraq əvvəllər də Qarabağ məsələsində neytral mövqe sərgiləməyib, daim ermənipərəst siyasətin şahidi olmuşuq. İndiki həlledici məqamda isə bunu daha çox büruzə verməyə başladı. Bunu doğuran səbəblərdən biri Fransada olan erməni lobbisinin təsiridirsə, digəri bu ölkənin hazırda Azərbaycana dəstəyini əsirgəməyən Türkiyə ilə münasibətlərinin çox gərgin olmasıdır. Xüsusilə də Makronun hakimiyyətə gəlişindən sonra bu cür qərəzli mövqelər daha qabarıq şəkildə nümayiş etdirilir. Makronun son qərəzli mövqeyinə münasibət də birmənalı deyil. Azərbaycan, Türkiyə və bizimlə dost olan ölkələrdən Fransaya açıq etiraz edilir. Fransa yalnız Makrondan ibarət deyil. Məhz bu amilə görə onun özünə daxildən təzyiqlər var. Həmin qüvvələr bildirir ki, Fransanı ermənilərə görə dünyanın yarısı ilə düşmən etmək lazım deyil. Çünki bu ölkə sıradan bir dövlət deyil. BMT Təhlükəsizlik Şurasının üzvüdür, ATƏT Minsk Qrupunun həmsədr ölkələrindən biridir. Təbii ki, belə bir ölkənin və münaqişənin nizamlanmasında əsas rol oynayan dövlətin indiki həssas məqamda neytral mövqe sərgiləməməsi qəbulolunmazdır. Makron bunların fonunda bir qədər yumşalma siyasəti yürütməyə başlayıb. Gördü ki, onun hədələri keçərli deyil, Azərbaycan öz ərazilərini işğaldan azad etməkdə israrlı oldu və məqsədinə çatdı. Həm də bilirlər ki, Fransa hökuməti baş verən proseslərə obyektiv yanaşmasa, yaxın gələcəkdə Qarabağ məsələsinin nizamlanmasında iştirak etmək hüququnu tam itirə bilər. Bu səbəbdən də Makron həqiqəti dilə gətirməyə məcbur olub. Əslində bu, inkarı mümkün olmayan həqiqətdir. Dünyada elə bir ölkə və ya qurum yoxdur ki, 7 rayonun Azərbaycanın olması ilə bağlı tərəddüd etsin. Makron bunu da etiraf etməsəydi, özünü dünyanın gülüş hədəfinə çevirmiş olardı. Ancaq bu heç də o demək deyil ki, Makron Ermənistanı dəstəkləməkdən əl çəkib. Biz öz müdafiə addımlarımızı atmalıyıq. Xüsusilə də Fransa Senatının qəbul etməyə hazırlaşdığı saxta qanunla bağlı daha həssas olmalıyıq”.
Müsahibimizin sözlərinə görə, Fransa qərəzli şəkildə Ermənistanı dəstəkləməkdə davam edərsə, dünyadakı hörmətini sürətlə itirmiş olacaq.
Məhəmmədəli QƏRİBLİ
.jpg)
