Məlum olduğu kimi, yanvarın 21-də İsveçrənin Davos şəhərində 50-ci Dünya İqtisadi Forumu işə başlayıb. Belə ki, 21-24 yanvar tarixlərində keçiriləcək iqtisadi foruma 117 ölkədən 3 min siyasətçi, iş adamları, qeyri-hökumət təşkilatlarının nümayəndələri və jurnalistlər qatılıb.
Forum çərçivəsində 400-dən çox açıq və qapalı iclasın keçirilməsi planlaşdırılır. Ümumilikdə, builki Davos Forumunda 50-dən çox ölkə Prezident və Baş nazir səviyyəsində təmsil olunur.
Onu da qeyd edək ki, Prezident İlham Əliyevin Dünya İqtisadi Forumunun illik toplantısında iştirak etmək üçün İsveçrə Konfederasiyasına işgüzar səfəri başlayıb. Ölkə başçısı səfər çərçivəsində bir sıra nüfuzlu şirkət rəhbərləri, işgüzar dairələrin rəhbərləri ilə görüşlər keçirib. Prezident İlham Əliyev Davosda “VTB Bank”ın prezidenti-idarə heyətinin sədri Andrey Kostinlə görüşüb. Görüşdə “VTB Bank”ın Azərbaycanda uzun müddət uğurlu fəaliyyət göstərdiyi qeyd olunub. Ölkə başçısı “VTB Bank”a Azərbaycan iqtisadiyyatının real sektoruna kredit qoyuluşunu artırmasını təklif edib. Andrey Kostin təklifə müsbət yanaşdığını bildirib və dövlət başçısını əmin edib ki, “VTB Bank” bu istiqamətdə fəaliyyətini daha da genişləndirəcək.
Bununla belə, ölkə başçısı “CISCO” şirkətinin icraçı vitse-prezidenti və baş maliyyə direktoru xanım Kelli Kramerlə görüşüb. Görüşdə “CISCO” şirkəti ilə Azərbaycanın uzun müddətdir müxtəlif sahələrdə əməkdaşlıq etdiyi bildirilib. Qeyd olunub ki, “CISCO” şirkəti hazırda Azərbaycanda prioritet istiqamətlər üzrə layihələr reallaşdırmaqdadır. Prezidenti İlham Əliyev, həmçinin, “Carlyle Group” şirkətinin həmtəsisçisi Devid Rubinşteynlə görüşüb.
Bütövlükdə, Prezident İlham Əliyev 2007-ci ildən Davosda keçirilən forumda iştirak edir və hər dəfə böyük şirkətlərin rəhbərləri ölkə başçısı ilə işgüzar görüşlərin keçirilməsinə xüsusi maraq göstərirlər. Bu əvvəl də belə idi, indi də belədir. Ümumilikdə, belə ikitərəfli görüşlərin keçirilməsinin əhəmiyyətini ekspertlər necə dəyərləndirirlər? Bu kimi görüşlər Azərbaycana yeni investisiya cəlb edilməsinə necə təsir edəcək?
“Xüsusən də iqtisadiyyatın qeyri-neft sektoruna investisiyaların cəlb edilməsi baxımından bunun müsbət təsir edəcəyi gözlənir”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, bu cür görüşlərin keçirilməsi mühüm əhəmiyyətə malikdir: “Nəzərə almaq lazımdır ki, Davos İqtisadi Forumunda böyük transmilli korporasiyaların təsisçiləri, rəhbərləri iştirak edirlər. Nəticədə həmin şəxslərlə bir sıra ikitərəfli görüşlərin keçirilməsi üçün imkanlar yaranır. Həmin şirkət rəhbərlərinin Prezident İlham Əliyevlə ikitərəfli görüşlər keçirməsi mühüm əhəmiyyət kəsb edir. Çünki görüşlər çərçivəsində yeni iqtisadi imkanlar barəsində daha detallı məsələlər müzakirə olunur. Həmçinin, iri layihələrə beynəlxalq səviyyəli böyük şirkətlərin cəlb olunması imkanları artır. Bu baxımdan hesab edirəm ki, sözügedən ikitərəfli görüşlərin faydası böyük olacaq. İkitərəfli Davos görüşləri Azərbaycana yeni xarici sərmayələrin cəlbində vacib rol oynayacaq. Xüsusən də iqtisadiyyatın qeyri-neft sektoruna investisiyaların cəlb edilməsi baxımından bunun müsbət təsir edəcəyi gözlənir. Xarici şirkətlərin bu kimi görüşlərdə fəal iştirak etməsi onu göstərir ki, onlar Azərbaycana yeni sərmayələr qoymaqda maraqlıdırlar”.
Vidadi ORDAHALLI
