Siyasi müstəvidə Ermənistanda rəqiblərini sıradan çıxarmaq üçün baş nazir Nikol Paşinyanın inzibati resurslardan daha çox istifadə etməsi ölkədə artıq böyük hiddət doğurur. Narazılıq yaradan məqamlardan biri də budur ki, Paşinyan ona qarşı genişmiqyaslı etiraz aksiyaları təşkil etmək istəyən rəqiblərinin bu niyyətinin üzərindən, fövqəladə vəziyyət rejimini əsas gətirərək, xətt çəkir. Yeri gəlmişkən qeyd edək ki, Ermənistan hökuməti koronavirus pandemiyası ilə əlaqədar martın 16-dan elan etdiyi fövqəladə vəziyyət rejimini dördüncü dəfə uzatmaq niyyətindədir. Nikol Paşinyan bunun səbəblərini belə izah edir:“Biz başa düşürük ki, ölkədə fövqəladə vəziyyət rejimini sonsuza qədər uzada bilmərik. Amma ölkədəki epidemioloji vəziyyəti də nəzərə almalıyıq. Balanslaşdırılmış qərar qəbul etməliyik. Vəziyyət onu göstərir ki, biz fövqəladə vəziyyət rejimini dördüncü dəfə və ən azı, daha bir ay uzatmalıyıq”.
Paşinyan bildirib ki, Ermənistan hakimiyyətinin üçüncü dəfə elan etdiyi fövqəladə vəziyyət rejimi iyulun 13-də başa çatır. Ölkədəki epidemioloji vəziyyət isə ağır olaraq qalır. Qeyd edək ki, hazırda Ermənistanda 30 minə yaxın koronavirus xəstəsi var. 500 nəfər isə pandemiyanın qurbanı olub. Pandemiyaya qarşı mübarizənin zəif təşkil edilməsi və bu durumda ölkənin daha çarəsiz duruma düşməsi Paşinyan iqtidarından narazılığı artırır. Bu durumda Paşinyana müxalif olanlar onu elə aksiyalar yolu ilə devirməyi düşünür. Bu baş verersə, Rusiyanın tanınmış siyasi eksperti Qriqori Trofimçukun fikrincə, Paşinyan iqtidarının sonu çatacaq:“Erməni ictimaiyyəti dağılıb, məxməri deyilən inqilab baş tutmadı. İnqilabın əvəzinə ölkədə sosial böhran və vətəndaş müharibəsinin əlamətləri müşahidə olunur. Nikol Paşinyan bu prosesi dayandırmaq iqtidarında deyil, çünki onun pozitiv inkişaf proqramı yoxdur. Ona görə də o, mütəmadi olaraq “günahkar” və siyasi hücümlar üçün obyekt axtarışındadır. Paşinyanın davamçıları, tərəfdaşları və deyərdim ki, fanatları onun kimi hərəkət edirlər. Öz aralarından başqa hər yerdə günahkar axtarırlar. Nümunə olaraq deyim ki, onlar tərəfindən mənim şəxsi ünvanıma da hücumlar güclənib”. Siyasi ekspert nəzərə çatdırıb ki, Ermənistan ictimaiyyətinin Paşinyana sualları get-gedə artmaqdadır: “Mən erməni mətbuatına yetərincə müsahibə verirəm, onların da Paşinyanın ünvanına get-gedə sualları çoxalır. Bütün bunlar isə Nikol Paşinyanın tərəfdarlarını daha da qıcıqlandırır. Mən həmişə cərəyan edən hadisənin obyektiv şəklini verirəm. Onu inkar etmək çətindir. Baş nazirin davamçılarının isə bunu etməyə arqumentləri yoxdur. Qeyd etmək istərdim ki, Paşinyanın fədakar tərəfdaşlarının sayı günü-gündən azalmaqdadır. Onlar başa düşür ki, yaxın zamanda erməni ictimaiyyəti onlara qarşı da ağır ittihamlar irəli sürəcək. Ona görə də onların hücumları hər gün daha da kəskin olur. Bu, alova oxşayır və bu mənim xoşuma gəlir. Çünki məhz bu formatda düzgün baxış ortaya çıxarır və möhkəmlənir”. Rusiyanın tanınmış siyasi eksperti qeyd edib ki, ermənilər onu hədələyir:“Paşinyanın fanatları məni birbaşa hədələyirlər. Mənim Ermənistan mətbuatına və Azərbaycan mətbuatına müsahibələrimdən sonra bu hücumlar daha da artır. Bu isə zəiflik əlamətidir. Qeyd edim ki, Azərbaycan mətbuatı erməni ictimaiyyəti tərəfindən diqqətlə izlənir, oxunur və mətbuatdan sitatlar gətirilir”. Ekspert Paşinyan tərəfdarlarına da müraciət edib: “Mənim mövqeyimi zəiflətmək və məhv etmək istəyirsinizsə, bunu açıq şəkildə etmək lazımdır. Bu hədəf üçün mən hətta birgə "dəyirmi masa"da çıxış etməyə razıyam. Budur əsl siyasət. Amma yuxarıda deyildiyi kimi, mənim mövqeyimə qarşı real arqumentlər yoxdur”.
Hazırda ağır sosial durum da sürətlə Paşinyanın əleyhinə işləyir. 2018-ci ildən indiyə qədər ölkədə işsizlik 20 faizə yaxınlaşıb. Bu rəsmi rəqəmlərdir, qeyri-rəsmi rəqəmlərə görə, əhalinin yarısı yoxsul vəziyyətdədir. Əhalinin 50 faizə qədəri ya evsizdir, ya da şərti mənzillərdə yaşayır. Hər ailənin orta gəliri 40 min dram, təxminən 85 dollardır. Asiya İnkişaf Bankı Ermənistandakı yoxsulluq səviyyəsini Əfqanıstan və bir sıra geridə qalmış ölkələrlə müqayisə edir. Beynəlxalq Valyuta Fondunun hesablamalarına əsasən, Ermənistanın ümumi dövlət borcunun həcminin artacağı proqnozlaşdırılır. Əhali sürətlə Ermənistanı tərk edir. Ermənistan Statistika Komitəsinin 2019-cu ildə açıqladığı rəqəmlərə görə, son 10 ildə ermənilərin sayı 3,8 faiz, işçi qüvvəsinin sayı 17,7 faiz, məşğul əhalinin sayı isə 21,3 faiz azalıb. Bu, 2008-2018-ci illərdə Ermənistan əhalisinin 118,1 min, işçi qüvvəsinin 250,1 min, məşğul əhalinin isə 252,3 min azalması deməkdir. Bununla yanaşı, ölüm göstəricisi doğum göstəricisini üstələyir. Cari ildə də rəqəmlər yalnız mənfi istiqamətdə olacaq. Koronavirus pandemiyası isə Ermənistan iqtisadiyyatını tamamilə alt-üst etdi və Nikol Paşinyan etiraf edir ki, yoluxma sayına görə ölkəsi dünyada ilk sıralardadır. Məhz bu vəziyyətdə Paşinyana qarşı fövqəladə vəziyyət rejimində belə aksiyaların başlaması qaçılmaz sayılır.
Nahid SALAYEV
