“Hamınızı gələn ilin fevralında qonağımız olaraq buraya dəvət etmək istəyirəm. Çünki hesab edirəm ki, TAP-ın tikintisinin tamamlanması bizim komanda işimizin sonu demək deyil”.
Bunu Prezident İlham Əliyev Bakıda keçirilən “Cənub Qaz Dəhlizi” Məşvərət Şurası çərçivəsində nazirlərin VI toplantısında bildirib.
Dövlət başçısının sözlərinə görə, gələcək üçün strategiya hazırlanacaq: “Düşünürəm ki, gələn ilin fevral ayında burada - Bakıda bir çox məsələləri nəzərdən keçirmək lazımdır. Sonra da biz gələcək üçün strategiyamızı hazırlayacağıq. Keçən ilin fevral ayında biz 2018-ci ilin iyununda Türkiyə bazarına çatan TANAP-ın hissəsinin uğurla tamamlanması barədə məlumat verdik. Bu dəfə isə biz qürur hissilə artıq Türkiyə-Yunanıstan sərhədinə çatmış TANAP-ın tamamlandığını bildiririk. Bu, bizim meqalayihəmizin icrasında çox mühüm mərhələdir. Bu gün “Cənub Qaz Dəhlizi” layihəsinin tamamlanması vəziyyətinin çox yüksək olduğu və sizə də yaxşı məlum olduğu kimi, TAP layihəsinin təqribən 92 faiz tamamlandığı bir vaxtda ümid edirəm ki, bu ilin sonuna kimi biz “Cənub Qaz Dəhlizi” layihəsinin açılışını qeyd edəcəyik”
Görünən odur ki, dövlət başçısı bu fikirləri ilə Azərbaycanın hər layihənin uğurlu sonluqla başa çatmasının iştirakçısı olmaqla yanaşı, eyni zamanda, yeni layihələrin gündəmə gətirilməsində maraqlı olduğunu bir daha bəyan edir. Reallaşan hər bir layihə Azərbaycanın ölkələr, xalqlar arasında körpü roluna yeni əlavələr edir.
Maraqlıdır, bəs ekspertlər bunu necə dəyərləndirirlər? Gələcək üçün strategiya dedikdə burada söhbət nədən gedir?
“Bunun üçün isə, təbii ki, bir araya gəlib, bu perspektivləri götür-qoy edib, bir strategiya müəyyən etmək lazımdır”
Məsələyə münasibət bildirən iqtisad elmləri doktoru Fikrət Yusifovun sözlərinə görə, burada söhbət digər ölkələrin də CQD-yə qoşulmasından gedir: “Söhbət ondan gedir ki, digər qaz ixracatçısı olan ölkələrin CQD-yə qoşulması ilə bağlı gözləntilər var. Sözügedən kəmər vasitəsilə öz qaz resurslarını Avropa bazarına çıxaracaqlar. Bu, məsələnin bir tərəfi. Digər tərəfdən, Avropaya çatacaq qazın bölüşdürülmə məsələlərində iştirak məsələsi var. Yəni sonrakı mərhələdə lazım gələrsə, bu kəmərin daha da genişləndirilməsi və digər ölkələrin ərazisinə çatdırılması məsələsi var. Deməyim odur ki, sözügedən iş davamlı olacaq. Çox güman ki, Prezident çıxışında bunları nəzərdə tutub. Heç şübhəsiz, bunu nəzərdə tutaraq qeyd etdi ki, CQD-nin 4-cü seqmenti olan TAP kəməri artıq başa çatır və ilin sonuna qədər istismara veriləcək. Artıq TAP-la bağlı işlərin 92 faizi görülüb. Ancaq TAP-ın başa çatması o demək deyil ki, görülən işlər bitəcək. Digər layihələrlə də bağlı istəklər var və çox güman ki, onların reallaşması üçün işlər görüləcək. Bunun üçün isə, təbii ki, bir araya gəlib, bu perspektivləri götür-qoy edib, bir strategiya müəyyən etmək lazımdır. Hesab edirəm ki, 2021-ci ildə növbəti sözügedən strategiyanın əsası qoyulacaq”.
Vidadi ORDAHALLI
