09/07/2020 18:39
728 x 90

Azərbaycan - Türkiyə ticarətində yeni hədəf – preferensial ticarət nə deməkdir...

Ruslan Atakişiyev: “Bu o deməkdir ki, tərəflər ticarət əlaqələrini daha uyğun şərtlərlə həyata keçirəcəklər”

img

“2019-cu ildə ticarət dövriyyəmiz təxminən 4,5 milyard dollar oldu. Bu rəqəmi 2023-cü ildə, inşallah, 15 milyard dollara çatdıracağıq”. Bunu Türkiyə Prezidenti Rəcəb Tayyib Ərdoğan Azərbaycan-Türkiyə sənədlərinin imzalanması mərasimindən sonra Prezident İlham Əliyevlə mətbuata bəyanatlarla çıxışında deyib.

Onun sözlərinə görə, dəmir yolu ilə bağlı da infrastruktur işlərinə başlanacaq və təbii ki, qısa müddətdə tamamlanacaq: “Bu sahədə daha bir önəmli addım qardaşım İlham Əliyevlə TANAP-ın Avropaya birləşən hissəsinin açılışını etməyimiz oldu. 2019-cu ildə ticarət dövriyyəmiz təxminən 4,5 milyard dollar oldu. Bu rəqəmi 2023-cü ildə, inşallah, 15 milyard dollara çatdıracağıq. Hədəfimiz budur. Buna da nail olmalıyıq. Bu gün imzalanan preferensial ticarət sazişimiz bu sahədə bizim üçün böyük önəm kəsb edir. Gömrükdən kənd təsərrüfatına, enerjidən nəqliyyata, texnologiyadan turizmə qədər hər sahədə əməkdaşlığımızı dərinləşdirəcəyik. Bundan başqa, rəqəmsal dövlət xidmətləri sahəsində, sərmayə bazarında, maliyyə sektorunda da yeni əməkdaşlıq imkanlarını araşdıracağıq”.

Bütövlükdə, iki ölkə arasında ticarət dövriyyəsinin 15 milyard dollara çatdırılması nə dərəcədə mümkündür? Preferensial ticarət sazişi ticarət dövriyyəsinin artmasında hansı rol oynayacaq?

  • “İki ölkə arasında 2023-cü ilə qədər ticarət dövriyyəsini 15 milyard dollara çatdırmaq mümkün olacaq”

Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, preferensial  ticarət tərcihli ticarət deməkdir: “Bu o deməkdir ki, tərəflər ticarət əlaqələrini daha uyğun şərtlərlə həyata keçirəcəklər. Bu da ticarət əlaqələrinin genişlənməsinə öz töhfəsini verir. Türkiyə Azərbaycanla ticarət əlaqələrində idxal və ixrac üzrə üçlükdə yer alır. Hətta Azərbaycanla Türkiyə arasında olan ticarət dövriyyəsi digər türkdilli dövlətlərlə müqayisədə çoxdur. Bu da onu göstərir ki, iki ölkə arasında ticarət dövriyyəsi yaxın illərdə daha da artacaq. Bakı-Tiflis-Qars dəmir yolunun işə salınmasından sonra iki ölkə arasında olan ticarət əlaqələri genişlənir. Son illər əsasən qeyri-neft sektoru sahəsində əlaqələrin dərinləşdirilməsi qarşıya hədəf qoyulub. Hər iki ölkənin iş adamlarının bu işdə fəal iştirakı ticarət əlaqələrinin artmasına təsir edir. Nəzərə almaq lazımdır ki, Türkiyənin Orta Asiyanın türkdilli ölkələrlə ticarət əlaqələrinin genişlənməsində Azərbaycanın tranzit ölkə rolunda çıxış etməsi də buna öz müsbət təsirini göstərir. Türkiyənin bir sıra qurumlarının da bu işə təsiri var. Türkiyənin Xarici İqtisadi Əlaqələr qurumu iki ölkənin iş adamlarının birlikdə hərəkət etməsinə dəstək göstərir. Bununla belə, iki ölkə arasında qarşılıqlı investisiya qoyluşlarının həcmi artır. Bütün bunlardan çıxış edərək hesab edirəm ki, iki ölkə arasında 2023-cü ilə qədər ticarət dövriyyəsini 15 milyard dollara çatdırmaq mümkün olacaq”.

Vidadi ORDAHALLI

Son xəbərlər