Azərbaycan Respublikasının Prezidenti İlham Əliyev fevralın 3-də “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransdakı yekun nitqində bildirib ki, Azərbaycanda kölgə iqtisadiyyatı olmamalıdır:
“Vəssalam, çox sadə. Düzdür, hər yerdə var, hər ölkədə var. Bizdə bu, dözülməz dərəcəyə gəlib çıxmışdır. O təhlil mənə veriləndə, sözün düzü, çox dəhşətə gəldim. Ona görə buna son qoyulur. Vergi və gömrük orqanları keçən il proqnozdan əlavə 1 milyard manatdan çox vəsaiti nəyin hesabına toplayıblar? Onun hesabına ki, bu pullar kiminsə cibinə gedirdi və bu pullardan Azərbaycan vətəndaşı məhrum idi. Biz bu şəffaflığı təmin edərkən, mən qeyd etdiyim sosial təşəbbüsü reallaşdıra bildik. O pul qəpiyinə qədər insanların maaşına, pensiyasına, təqaüdünə, müavinətinə getdi.
İndi biz kölgə iqtisadiyyatına göz yuma bilərikmi? Qətiyyən yox! Yenə də deyirəm, kölgə iqtisadiyyatına son qoyulmalıdır və dövlət orqanları bir keçid dövrü də müəyyən edib. Çünki bəri başdan çox sərt tədbirlər görmək düzgün olmaz. İnsanlar buna gərək yavaş-yavaş öyrəşsinlər. Amma biz bu güzəşt müddətini də çox uzada bilmərik. Ona görə bu il bütün iqtisadiyyat kölgədən çıxmalıdır, bütün sahibkarlar vergisini ödəməlidir. Əgər kimsə mənim bu sözlərimdən sonra yenə də köhnə qayda ilə işləmək, kiməsə arxalanmaq istəyəcəksə, bilsin ki, bu, alınmayacaq. Heç kimə güzəşt yoxdur. Bunu indi hamı bilir. Hər kəs bərabərdir. Heç bir toxunulmaz sahibkar da yoxdur, heç bir toxunulmaz məmur da yoxdur. Hər kəs qiymətini də, mükafatını da, cəzasını da öz əməlinə görə alacaq. Bunu bilməlisiniz”.
Göründüyü kimi, ölkə başçısı kölgə iqtisadiyyatı ilə ciddi mübarizənin aparıldığını qeyd edib. Bu bəla ilə ciddi mübarizə aparıldığını və bu il tam nəticənin əldə olunmasının qarşıya qoyulduğunu bəyan edib. Azərbaycanda aparılan bu işlər kölgə iqtisadiyyatından tam xilas olacağımıza dair bizdə əminlik yadara bilərmi?
Aydın Hüseynov: “Bu bəla ilə mübarizə həm də bizi bir vətəndaş olaraq zənginləşdirirsə, hamılıqla kölgə iqtisadiyyatı ilə mübarizəyə töhfə verməliyik”
Millət vəkili Aydın Hüseynov “Bakı-Xəbər”ə açıqlamasında bildirdi ki, Prezidentin dediyi kimi, kölgə iqtisadiyyatı hər yerdə var və onun tam aradan qaldırılması üçün müəyyən zaman lazımdır: “Hansısa neqativliyin tam yox edilməsi bir az çətindir. Kölgə iqtisadiyyatı cinayət növü sayılır və dünyanın hər bir yerində var. Dünyanın inkişaf etmiş ölkələrində cinayət varsa, deməli, bu növ cinayət də olacaq. Burada faiz dərəcəsindən söhbət gedə bilər. Cənab Prezidentin özü də deyir ki, ilk dəfə həmin hesabatla tanış olanda dəhşətə gəlib. Azərbaycanda kölgə iqtisadiyyatının mövcudluğu bir neçə amillə izah edilə bilər. İş adamlarının daha çox qazanmaq istəyi, yəni tamahkarlığı və bununla mübarizə aparmalı olan qurumların səhlənkar münasibəti, bəzən isə korporativ maraqlarını güdməsi ilə. Bununla mübarizə üçün ən ali səviyyədə siyasi iradə ortaya qoyulub və məsuliyyətlər müəyyənləşib. Ortadakı nəticəni Prezidentin öz dedi. Büdcəyə bir milyard manat daxil olub. Qısa müddət üçün bu gözəl göstəricidir. Mübarizə davam etdirilir və əminəm ki, toplanan məbləğ daha da artacaq. Yaxşı olar ki, həm səlahiyyətli şəxslər, həm də bəzi iş adamları bu mənzərədən özləri nəticə çıxarsınlar. Bilsinlər ki, artıq belə hallara heç kim göz yuman deyil. Əminəm ki, yaxın zamanlarda bizdə kölgə iqtisadiyyatı ilə bağlı göstərici əhəmiyyətli şəkildə azalacaq. Biz hamılıqla çalışmalıyıq ki, ölkəmizin büdcəsi artsın. Görürsünüz, ölkə başçısı deyir ki, daxil olan vəsaitlərin hamısı əməkhaqları və müavinətlərin ödənilməsinə yönəldilib. Deməli, bu bəla ilə mübarizə həm də bizi bir vətəndaş olaraq zənginləşdirirsə, hamılıqla kölgə iqtisadiyyatı ilə mübarizəyə töhfə verməliyik”.
Məhəmmədəli QƏRİBLİ
