Neft və qaz Azərbaycan xalqına xoşbəxtlik gətirə bildimi...

Azərbaycan o ölkələrdəndir ki, neft-qaz yataqları ölkəmizə tərəqqi, xoşbəxtlik, inkişaf gətirdi. Bunu Prezident İlham Əliyev görkəmli neftçi-alim və geoloq, SOCAR-ın birinci vitse-prezidenti, akademik Xoşbəxt Yusifzadənin 90 illik yubileyi münasibətilə mərasimdə deyib.

Ölkə başçısının sözlərinə görə, neftdən əldə olunan gəlirləri ədalətli şəkildə idarə etmək, onları insanlara çatdırmaq, ölkə qarşısında duran əsas vəzifələrə yönəltmək siyasi rəhbərliyin böyük zəhməti hesabına və düşünülmüş siyasət nəticəsində mümkün olub: “Neftlə zəngin olan bir çox ölkələrdə, əksinə, neft xeyir yox, ziyan, problemlər gətirir, qanlı toqquşmalar baş verir. Biz tarixdən yaxşı bilirik ki, neft uğrunda mübarizə əksər hallarda çox böyük çətinliklərə, faciələrə gətirir. Azərbaycan isə ulu öndər Heydər Əliyevin təşəbbüsü ilə başlanmış neft strategiyasını uğurla icra edərkən neftdən əldə olunmuş gəlirləri ölkəmizin ümumi inkişafına yönəltdi. Məhz buna görə bu gün adambaşına düşən valyuta ehtiyatlarına görə biz MDB məkanında birinci yerdəyik. Azərbaycanda yoxsulluq səviyyəsi 4,8 faiz ətrafındadır. Bu, onu göstərir ki, neftdən əldə edilmiş gəlirlər cəmiyyətdə ədalətli şəkildə bölünür və son illərdə ölkəmizdə yaşanan tərəqqi məhz bu amilə söykənir”.

Prezident onu da qeyd edib ki, vətəndaşların sosial problemlərinin həlli də birbaşa neft-qaz sahəsində görülən işlərlə bağlıdır: “Bütün bu işlərin əsas mənbəyi neftdən əldə edilmiş gəlirlər və bu gəlirlərdən düzgün istifadə olunmasıdır”.

Bütün bu deyilənlərin fonunda, neft-qaz gəlirləri Azərbaycana xoşbəxtlik gətirdimi? Bununla bağlı ekspertlərin yanaşması necədir?

• “Bütün bunlar aparılan uğurlu siyasət və neft gəlirlərindən düzgün istifadə etmək nəticəsində əldə olunub”

Məsələyə münasibət bildirən millət vəkili Aydın Hüseynovun sözlərinə görə, Azərbaycan neft-qaz gəlirlərindən səmərəli istifadə etdi: “Nəticədə həqiqətən də neft gəlirləri Azərbaycana firəvan həyat gətirdi. Ölkənin iqtisadi inkişafının təmin olunması üçün çox böyük bir bazar rolunu oynadı. Neft gəlirləri ölkənin müdafiə qüdrətinin artması deməkdir. Yəni, bütövlükdə, Azərbaycan iqtisadiyyatının bugünkü uğurlarının əldə olunmasında, ölkənin dünya miqyasında tanınmasında uğurlu neft strategiyasının rolu böyükdür. Bu da ulu öndər Heydər Əliyevin uzaqgörən strategiyasının nəticəsi idi. Bu gün dünyada elə ölkələr var ki, onların neft-qaz ehtiyatları bizdən qat-qat çoxdur. Ancaq həmin ölkələrdə nə siyasi sabitlik var, nə də neft gəlirlərinin ədalətli bölgüsü. Həmin ölkələrdə siyasi iğtişaşlar tuğyan edir. Azərbaycan hakimiyyəti isə neft gəlirlərindən səmərəli istifadə etməklə ölkənin inkişafını təmin etdi. Xalqın həyat səviyyəsi yüksəldi. Ən başlıcası isə bütün bunların sayəsində xalq firəvan şəraitdə yaşayır. Şübhəsiz ki, sadalananlar aparılan uğurlu siyasət və neft gəlirlərindən düzgün istifadə etmək nəticəsində əldə olunub”.

Vidadi ORDAHALLI