24/09/2020 07:50
728 x 90

Davosda Əliyevlə görüşən məşhur şirkət Azərbaycanın indiki sığorta bazarında hansı problemləri həll edəcək...

Xəyal Məmmədxanlı: “Swiss Re”nin gəlməsi Azərbaycanın sığorta bazarına çox böyük müsbət təsir göstərər”

img

Məlum olduğu kimi, Prezident İlham Əliyev Davosda “Swiss Re” şirkətinin ictimaiyyətlə əlaqələr üzrə sədri Veronika Skotti ilə görüşüb.

Görüşə görə Prezident İlham Əliyevə təşəkkürünü bildirən “Swiss Re” şirkətinin ictimaiyyətlə əlaqələr üzrə sədri Veronika Skotti dövləti başçısı tərəfindən son illərdə aparılan islahatlar nəticəsində Azərbaycanda sığorta sahəsinin inkişafı və təkmilləşməsi üçün yaxşı imkanların yarandığını bildirib. O qeyd edib ki, “Swiss Re” şirkəti Prezident İlham Əliyevin həyata keçirdiyi islahatlarda iştirak etməyə, Azərbaycanda sığorta bazarının daha da inkişafına töhfə verməyə hazırdır.

“Swiss Re”nin əsasən fövqəladə hallarda yaranan sığorta hadisələri və onların təkrar sığortası üzrə dünyanın ixtisaslaşmış lider şirkətlərindən biri olduğunu deyən Veronika Skotti təmsil etdiyi qurumun müxtəlif ölkələrdə həyata keçirdiyi layihələr barədə məlumat verib.

Dövlət başçısı Azərbaycanda sığorta bazarının, xüsusilə daşınmaz əmlak sahəsində sığorta sisteminin səmərəli təşkilinin və inkişafının vacib olduğunu vurğulayıb. Görüşdə bu sahədə beynəlxalq təcrübənin Azərbaycanda tətbiqini sürətləndirəcək xarici investorlarla, o cümlədən, “Swiss Re” şirkəti ilə əməkdaşlıq barədə fikir mübadiləsi aparılıb.

O da məlumdur ki, Azərbaycanın sığorta bazarı o qədər də inkişaf etməyib. Sığorta ilə bağlı bir sıra problemlər var, bu sahənin inkişafı yönündə görüləsi, öyrəniləsi işlər var. Bu baxımdan dünyada məşhur “Swiss Re” sığorta şirkəti ilə əlaqələrin qurulması Azərbaycanda bu sahənin inkişafına nə kimi faydası ola bilər?

  • “Onların burada nümayəndəliyi açılsa, bu, ölkə sığortaçılarının bilavasitə Avropa bazarına həm girişini rahatlaşdırar, həm də...”

Məsələyə münasibət bildirən sığorta sahəsi üzrə ekspert Xəyal Məmmədxanlının sözlərinə görə, “Swiss Re” kimi şirkətin Azərbaycana gəlməsi, əlaqələr qurması ölkənin sığorta bazarının inkişafına ciddi müsbət təsir göstərə bilər: “Ümumilikdə, “Swiss Re” ilə yanaşı, Avropada aparıcı böyük sığorta şirkətlərinin Azərbaycana gəlməsi çox gözəl olardı. Ona görə ki, başda “Swiss Re” şirkəti olmaqla digər sığorta şirkətlərinin çox böyük təcrübələri var. Xüsusən də innovasiyalar, yeni sığorta məhsulları, yeni sığorta yanaşmaları sahəsində çox ciddi təcrübələri var. Düzdür, Azərbaycan sığorta şirkətləri onların bir çoxu ilə əməkdaşlıq edir. “Swiss Re” şirkətinin təkrar sığorta ilə bağlı təcrübəsi böyükdür. Azərbaycan şirkətlərinin əksəriyyəti qəbul etdikləri böyük risqləri Avropanın, Böyük Britaniyanın və yaxud da digər ölkələrin sığorta şirkətləri ilə bölüşdürürlər. Yəni təkrar sığorta yolu ilə risqlər bölüşdürülür. Bu nöqteyi-nəzərdən, əslində, “Swiss Re” ilə Azərbaycanın sığorta bazarının əlaqələri neçə ildir var. Bu əlaqələr sırf beynəlxalq sığorta münasibətləri çərçivəsindədir. Ancaq “Swiss Re” Azərbaycana gəlsə və onların burada nümayəndəliyi açılsa, bu, ölkə sığortaçılarının bilavasitə Avropa bazarına həm girişini rahatlaşdırar, həm də sığorta risqlərinin daha etibarlı və təminatlı qorunmasına şərait yaradacaq. “Swiss Re”nin gəlməsi Azərbaycanın sığorta bazarına çox böyük müsbət təsir göstərər. Xüsusən də təkrar sığorta bazarına”.

Vidadi ORDAHALLI

Son xəbərlər