“Ümummilli Lider Heydər Əliyevin əsasını qoyduğu və tərəfinizdən uğurla davam etdirilən uzaqgörən siyasət nəticəsində Azərbaycan uğurla inkişaf edir. Mükəmməl strategiyaya əsaslanan bu inkişafın istiqamətləri çoxsahəli olmaqla vahid bir amala xidmət edir.
Azərbaycanın iqtisadi, hərbi, sosial, beynəlxalq əməkdaşlıq, humanitar sahələrdə inkişafının memarı olmaqla bərabər xalqımızın yüksək etimadını qazanan Prezidentimizsiniz. İqtisadi, siyasi sabitliyin, xalq ilə dövlətin birliyinin və vətəndaş rifahının təmin olunması fəaliyyətinizin ana xətti və təcəssümüdür.
Azərbaycanın işğal olunmuş torpaqlarının azad olunması, ərazi bütövlüyünün bərqərar edilməsi ali məramınız və məqsədinizdir. Buna görə çox dəqiq strategiya əsasında hazırlıqlar olub, çoxsahəli uğurlu fəaliyyətlər həyata keçirilib.
Bu il sentyabrın 27-də işğalçı Ermənistan ordusunun növbəti dəfə hərbi əməliyyatlara başlamasından sonra müzəffər Ali Baş Komandan kimi əks-hücum əmrinizlə şanlı Azərbaycan Ordusu qısa zaman kəsiyində qəhrəmanlıq göstərərək işğal altında olan ərazilərimizin böyük hissəsini azad etdi.
Vətənimizin hər bir qarışı bizim üçün əziz və dəyərlidir. Azərbaycan xalqı hər gün səbrsizliklə Sizin xalqa müraciətlərinizi gözləyərək ordumuzun zəfərlərini böyük ruh yüksəkliyi ilə qeyd edirdi. “Şuşa Azərbaycanın və bütün Qafqazın incisidir” və "Əlbəttə ki, Şuşasız bizim işimiz yarımçıq olar” fikirləriniz xalq tərəfindən böyük rəğbətlə qarşılandı. Noyabrın 8-də müzəffər Azərbaycan Ordusu tərəfindən 28 il 6 ay düşmən işğalı altında olmuş Şuşanın azad olunması müjdəniz xalq tərəfindən çox böyük coşqu və atəşfəşanlıqla qarşılandı.
Noyabrın 10-da Böyük Qələbə sazişinin imzalanması ilə Azərbaycanın qalibiyyətini, işğalçı Ermənistanın isə məğlubiyyətini elan etdiniz. Sizin gərgin fəaliyyətiniz, şanlı Azərbaycan Ordusunun yenilməzliyi ilə 30 illik Vətən həsrətinə son qoyuldu.
Azərbaycanlı olması ilə həmişə fəxr edən Ümummilli Liderimiz Heydər Əliyevin, şəhidlərimizin ruhu şad oldu.
Möhtərəm Prezidentimiz, müzəffər Ali Baş Komandan!
Əlil Təşkilatları İttifaqı, üzv təşkilatlar və əlilliyi olan insanlarımız daim Sizin yanınızda olmaqla, apardığınız uğurlu daxili və xarici siyasəti dəstəkləyir və mümkün töhfəmizi verməyə çalışırıq.
Vətən müharibəsində möhtəşəm qələbə münasibətilə Sizi və şəxsinizdə bütün Azərbaycan xalqını təbrik edirik!
Sizə, ailənizə cansağlığı, Azərbaycanımızın daha da inkişafı yolunda yeni uğurlar arzulayırıq!
Yaşasın Azərbaycan! Yaşasın müzəffər Ali Baş Komandan! Yaşasın müzəffər Azərbaycan Ordusu!
Qarabağ Azərbaycandır!”
Bu fikirləri Prezident İlham Əliyevə müraciətində Bakının Yasamal rayonundan Əlil Təşkilatları İttifaqının prezidenti Davud Rəhimli, İttifaqın digər üzvləri - Azərbaycan Gözdən Əlillər Cəmiyyətinin sədri Səmyar Abdullayev, Əlillərin Beynəlxalq Əməkdaşlığı Cəmiyyəti İB-nin sədri Firuzə Babayeva, Hemofiliyalı Xəstələrin Respublika Assosiasiyasi İctimai Birliyinin sədri Gülnarə Hüseynova, Əlil Qadınlar Cəmiyyəti İctimai Birliyinin sədri Məhluqə Rəhimova və başqaları (cəmi 42 üzv təşkilat) yazıblar.
Baki-xeber.com
