25/02/2020 04:07
728 x 90

Mikayıl Cabbarov KOB Evinin açılışında iqtisadiyyatın inkişaf tendensiyalarından danışdı

img

Azərbaycanın dayanıqlı iqtisadi inkişafının təmin olunmasında sahibkarlığın rolu gündən-günə artır. Trendin məlumatına görə, bunu İqtisadiyyat naziri Mikayıl Cabbarov Xaçmazda KOB Evinin açılışı mərasimində deyib.

Nazir bildirib ki, həyata keçirilən iqtisadi islahatların prioritet istiqamətlərindən biri kiçik və orta biznesin iqtisadiyyatın aparıcı amilinə çevrilməsidir.

M.Cabbarov vurğulayıb ki, “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransı zamanı Prezident İlham Əliyev əsas hədəflər qismində sahibkarlığın inkişafı, ortamüddətli dövrdə ÜDM-in əsas hissəsinin iqtisadiyyatın bu sektoru hesabına formalaşmısını və bu sahədə məşğulluğun artmasını müəyyən edib.

Nazir əlavə edib ki, sahibkarlara dövlət dəstəyi tədbirlərinin davamı qismində Xaçmazda yaradılmış KOB Evi və Mərkəzi sahibkarlara keyfiyyətli və şəffaf xidmətlərin təqdim olunması baxımından rahat platformadır.

“Qarşımızda duran əsas vəzifələrdən biri ondan ibarətdir ki, iqtisadiyyatımızın strukturunu sürətlə dəyişdirək, onun neft və qaz sektorundan mümkün qədər az asılı olmasını təmin edək” – deyən nazirin sözlərinə görə, kiçik və orta sahibkarlığın inkişafı bir neçə baxımdan prioritetdir ki, onlardan da biri məşğulluqdur: “Ölkəmizdə yaradılan biznes mühiti, siyasi və makroiqtisadi sabitlik Azərbaycanın regiondakı xüsusi rolunu fərqləndirir. Bu baxımdan ölkəmizin hər bir vətəndaşının, sahibkarlığa meylli olan hər bir şəxsin öz potensialını reallaşdırması üçün şərait yaradılır. Bu gün yalnız iş yeri tapmaq deyil, eləcə də iş yeri yaratmağa çalışan hər bir vətəndaşımız üçün dövlət tərəfindən bir sıra alətlər, tədbirlər vasitəsilə müvafiq qanunvericiliyin tətbiqi yolu ilə dəstək verilir”.

İqtisadiyyatın strukturunun getdikcə dəyişdiyini nəzərə çatdıran nazir əlavə edib ki, Azərbaycan qısa müddət ərzində sürətli inkişaf yolu keçib.

Onun sözlərinə görə, əhalisi artaraq 10 milyona çatan Azərbaycanda əmək bazarına hər il 100 minə yaxın gənc daxil olur.

M.Cabbarov hesab edir ki, kiçik və orta sahibkarlığın rolu onların iqtisadi məşğulluğunun təmini baxımından həddindən artıq vacibdir: “Biz dövlət mülkiyyətində olan böyük şirkətlər ilə əməkdaşlığa da xüsusi diqqət yetiririk. Çünki sirr deyil ki, bir çox hallarda sahibkarların biznesə başlaması və ya fəaliyyətlərini genişləndirməsi müxtəlif xidmətlərin asanlaşdırılmasından asılıdır”.

Nazir əlavə edib ki, Azərbaycanda 2019-cu ildə 150 min iş yeri açılıb və on minlərlə sahibkar iqtisadi fəaliyyətə başlayıb.

Son xəbərlər