“Keçən il sosial sahədə çox böyük təşəbbüslər irəli sürülmüşdür. Daha doğrusu, 2018-ci ilin ikinci yarısından artıq bu proqramlar hazırlanırdı və 2019-cu ilin əvvəlindən bu proqramların icrası başlanmışdır. Şəhid ailələrinə böyük məbləğdə vəsait təmin edilmişdir. Ümumiyyətlə, 4,2 milyon insanın sosial və maddi vəziyyəti yaxşılaşdırıldı. Çünki çox böyük sosial paket 4,2 milyon insanı əhatə edib. Minimum əməkhaqqı təxminən 2 dəfə, minimum pensiya 70 faizdən çox artmışdır”.
Bunu Prezident İlham Əliyev “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda çıxışı zamanı deyib. Ölkə başçısı bildirib ki, hazırda minimum pensiyanın alıcılıq qabiliyyətinə görə Azərbaycan MDB məkanında birinci yerdədir: “Bəzi müavinətlər 50 faiz, bəzi müavinətlər 2 dəfə artırılıb, tələbələrin təqaüdləri artırılıb, şəhid ailələrinə birdəfəlik maddi yardım göstərilib, bundan əlavə, şəhid ailələrinin və məcburi köçkünlərin aylıq müavinətləri artırılıb. Yəni bütün bunlar böyük vəsait tələb edən məsələlərdir və bir neçə milyard manata başa gəlir. Ancaq biz bunu edirik. İlk növbədə, ona görə ki, siyasətimizin mərkəzində Azərbaycan vətəndaşı dayanır. İkincisi, ona görə ki, buna imkanımız var. Əgər istəyimiz olsaydı, imkanımız olmasaydı, bunu necə etmək olardı? Bax, iqtisadi gücümüzü toplayaraq bugünkü reallığı təmin etdik ki, biz bunu edə bilirik. Deyə bilərəm ki, yaxın ətrafda bu cür sosial təşəbbüs göstərən ikinci ölkə yoxdur. Əgər varsa, qoy mənə desinlər, yoxdur. Biz bunu ona görə edirik və hesab edirik ki, bu, düzgündür. Azərbaycan xalqı ildən-ilə daha yaxşı yaşamalıdır”.
Həqiqətən regionda Azərbaycan qədər ikinci belə ölkə yoxdur ki, çoxşaxəli və genişmiqyaslı sosial təşəbbüslərlə çıxış etsin. Bütün bunlara böyük həcmdə vəsaitin ayrılması sözügedən sahəyə göstərilən xüsusi diqqətin göstəricisidir.
“Sosialyönümlü layihələrdə başlıca məqsəd həm də onunla bağlıdır ki, əhalinin gəlirləri xərclərindən daha çox olsun”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimovun sözlərinə görə, nəinki regionda, heç MDB məkanında Azərbaycan qədər bu cür geniş sosial təşəbbüslərlə çıxış edən ikinci ölkə yoxdur: “2019-cu il Azərbaycanın müstəqilliyi dövründə ən genişmiqyaslı sosial paketin qəbul olunduğu il kimi tarixə düşdü. Hətta 2015-ci ildən üzübəri banklarda mövcud olan problemli kredit məsələsinin həlli ilə bağlı qərar verildi. Nəticədə sözügedən məsələ öz həllini tapdı. MDB məkanında belə geniş miqyasda sosial siyasət həyata keçirilməyib. Elə bir ölkə yoxdur ki, Azərbaycan qədər sosial məsələlərə bu qədər önəm versin. Heç bir ölkədə bir il ərzində bu dərəcədə geniş və çoxşaxəli sosial layihələr həyata keçirilməyib. Bununla belə, məlum konfransda Prezident İlham Əliyev yenə də bu sahəyə xüsusi önəm veriləcəyini bildirdi. Müvafiq dövlət qurumlarına bununla bağlı tapşırıqlar verdi. Sosialyönümlü layihələrdə başlıca məqsəd həm də onunla bağlıdır ki, əhalinin gəlirləri xərclərindən daha çox olsun. Hesab edirəm ki, müvafiq orqanlar institusional səviyyədə bu məsələlərin həllinə yardım etsələr, qısa zaman ərzində Azərbaycan üzərinə düşən öhdəlikləri yerinə yetirəcək”.
Vidadi ORDAHALLI
