Əkrəm Həsənov: “Bank əmanəti maksimum 5 iş günü müddətində tam qaytarmalıdır”
Artıq bir neçə aydır vətəndaşlar, sahibkarlar və şirkətlər “AtaBank”dan pullarını çıxara bilmirlər. Bəzilərinə isə vaxtaşırı cüzi məbləğ qaytarılır.
Ötən ilin oktyabr ayının 1-nə olan son məlumata görə, aktivləri 532 milyon manat, depozitləri 286.3 milyon manat, kredit portfeli 374.7 milyon manat olan “AtaBank” ASC əmanətçiləri qarşısında öhdəliklərini yerinə yetirə bilmir. Belə ki, 2019-cu ilin sentyabr ayından etibarən əmanətlərini geri çəkmək istəyənlər bu istəklərini reallaşdıra bilmirlər. Bir sözlə, “AtaBank” ASC əmanətlərini geri götürmək niyyətində olanların pullarını ödəyə bilmir.
Bununla əlaqədar olaraq bir qrup əmanətçi əvvəllər Maliyyə Bazarlarına Nəzarət Palatasına, bu ildən isə Mərkəzi Banka şikayət etsə də, yenə də müsbət nəticə əldə edə bilmir. Əksinə, nə baş verdiyi barədə heç bir rəsmi açıqlama verilməməsi əmanətçilərin şübhələrini daha da çoxaldır.
Yaranmış vəziyyətdə əmanətçilər vəsaitlərinin batmasından narahatdırlar.
“AtaBank” ASC-də baş verənlərlə bağlı məlumat yayan Mərkəzi Bank bildirir ki, ölkə Prezidentinin fərmanı ilə Azərbaycan Mərkəzi Bankı (AMB) vahid maliyyə nəzarəti və tənzimləmə qurumuna çevrildikdən sonra "AtaBank" ASC-də ilkin araşdırmalar aparılıb: “Araşdırmalar nəticəsində “AtaBank”ın ciddi maliyyə dayanıqlığı və likvidlik problemləri ilə üzləşdiyi məlum olub. Bununla belə, bütün banklarda olduğu kimi, "AtaBank"da da əhalinin qorunan əmanətləri tam sığortalanıb. Hazırda AMB Bankda yaranmış vəziyyətlə bağlı kompleks təhlillər aparır və onların nəticəsi əsasında müvafiq təkliflər hazırlanacaq. 2019-cu il oktyabrın 1-nə "AtaBank"ın öhdəlikləri 389,438 milyon manat (illik müqayisədə 12,4% az), o cümlədən, depozit portfeli 286,268 milyon manat (6,2% az), balans kapitalı isə 142,636 milyon manat (1,3% az) təşkil edib. Bununla belə, bank ötən ilin yanvar-sentyabr aylarını 22 min manat xalis mənfəətlə (74,4% az) başa vurub”.
- “Əmanətlərin qaytarılmamasına görə həm vətəndaşlar, həm fərdi sahibkarlar, həm də hüquqi şəxslər, təbii ki, artıq məhkəməyə də müraciət edə bilər”
Bank sahəsi üzrə mütəxəssis Əkrəm Həsənov bildirdi ki, Mülki Məcəllənin 947.2-ci maddəsinə əsasən, bank əmanəti maksimum 5 iş günü müddətində tam qaytarmalıdır: “Həmin məcəllənin 959.2-ci maddəsinə görə isə hər hansı müştərinin, o cümlədən, hüquqi şəxsin sərəncamı ilə onun cari hesabındakı vəsait, bir qayda olaraq, 1 gün ərzində verilməli və ya tələb edilən digər hesaba köçürülməlidir. Yəni “AtaBank” bu müddətləri çoxdan ötürüb, özü də kütləvi olaraq".
Ə.Həsənovun sözlərinə görə, əmanətlərin qaytarılmamasında 2 səbəb ola bilər: “Həm vətəndaşlar, həm fərdi sahibkarlar, həm də hüquqi şəxslər, təbii ki, artıq məhkəməyə də müraciət edə bilər. Lakin məhkəmə prosesi həm vaxt, həm də xərc baxımından hamı üçün əlverişli deyil. “Banklar haqqında” Qanunun 62.2-ci maddəsinə əsasən, bank öz öhdəliklərini yerinə yetirmədikdə, bir və ya bir neçə kreditor Mərkəzi Banka vəsatətlə müraciət edə bilər. Mərkəzi Bank vəsatətə onu aldığı gündən 5 təqvim günü müddətində baxır və bankın öz öhdəliklərini yerinə yetirmədiyi faktını müəyyənləşdirirsə, bank lisenziyasının ləğvi və iflas proseduruna başlanmasına dair məhkəməyə ərizə vermək haqqında qərar qəbul edir. Mərkəzi Bank məhkəməyə ərizəni bu barədə qərarı qəbul etdikdən sonra 3 təqvim günü ərzində verir. Bankın öz öhdəliklərini yerinə yetirmədiyi faktı müəyyən edilməmişsə, Mərkəzi Bank kreditorlara əsaslandırılmış imtina göndərir. Yəni Mərkəzi Bank mütləq sizə cavab verməlidir”.
Günel CƏLİLOVA
