Cəvahir Səlimqızı: “Bu onunla bağlıdır ki, son illər hitə çevrilən mahnı yoxdur” Tural Mürsəlov: “Mahnıların səviyyəsi aşağı olduğu üçün, tamaşaçılar o kliplərə baxmır”
Bir vaxtlar şou-biznes aləminin varlığının əsas göstəricilərindən birinə çevrilən klip çəkilişləri hədsiz dərəcədə geniş vüsət almışdı. Şou-biznes təmsilçiləri gündəmə qalmaqalla yanaşı, həm də çəkdirdikləri kliplərlə gəlirdilər. Klip çəkilişləri o qədər aktual idi ki, müğənnilər ardıcıl olaraq klip çəkdirir, yeni ifa etdikləri mahnıları bu formatda təqdim edirdilər. Klip çəkilişləri müğənnilərin büdcəsinə pul gətirmirdi, əksinə, cibindən pul aparırdı.
Bununla belə, onlar klip çəkdirməyə ciddi maraq göstərirdilər. Burada mənfi cəhətlərdən biri o idi ki, bu iş kütləvi xarakter almışdı və ifaçılıq qabiliyyəti, istedadı olan da, olmayan da klip çəkdirirdi. Kim gündəmə gəlmək istəyirdisə, ya qalmaqal salırdı, ya da klip çəkdirirdi. Başqa hansı yolla gündəmə gələ bilirdilər ki?
Son bir-iki ildir şou-biznes nümayəndələri klip çəkdirməyə üstünlük vermir. Demək olar ki, klip çəkilişləri sıradan çıxmaq üzrədir. Müğənnilər klip çəkdirməkdənsə, yeni ifalarını fotolarının fonunda “YouTube”da yerləşdirirlər. Bu gün şou əhli mahnılarının radiolarda, telekanallarda, internet resurslarında yayılmasında, səslənməsində daha maraqlıdır, nəinki klip çəkdirməkdə.
Şou-biznes mühitini yaxından izləyən rejissorlar bildirirlər ki, bu sahənin adamlarının klip çəkdirməyə marağının azalmasının kökündə bir deyil, bir neçə səbəb dayanır. Onların bildirdiyinə görə, bu əsasən müğənnilərin öz sponsorlarını itirməsi ilə bağlıdır. Son illər dünyada baş verən iqtisadi çətinlik müğənnilərin sponsorlarından da yan ötməyib. Klip çəkilişlərinə, müğənnilərin geyiminə, saç düzümünə və s. külli məbləğdə pul xərcləyən sponsorlar daha bu sahəyə pul xərcləmək istəmirlər.
Mədəniyyət sahəsi üzrə mütəxəssis Cəvahir Səlimqızı bizimlə söhbətində bildirdi ki, artıq klip çəkilişləri dəbdən düşüb, bu səbəbdən də müğənnilər klip çəkdirməyə maraq göstərmirlər: “Bilirsiniz, bu gün klip çəkilişlərinə marağın azalmasının bir səbəbi vizual sahənin bu növünün dəbdən düşməsidirsə, digər tərəfdən, başqa diqqətçəkən səbəb var. Bu onunla bağlıdır ki, son illər hitə çevrilən mahnı yoxdur. Hitə çevrilən mahnı olarsa, ona klip çəkmək olardı”.
Gənc rejissor Tural Mürsəlovun fikrincə isə klip çəkilişlərinin arxa plana keçməsi və sıradan çıxmaq üzrə olması birbaşa o kliplərə tamaşaçı marağının olmaması ilə bağlıdır. Şou müğənnilərinin çəkdirdiyi kliplərə tamaşaçıların maraq göstərməməsi bu sahənin iflic vəziyyətə düşməsinə səbəb olub: “Bir vaxtlar Azərbaycanda şou müğənniləri bir-birinin bəhsinə daha pullu sponsor tapıb klip çəkdirirdilər. Bu kliplər də bilirsiniz ki, baha başa gəlirdi. Sponsor bu kliplərə güclü pul xərcləsə də, klipin satışı sıfır vəziyyətdə idi. Nə satılırdı, nə də tamaşaçı qazanırdı. Bu halda, sponsor niyə havayı pul xərcləməlidir ki? Müğənni var idi ki, səsi yox idi, amma Gürcüstandan, Ukraynadan klipmeyker, rejissor dəvət edib klip çəkdirirdi. Bu da havayı başa gəlmirdi. Xaricdə müğənnilərin kliplərini televiziya şirkətləri, internet kanalları yüksək qonorar qarşılığında alıb tamaşaçıya təqdim edirdilər, bu qonorar o qədər yüksək olurdu ki, sponsor şirkət də pulunu ala bilirdi, müğənni də. Amma bizdə müğənni pul verib mahnı alırdı, pul verib klip çəkdirirdi, pul verib efirdə nümayiş etdirirdi. Müğənninin bu işdən bir qəpik də olsa gəliri olmurdu. Bu da təbii ki, problem yaradırdı. Mahnıların səviyyəsi aşağı olduğu üçün, tamaşaçılar o kliplərə baxmır. Amma internet belədir ki, məcburiyyət yoxdur, mahnı xoşuna gəlir, qulaq asırsan, xoşuna gəlmir, yox. Baxılmayan kliplər isə arxivlərdə yer alıb. Digər tərəfdən də müğənnilər sponsorlarını itiriblər. Dünyada mövcud iqtisadi problemlər onlardan da yan ötməyib. Bu səbəbdən artıq maliyyə xərcləyib klip çəkdirmək istəmirlər. Bu gün internet imkanları boldur və onlar mahnılarını yaymaqla məşğul olurlar. Bu halda, onların daha az xərci çıxır. Yəni klip çəkilişlərinin sıradan çıxması və bu sahəyə marağın azalması müğənnilərin tamaşaçılarını itirməsi və iqtisadi çətinliklə bağlıdır. Mən bu problemi belə görürəm”.
İradə SARIYEVA
