Turanə Kazımlı: “Sən bilirsən ki, toya 50 manat salmağa maddi imkanı olmayan insanlar var. Onların qarşısında necə ağız dolusu toya yığılan puldan danışırsan?!”
Elə məsələlər var ki, vaxtını ona sərf etməyə heyfin gəlir. Ancaq yazmasan, deməsən və danışmasan da olmur. Şou-biznes və bu aləmin adamları bu qəbildəndir. Yəni onların sənətə, musiqiyə xidmət etməyən əməllərinə münasibət bildirmək istəmirsən, ancaq birdən elə hərəkətlərə yol verirlər ki, ona reaksiya vermək məcburiyyətində qalırsan.
Bu gün şou-biznesçilər yeni davranışlarla, açıqlamalarla gündəmə gəlirlər. Nədir bunlar? Son vaxtlar övladına toy edən müğənnilər televiziyaların maqazin proqramlarına çıxaraq etdikləri toyu reklam etdikləri bir yana, hansı müğənninin toya nə qədər pul yazdırdığını da açıqlayırlar. Bir sözlə, toy siyahısını ortaya çəxarıb reklam edirlər. Bir neçə gün əvvəl qızına toy edən xanım müğənnilərdən biri telekanallardan birində deyib ki, qızımın toyuna filan həmkarım 2000, filankəs 1000 manat salıb. Yaxud başqa birisi “mən onun toyuna bu qədər pul salmışam” kimi açıqlamalar verir. Bu kimi cılız fikirləri, məişət sözlərini efirə çıxarmaq, sosial şəbəkələrdə yaymaq, nəhayət, mövzuya çevirmək həqiqətən də qəbuledilməzdir. Toy elin gözəl adətlərindən biridir, toya pul yazılma hadisəsi də sırf ailənin özünə aid məsələdir. Bunu ictimailəşdirmək, hətta şouya çevirmək xoşagəlməz hal, mənfi örnəkdir.
Şou-biznes sahəsinə yaxın olanlar bildirirlər ki, bəzi şou müğənniləri kiçik və böyük toy edərək pul yığmaqla məşğuldurlar. Yəni elələri var ki, təmtəraqlı toy edir və məqsədi də pul yığmaq olur.
Prodüsser Turanə Kazımlı bizimlə söhbətində bildirdi ki, şou-beznes müğənnilərinin çoxunun bu hərəkəti insanları qıcıqlandırır: “Sənəti olmayan insanlar gündəmə gəlmək üçün əvvəllər bir-birini təhqir etməklə, qalmaqallarla gündəmə gəlirdilər, indi isə başqa ucuz yol tapıblar. Şou müğənnilərinin mövzusu həmişə bayağı şeylər olub. Əvvəllər boşanmalardan danışırdılar, indi də toylardan. Elə müğənni var ki, oğlunun 12-13 yaşı var, pul yığmaq üçün ona kiçik toy edir. Belə biabırçılıq olar? Şou müğənnilərinin övladlarının toyuna medianı yığması, üstəlik də məmurları dəvət etməsi adi hal alıb. Təbii, məmurlar da toya gəlmir, pul göndərməklə canlarını qurtarırlar. Həmkarları da can dərdi gəlirlər ki, söz-söhbət olmasın. İnandırım sizi, heç bir müğənni hansısa müğənninin övladının, yaxud özünün toyuna 1000, 2000 manat salmır. Bu, sadəcə, reklamdır”.
T.Kazımova qeyd etdi ki, bütün bunlar müğənnilərin həm pul yığmasına, həm də özlərini reklam etməsinə hesablanan məsələlərdir. O bildirdi ki, bu kimi ucuz məsələlərin gündəmə gətirilməsi bəzi aparıcıların “tryuku” da ola bilir: “Bəzən aparıcı verilişi öz aləmində baxımlı etmək üçün müğənni ilə sözləşir ki, toya yazılan pulun məbləğini açıqla, kimin nə qədər yazıldığını de, qoy bizə daha çox adam tamaşa etsin. Bu hal geniş yayılıb. Toy bir ailəyə aid məsələdir, ora yığılan pul da, gələn qonaqların gətirdiyi hədiyyə də ailəyə aiddir. Ancaq onu yaymaq pis bir haldır. Bu, insanların psixologiyasına pis təsir edir. Bəzən elə olur ki, bu kimi söhbətlər aylarla ailələrdə müzakirə edilir, hətta ər-arvad arasında qalmaqal da yaradır. Müğənnilər dövlətə vergi verəndə ağlayırlar ki, toya getmirik, pulumuz yoxdur, bəs toylara necə 1000 manat salırlar? Ümumiyyətlə, bu gün təəssüf ki, bəzi müğənnilərin həyat tərzi bir sıra ailələrdə örnəyə çevrilir. Bu kimi tendensiyalar bizə xeyir gətirmir. Müğənnilərin məişətini nümayiş etdirmək olmaz. Sən bilirsən ki, toya 50 manat salmağa maddi imkanı olmayan insanlar var. Onların qarşısında necə ağız dolusu toya yığılan puldan danışırsan?!”.
Aytəkin KƏRİMLİ
