Dünyada sürətlə inkişaf edən velosiped turizmi həm ekoloji, həm də sosial və iqtisadi baxımdan yaratdığı üstünlüklərlə diqqət çəkir. Karbon emissiyalarının azaldılması, sağlam həyat tərzinin təşviqi, yerli icmalarla daha sıx əlaqələrin qurulması və regionların iqtisadi inkişafına töhfə verməsi bu turizm növünə marağı ildən-ilə artırır.
Son illərdə velosiped turizmi uzun məsafəli idman səfərlərindən daha çox fərdi təcrübələrə və destinasiya kəşfinə yönələn bir səyahət formatına çevrilib.
Bu istiqamətdə Türkiyə velosiped həvəskarları üçün ən cəlbedici ölkələrdən biri kimi ön plana çıxır. Təbiəti, tarixi irsi və yerli mədəniyyəti birləşdirən xüsusi hazırlanmış marşrutlar ölkənin müxtəlif bölgələrini fərqli rakursdan kəşf etməyə imkan yaradır. Türkiyə eyni zamanda Avropanın velosiped marşrutlarını birləşdirən EuroVelo şəbəkəsinin üzvüdür. Avropa qitəsini əhatə edən 17 uzunməsafəli marşrutdan ibarət sistemin EuroVelo 13 və EuroVelo 8 xətləri Türkiyənin Ədirnə, Kırklareli və İzmir şəhərlərindən keçir.
Müxtəlif hazırlıq səviyyələrinə və velosiped növlərinə uyğunlaşdırılmış marşrutlar Türkiyədə sadəcə mənzərəli yollar deyil, həm də zəngin təcrübələr vəd edir.
Səyahətçilər marşrut boyunca yerli sakinlərlə tanış ola, regional mətbəxin dadlarını kəşf edə, təbii gözəllikləri seyr edə və qədim sivilizasiyaların izlərini daşıyan arxeoloji məkanları ziyarət edə bilirlər.
Velosipedçilər üçün sertifikatlaşdırılmış xüsusi yerləşmə obyektləri isə səyahətin daha rahat keçməsinə şərait yaradır. Bu obyektlər velosiped saxlanması, texniki dəstək və digər xüsusi xidmətlərlə marşrut iştirakçılarına əlavə üstünlüklər təqdim edir.
Türkiyənin velosiped marşrutları beynəlxalq idman tədbirlərinə ev sahibliyi etməsi ilə də tanınır. Bu ay keçirilən Türkiyə Prezident Velosiped Turunun 61-ci buraxılışı ölkənin velosiped turizmi potensialını və zəngin marşrut şəbəkəsini bir daha nümayiş etdirdi.
Yarış İzmirin məşhur sahil kurortu Çeşmədən başlayaraq Türkiyənin fərqli coğrafiyalarından keçməklə Ankara istiqamətində davam edib. Marşrut iştirakçılara və velosiped həvəskarlarına ölkənin müxtəlif təbiət mənzərələrini yaxından tanımaq imkanı yaradıb.
Türkiyənin ən məşhur velosiped marşrutları ölkənin fərqli coğrafiyalarını, mədəni irsini və təbii gözəlliklərini kəşf etmək üçün unikal imkan yaradır. İzmirdən Ankaraya qədər uzanan bu marşrutlar səyahətsevərlərə həm idman, həm də macəra dolu təcrübə vəd edir.
Marşrutun ilk hissəsi İzmirin Çeşmə rayonundan başlayaraq Selçuka qədər davam edir. Yol boyu Alaçatı, Urla və Seferihisar kimi Egey bölgəsinin özünəməxsus atmosferə malik şəhər və qəsəbələrindən keçən velosipedçilər səyahətlərini UNESCO Dünya İrsi Siyahısına daxil edilmiş qədim Efes şəhərində yekunlaşdıra bilərlər. Bu xətt eyni zamanda EuroVelo 8 beynəlxalq velosiped marşrutunun bir hissəsini təşkil edir.
Növbəti mərhələ Aydın şəhərini Muğlanın məşhur sahil kurortu Marmarislə birləşdirir. Dəniz mənzərələri və meşələrlə əhatələnmiş dağ yolları ilə seçilən bu marşrut velosiped həvəskarlarına qısa müddətdə sahil xəttindən yüksəkliklərə qalxaraq tam fərqli təbiət mənzərələri ilə qarşılaşmaq imkanı yaradır.
Marmarisdən Fethiyəyə uzanan marşrut isə bölgənin ən təsirli təbiət və tarix mənzərələrini bir araya gətirir. Velosipedçilər yol boyunca gizli Egey kəndlərini, möhtəşəm Gökova körfəzini, qədim Kaunos şəhərini, “Cittaslow” statusuna malik Köyceğiz qəsəbəsini və Göcekin mənzərəli limanını kəşf edə bilərlər. Marşrutun son dayanacağı isə paraqlaydinq həvəskarlarının sevimli ünvanlarından biri olan Fethiyədir.
Dördüncü mərhələ Türkiyənin turizm mərkəzlərindən biri olan Antalya istiqamətində davam edir. İlin böyük hissəsini günəşli keçirən şəhərdə marşrut qədim Patara şəhərindən başlayır və Aralıq dənizi sahilləri boyunca uzanır. Yol üzərində dalış turizmi ilə məşhur Kaş, Müqəddəs Nikolay kilsəsi və qədim Mira şəhəri ilə tanınan Demrə kimi mühüm məkanlar yerləşir. Marşrut Tavr dağlarının ətəyində yerləşən Kəmərdə başa çatır.
Səyahətin son mərhələsi isə Türkiyənin paytaxtı Ankara ətrafında formalaşdırılıb. Marşrut əsasən şəhərin inzibati və tarixi məkanlarını, xüsusilə Respublika dövrünün memarlıq nümunələrini əhatə edir. Daha sakit və təbiətlə iç-içə velosiped turu axtaranlar isə marşrutlarını Eymir gölünə qədər uzadaraq şəhər həyatı ilə təbiətin harmoniyasını eyni anda yaşaya bilərlər.
SAMİRƏ
