Aytən Qəmbərova: “Musiqi məktəbləri yalnız paytaxtda deyil, bölgələrdə də açılır”
Uşaqların mənəvi tərbiyəsində, bədii-estetik zövqünün formalaşmasında musiqinin xüsusi rolu var. Azərbaycanda uşaqların musiqiyə cəlb edilməsinə, musiqi təhsilinin inkişafına xüsusi diqqət yetirilir. Yeni uşaq musiqi məktəblərinin açılması, onların yeni bina ilə təmin edilməsi, eləcə də uşaq musiqi məktəblərinin binasının əsaslı şəkildə təmir edilməsi artıq ənənəyə çevrilib. Bu onu göstərir ki, dövlət uşaq musiqi məktəblərinin inkişafına, uşaqlarımızın təfəkkürünün, musiqi zövqünün formalaşmasına xüsusi diqqət yetirir.
İndiyə qədər saysız musiqi məktəbi inşa edilib. Bu musiqi məktəblərində Azərbaycan və dünya musiqisi tədris edilir. Son bir ildə Bakıda və respublikamızın bir neçə bölgəsində, o cümlədən də Naxçıvan Muxtar Respublikasında bir neçə uşaq musiqi məktəbinə yeni bina inşa edilib. Əlbəttə, bütün bunlar olduqca əhəmiyyətlidir. Ekspertlər hesab edirlər ki, Cənubi Qafqaz bölgəsində müşahidə aparsaq görərik ki, heç bir respublikada bu məsələyə Azərbaycandakı qədər diqqət yetirilmir.
Yalnız bu ilin dekabr ayında iki musiqi məktəbi binasının açılması burada onlarla uşağın professional musiqi təhsili almasına şərait yaradıb. Bu günlərdə 34 nömrəli Uşaq Musiqi Məktəbinin binasının əsaslı təmirdən sonra açılışı baş tutub. Açılışda çıxış edən mədəniyyət və turizm naziri Əbülfəs Qarayev musiqi məktəbi binasının əsaslı təmir və bərpadan sonra istifadəyə verilməsini mədəni ictimaiyyət üçün əlamətdar hadisə kimi dəyərləndirib. Paytaxtımızda və regionlarda mədəniyyət ocaqlarının yenidən qurulduğunu, yeni mədəniyyət müəssisələrinin inşa edildiyini diqqətə çatdıran Ə.Qarayev bu sahəyə göstərilən diqqət və qayğıya görə ölkə başçısına minnətdarlığını bildirib və mədəniyyətin inkişafının dövlət siyasətinin prioritet istiqamətlərindən olduğunu vurğulayıb.
Qeyd edək ki, 1985-ci ildən fəaliyyətə başlayan məktəb 7 otaqdan, 1987-ci ildən isə 16 sinif otağı, zal, qəbul otağı, direktor otağından ibarət olub. 2017-ci ildə məktəb binasında aparılan əsaslı təmir işlərindən sonra binada istilik sistemi çəkilib, akt zalı, otaqlar genişləndirilib, yeni otaqlar və zəruri musiqi ədəbiyyatı ilə təchiz olunmuş kitabxana yaradılıb. Məktəbin bütün avadanlığı və inventarı təzələnib. Məktəbdə ayrı-ayrı ixtisaslar üzrə ( fortepiano, skripka, klarnet, violonçel, fleyta, saksafon, qoboy, vokal, tar, kamança, balaban, qarmon, nağara, xanəndə, saz ) 300-ə yaxın şagird təhsil alır. 4 şöbə fəaliyyət göstərir (fortepiano, xalq çalğı alətləri, simli və nəfəs alətləri, nəzəriyyə) və 77 müəllim çalışır.
Xatırladaq ki, bu ilin dekabr ayının 6-da isə Bakıda Leopold və Mstislav Rostropoviçlər adına 21 nömrəli onbirillik musiqi məktəbinin yeni binasının açılış mərasimi olub. Qeyd edək ki, açılış mərasimində Azərbaycan Respublikasının Birinci vitse-prezidenti Mehriban Əliyeva da iştirak edib.
