27/09/2020 00:33
728 x 90

Kiçik və orta biznes subyektləri üçün məhsullarını Azərbaycan marketlərinə çıxarmaq problemi kəskinləşir…

Natiq Cəfərli: “...əsas maneələrdən biri də inhisarçılıqdır”

img

“Azərbaycanda kiçik və orta biznesin iri market şəbəkələrinə çıxması ilə bağlı problemlər var”. Bu barədə bir neçə gün öncə qida sənayesinə həsr olunan toplantıda Kiçik və Orta Biznesin İnkişafı Agentliyinin (KOBİA) rəhbəri Orxan Məmmədov bildirib.

O.Məmmədov qeyd edib ki, bir sıra hallarda qida sənayesində çalışan iş adamlarının qida istehsalı və satışı ilə bağlı normativ prosedurlar və sanitar-gigiyena barədə məlumatsızlıqları problem yaradır və müdaxilə kimi başa düşülür: “Kiçik və orta sahibkarların bilik və bacarığının artırılması üçün inkişaf mərkəzləri yaradılır. İri market şəbəkələrinə girişdə problemlər var. Bəzi obyektiv və subyektiv səbəblər də var. Bunun qarşısını almaq üçün tənzimləmə mexanizmlərinə və dövlət dəstək mexanizminin tətbiqinə ehtiyac var və bununla bağlı təkliflər hazırlanıb. Həmçinin, dövlət dəstəyinin təşviqinə ehtiyac var. Təşkil mexanizmləri var və bu barədə də məlumatlandırma olmalıdır”.

  • ...kiçik və orta biznesin inkişafı üçün idarəetmədə addımlar atılmalıdır”

Kiçik və orta biznesin iri market şəbəkələrinə çıxışında nə kimi problemlərin yarandığını öyrənmək məqsədilə iqtisadçı-ekspert Natiq Cəfərliyə müraciət etdik. N.Cəfərli bildirdi ki, iqtisadi sahədə həyata keçirilən tədbirlərlə yanaşı, kiçik və orta biznesin (KOB)-ların inkişafı üçün idarəetmədə addımlar atılmalıdır: “İdarəetmədə bir dəyişiklik olmadığına görə iqtisadiyyatda verilən qərarların effektivliyi aşağı olur. Bu gün kiçik və orta sahibkarlığa ən böyük maneələrdən biri yerli icra strukturlarının müdaxilələridir. Bu, kiçik və orta sahibkarlığın inkişafında əsas institusional əngəllərdən biridir. Bu vəziyyətin aradan qaldırılması üçün əməli tədbirlər görülməli, ciddi cəzalandırma mexanizmləri tətbiq olunmalıdır”.

Ekspert dedi ki, Azərbaycanda kiçik və orta sahibkarlığın inkişafı qarşısında duran əsas maneələrdən biri də inhisarçılıqdır: “İnhisarçılıq bu gün, bütövlükdə, ölkə iqtisadiyyatının inkişafı qarşısında ən böyük maneələrdən biridir. Məmurlarla biznesin çulğalaşması Azərbaycanda kiçik və orta sahibkarlığın inkişafına mane olur. Müxtəlif sahələri nəzarətdə saxlayan oliqarxiya bazarlara kiçik və orta oyunçuların daxil olmasına imkan vermir. Azərbaycanda bununla bağlı nümunələr yüzlərlədir. Buna görə də məmurların biznesdən uzaqlaşdırılması lazımdır. Neçə ildir biz bunu səsləndiririk. Məmurlar biznesdən qopmasa, ayrılmasa, iqtisadiyyatın istənilən sahəsində inkişaf mümkün olmayacaq”.

Günel CƏLİLOVA

Son xəbərlər