24/11/2020 12:52
728 x 90

Dünya mediası ermənilərin Azərbaycan torpaqlarında törətdikləri vandalizmə xüsusi diqqət ayırır - məsələni önəmli edən motivlər...

Şakir Ağayev: “...onlar indi anlayırlar ki, niyə bu 28-30 ildə Ermənistan dünya KİV-ini bu torpaqlara buraxmayıb”

img

Uzun illər düşmən işğalı altında olan torpaqlarımızın  vəziyyəti böyük vandalizm cinayətlərinin təzahürüdür. Kəndlərimiz, şəhərlərimiz, yaşayış yerlərimiz dağıdılıb, elə rayonlarımız var ki, düşmən, ümumiyyətlə, daş üstə daş qoymayıb.  

Həmçinin, maddi mədəniyyət abidələrimiz xüsusi amasızlıqla, vandalcasına dağıdılıb. Ermənilərin işğal olunmuş ərazilərimizdə törətdikləri vandalizmə dünya mediasının böyük marağı var, dünya KİV-i erməni vəhşiliyini öz yazı və süjetlərində, reportajlarında beynəlxalq aləmə çatdırır.

Bildiyimiz kimi, noyabrın 18-də xarici jurnalistlər işğaldan azad olunmuş Füzuli şəhərinə səfər zamanı orada Ermənistanın törətdiyi müharibə cinayətlərinin ağır nəticələri ilə tanış olublar. "Əl-Cəzirə" kanalının müxbiri isə Füzuli şəhərindən süjet yayımlayıb.

Süjetdə bildirilir ki, demək olar, bütün Füzuli şəhəri dağıntılar içindədir. Azərbaycan hökuməti dəymiş ziyanı qiymətləndirmək üçün xarici ekspertləri dəvət edəcəyini və törətdiyi müharibə cinayətlərinə, vandalizm aktlarına görə Ermənistanı beynəlxalq məhkəməyə verəcəyini bildirib

Bu maraq nə ilə izah olunur?

  • “Dünya mediasının marağında idi ki, Ermənistanın  vandalizm cinayətləri törədib-törətmədiyini öz  gözləri ilə görsün”

“Novoye vremya” qəzetinin baş redaktoru Şakir Ağayev baki-xeber.com-a şərhində bildirdi ki, 28-30 il idi ki, Ermənistanın silahlı terrorçu birləşmələrinin işğalı altında olan Azərbaycan torpaqlarına düşmən ölkə heç bir media qurumunu, beynəlxalq təşkilatların təmsilçilərini buraxmırdı: “Ermənistan ərazilərimizi işğalda saxladığı uzun illər ərzində  xarici medianı, jurnalistləri ona görə həmin ərazilərə buraxmırdı ki, jurnalistlər onların törətdikləri vandalizmlər, vəhşiliklər, etdikləri hərbi cinayətlər beynəlxalq aləmə yayılmasın. Çünki Ermənistanın terrorçu silahlı birləşmələri tərəfindən Azərbaycan torpaqlarında bəşəriyyət, humanizm əleyhinə böyük cinayətlər törədilib. Ancaq indi həmin torpaqlar müzəffər ordumuz tərəfindən işğaldan azad olunub. 30 ilə yaxın işğalda olan torpaqlarımızın indi hansı vəziyyətdə olduğunu bütün dünya görür. Bilirsiniz, müharibə dövründə biz Ermənistanın işğalçı terrorçu birləşmələrinin torpaqlarımızda  böyük vandalizm aktları törətdiyini deyirdik, amma bəlkə də buna bəzi dünya mediası inanmırdı. Bu baxımdan ki, Ermənistan, xaricdəki erməni lobbisi onlara daim yalan məlumat verirdilər, iddia edirdilər ki, onlar heç bir vandalizm törətməyiblər və sair. Dünya mediasının marağında idi ki, Ermənistanın vandalizm cinayətləri törədib-törətmədiyini öz  gözləri ilə görsün. Dünya mediasının təmsilçiləri işğaldan azad edilən ərazilərimizə gəlib erməni vandalizmini, eyni zamanda da Azərbaycanın necə bir cinayətkar, terrorçu, faşist, vandal düşmənlə üzləşdiyini, qonşuluqda yaşadığını aydın şəkildə gördülər və gördüklərini yaydılar. Dünya mediası onu da gördü ki, heç bir dövlət indiyə kimi Ermənistan qədər işğal etdiyi əraziləri dağıdıb tarimar etməyib. Bu torpaqların çoxunda ermənilər yaşamayıb, onlar bizim torpaqlardakı bütün nə var, hamısını dağıdıblar və bizim orada yaşamağımız üçün bir dənə də olsun salamat yaşayış evi, binası qoymayıblar. Bu gün Ağdamın şəkilləri yayılıb, dəhşətə gəldim. Biz bilirdik ki, Ağdamı dağıdıblar, pis vəziyyətə salıblar. Şəkillərdən də açıq görsənir ki, düşmən Ağdamı ruhlar şəhərinə çevirib. Amerika o vaxt atom bombası atıb Xirosimanı hansı günə qoymuşdusa, indi Ağdam o cür xarabalığa çevrilib. Bir dənə məscidi saxlayıblar. Onu da qəsdən saxlayıblar ki, dünyaya göstərsinlər. Ağdamda bayraq sancmağa hətta yer olmadı. Hər yer dağıdılıb. Keçmiş SSRİ-də ən böyük muzeylərdən biri olan, Leninqrad blokadasına həsr olunan Ağdam Çörək Muzeyini də darmadağın ediblər. O muzeydən ancaq daşlar qalıb. Dünya mediası indi gəlib erməni vandalizmini, barbarlığını, terrorunu öz gözləri ilə görür, onlar indi anlayırlar ki, niyə bu 28-30 ildə Ermənistan dünya KİV-ini bu torpaqlara buraxmayıb” - deyə Ş.Ağayev vurğuladı.

İradə SARIYEVA

Son xəbərlər