Bu musiqi məktəbi 1967-ci ildən fəaliyyət göstərib. 1997-ci ildə sabiq prezident Heydər Əliyevin sərəncamı ilə məktəbə Leopold və Mstislav Rostropoviçlərin adı verilib. 2014-cü ildə məktəbin köhnə binası sökülərək yerində yenisinin inşasına başlanıb.
Prezident İlham Əliyevin “Azərbaycan Respublikasında mədəniyyət sahəsinin inkişafına dövlət dəstəyinin gücləndirilməsi ilə bağlı əlavə tədbirlər haqqında” 14 avqust 2017-ci il tarixli Sərəncamına əsasən, musiqi məktəbinin tikintisinin və təchizatının tamamlanması üçün vəsait ayrıldı. Qısa vaxt ərzində görülən işlər nəticəsində məktəb şagirdlərini yenidən qəbul etməyə hazırdır.
Hazırda bu məktəbdə 600 şagird təhsil alır. Onlara 114 müəllim-professor, Bakı Musiqi Akademiyasının müəllimləri, əməkdar incəsənət xadimləri, xalq artistləri sənətin sirlərini öyrədirlər. Musiqi məktəbində 110 yerlik akt zalı, 34 sinif otağı, habelə 5 inzibati otaq, kitabxana və səsyazma studiyası var. Məktəbin bütün avadanlığı və inventarı təzələnib, o cümlədən təhsil müəssisəsinə 12 royal, 24 fortepiano alınıb. Burada 7 yaşından təhsillərinə başlayan şagirdlər fortepiano, simli və nəfəs alətləri və xalq çalğı alətləri şöbələrində musiqi biliklərinə yiyələnirlər. Son 10 il ərzində məktəbin 23 şagirdi Prezident təqaüdünə layiq görülüb. Həmçinin son iki ildə məktəbin 25 şagirdi beynəlxalq və respublika müsabiqələrinin qalibi olub. Onların əksəriyyəti nadir ixtisaslar – saksofon, fleyta və trambon üzrə qalib olanlardır. Bu gün musiqi məktəbinin məzunları simfonik, kamera orkestrlərində ifa edirlər.
Azərbaycanda uşaq musiqi məktəblərinə göstərilən qayğının əvəzsiz olduğunu qeyd edən musiqişünas Aytən Qəmbərovanın sözlərinə görə, musiqi məktəblərinin inkişafına bizim ölkədə böyük maraq göstərilir: “Musiqi məktəblərinin açılması, onların işıqlı, təmin olunan binalarda fəaliyyət göstərməsi mühüm hadisədir. Düşünürəm ki, heç bir qonşu respublikada uşaq musiqi məktəblərinin inkişafına bu qədər ciddi önəm verilmir. Azərbaycan dövləti uşaq və gənclər üçün fəaliyyət göstərən musiqi məktəblərinə böyük qayğı göstərməklə istedadlı musiqiçilərə, gələcəyin böyük sənətkarlarına dayaq olur. Musiqi məktəbləri yalnız paytaxtda açılmır, bölgələrdə də bu işə xüsusi əhəmiyyət verilir. Azərbaycanda professional musiqinin unkişafına hər cür şərait yaradılıb”.
Onun sözlərinə görə, vaxtilə musiqi məktəblərinin çoxu Sovet dövründən qalma köhnə, təmirsiz, şəraitsiz binalarda fəaliyyət göstərirdilər. O bildirdi ki, lakin dövlətimizin iqtisadi gücü artdıqdan sonra musiqi məktəbləri üçün yeni binalar tikilib və bu məktəblər bütün lazımi avadanlıqlarla təzhiz edilib: “Burada təhsil alan istedadlı uşaqlar Azərbaycan musiqisinin gələcəyidir. Dövlət istedadlı uşaqlara həmişə dəstək olur. Onu da vurğulayım ki, musiqi məktəbləri uşaq və yeniyetmələrin, gənclərin öz vaxtlarını faydalı keçirməsi, musiqi bilikləri qazanması üçün əlverişli bir məkandır. Musiqi məktəbləri nə qədər çoxdursa, bu o deməkdir ki, bu məktəblərə uşaqların kütləvi marağı var. Uşaqlar gedib haradasa vaxtını boş keçirmir, musiqi məktəblərində musiqi ilə məşğul olurlar. Bu da uşaqların mənəvi tərbiyəsində əvəzsiz rol oynayır”.
İradə SARIYEVA
