Gülüm Qiyasova: “Azərbaycan şou-biznesçilərinin dünyaya çıxmağına hələ çox var” “Zəif toy mahnıları ilə beynəlxalq aləmə çıxmaq, müsabiqə və festivallara qatılmaq olar?..”
Bu gün şou-beznes aləmində özünü müxtəlif yollarla reklam etdirən müğənnilər sənətdən başqa çox şeyə xidmət edir. Bu insanların başı “toy tutmağa”, ucuz reklamlara, asan yolla pul qazanmağa, hətta fəxri ad dartışmalarına elə qarşıb ki, sənətə, musiqiyə xidmət göstərməyi tamamilə unudublar.
Özlərini pop, estrada müğənnisi adlandıran şou-biznesçilər Azərbaycanı xarici ölkələrdə təbliğ etməyi düşünmürlər belə. Bir-iki müğənnini çıxmaq şərtilə demək olar ki, heç bir şou-biznesçi xaricdə keçirilən beynəlxalq pop-estrada müsabiqələrinə, festivallarına qatılmır. Ya buna maraq göstərmirlər, ya da onların repertuarı, biliyi, səviyyəsi dünya şou-biznesinin şərtlərinə adekvat deyil.
Qeyd edək ki, vaxtilə şou-biznes aləmində xalq artistləri Aygün Kazımova, Faiq Ağayev və Zülfiyyə Xanbabayeva beynəlxalq səciyyə daşıyan müsabiqə və festiovallara iştirak edib. Bu günlərdə isə əməkdar artist Röya Türkiyədə “Altun kələbək” mükafatına layiq görülüb. Halbuki, ölkədə şou-biznes əhlinin sayı ölçüyə gəlmir və onlar istəsə, beynəlxalq müsabiqələrə qatıla bilər.
Azərbaycan vokalçıları, cazmenlər, xanəndələr və aşıqlar bu yola şou-biznesçilərdən daha çox baş vuraraq Azərbaycanı beynəlxalq festival və müsabiqələrdə təmsil edir, mükafatla vətənə qayıdırlar. Şou-biznesçilərin beynəlxaq müsabiqə və festivallara qatılmamasının səbəbini şərh edən musiqiçi Gülüm Qiyasovanın sözlərinə görə, adından da göründüyü kimi, bu sahənin adamlarını yalnız şounun biznes tərəfi maraqlandırır:”Maraqlı məsələyə toxunmusunuz. Beynəlxalq müsabiqə və festivallara qatılmaq üçün müğənnidən istedad, savad, səhnə mədəniyyəti, güclü repertuar tələb olunur. Bu isə bizim şou-biznesçilərimizdə yoxdur. Onlar yalnız pul qazanmaq haqqında düşünür. İnsanın sənəti olmalıdır ki, özünü yüksək səviyyələrdə təqdim edə bilsin. Bu yoxdursa, ondan heç nə gözləmək olmaz. Bütün dünyada şou-biznes böyük gücə malikdir və bu aləmdə olanlar, şou göstərməklə yanaşı, həm də sənət təqdim edirlər. Siz mənə bizim şou-biznesdən bir müğənni göstərin ki, repertuarından hansısa bir mahnı, uzaq xarici demirəm, qonşu Gürcüstanda, Rusiyada, Türkiyədə hitə çevirilsin. Yoxdu belə bir müğənnimiz. Söhbət şou-biznesdən gedir. Onların mahnıları burada hansısa təşkilatların keçirdiyi sorğularda “hit”ə çevirilə bilir. Ancaq o mahnılar sərhədi aşa bilmirsə, hansı hitdən danışmaq olar? Azərbaycan şou-biznesçilərinin böyük əksəriyyətinin repertuarı zəif toy mahnılarından ibarətdir. Zəif toy mahnıları ilə beynəlxalq aləmə çıxmaq, müsabiqə və festivallara qatılmaq olar?”
Azərbaycan şou-biznesçilərinin öz üzərində işləmədiyini deyən musiqiçi hesab edir ki, onlar arasında istedadı olanlar da ucuz yol tutur. Onun qeyd etdiyinə görə, şou-biznesçilərin yalandan hay-küy salmalarına baxmayaraq, onları qonşu respublikalarda heç kəs tanımır:”Şou-biznesin inkişaf etdirilməsi lazımdır. Bilirsiz, bütün dünyada bu sahəyə önəm verilir. Çünki gəlirli sahədir. Dünyada şou-biznesçilər öz gəlirləri hesabına böyük işlər görür, dövlətə küllü məbləğdə vergi ödəyirlər. Bizimkilər isə gəlirlərini gizlədirlər. Azərbaycan şou-biznesçilərinin dünyaya çıxmağına hələ çox var. Gərək nəsil dəyişə, bu sahəyə peşəkar münasibət ola. Bəlkə onda onlar beynəlxalq festival və müsabiqələrə həvəs göstərələr. Onların indi başı toya, xınayaxdıya qarışıb”.
Aytəkin KƏRİMLİ
