Məlum olduğu kimi, ötən ilin noyabrında Prezident İlham Əliyev “Maliyyə xidmətləri bazarında tənzimləmə və nəzarət sisteminin idarə edilməsinin təkmilləşdirilməsi haqqında” Sərəncam imzalayıb. Sərəncamla Maliyyə Bazarlarına Nəzarət Palatası (MBNP) ləğv edilib. Sözügedən qurumun vəzifələri, səlahiyyəti, hüquqları, habelə əmlakı Mərkəzi Banka verilib.
Ancaq “Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Prezident Fərmanının icrasına başlandığı gündən əhalinin bəzi banklardan narazılığı artmaqda davam edir. Yəni qurumun Mərkəzi Bankla birləşdirilməsi sözügedən problemlərin həllinə gətirib çıxarmayıb. Zamanında MBNP-nin bu problemi həll etməməsi indi də bir sıra vətəndaşların bundan əziyyət çəkməsinə gətirib çıxarıb. Məsələ ondadır ki, Prezident İlham Əliyevin qərarı ilə fiziki şəxslərin problemli valyuta kreditləri ilə bağlı dövlət büdcəsindən vəsait ayrıldı. Ancaq indiyə qədər sözügedən kompensasiyaların ödənilməsi tam başa çatmayıb. Hələ də bəzi vətəndaşlar buna görə onlara çatacaq kompensasiyanı ala bilmirlər.
Vətəndaşlara dövlət tərəfindən müəyyən edilən kompensasiyaların ödənişində ciddi süründürməçiliyə yol verilir. Bir müddət əvvəl analoji məzmunlu şikayətlə “Bakı-Xəbər” qəzetinə Qasımov Amil Bərxudar oğlu müraciət edib. O hazırda fəaliyyəti dayanan “Zamin Bank”dan götürdüyü kreditə görə bu vəziyyətlə üzləşib. Belə ki, A.Qasımov 2015-ci ildə həmin bankdan 5100 dollar kredit götürüb. Həmin vaxt dolların kursu 1 manat 05 qəpik olub. Bunun qarşılığında o, banka borcunu artıqlaması ilə qaytarıb. Kurs 1.70 olanda 12.500 manat qaytarıb. Prezidentin müvafiq fərmanı çıxandan sonra bankdan ona sənəd verilib ki, 4588 ABŞ dolları qalığın var. Yəni həmin pul kompensasiya kimi ona qaytarılmalıdır. Bu da 7800 manat edir. Vətəndaş pulu çıxarmaq istəyəndə məlum olur ki, həmin məbləğ “Zamin Bank”ın cari hesabındadır. Lakin hesab bloklandığı üçün vəsaiti çıxarmaq mümkün olmayıb. Get-gəldən sonra vətəndaşa deyiblər ki, hesab aç, ora pul köçürüləcək. Ancaq A.Qasımovun hesabına cəmi 600 manat pul köçürülüb. Daha sonra poçt vasitəsilə ünvanına 353 manat pul göndərilib. Daha sonra Azərbaycan Əmanətlərin Sığortalanması Fondundan A.Qasımova göndərilən rəsmi məktubda qeyd olunub ki, MBNP ona 2619 manat ödəməlidir.
Buna baxmayaraq, A.Qasımov MBNP-nin verməli olduğu 2619 manat pulu hələ də ala bilməyib. Qurumun Mərkəzi Banka birləşdirilməsi həmin vəsaitin vətəndaşa qaytarılmasına gətirib çıxarmayıb. Məsələ ilə bağlı Mərkəzi Bankdan münasibət öyrənməyə çalışsaq da, bu mümkün olmadı.
“Çıxış yolu odur ki, Mərkəzi Bank bu yöndə işləri sürətləndirsin”
Məsələyə münasibət bildirən iqtisad elmləri doktoru Fikrət Yusifovun sözlərinə görə, bir sıra vətəndaşlar belə problemdən əziyyət çəkir və onlara düşən kompensasiyanı ala bilmirlər: “Ona görə də Mərkəzi Bank bu istiqamətdə işlərini sürətləndirməlidir. Faktiki olaraq vətəndaşlar get-gəl arasında qalıblar. MBNP öz işinin öhdəsindən gələ bilmədi. Müxtəlif bürokratik əngəllər üzündən vətəndaşlar onlara düşən kompensasiyanı ala bilmədilər və bu vəziyyət indi də davam edir. Sonra Palata ləğv edildi və səlahiyyətləri MB-yə verildi. Ancaq hələ də problem kökündən həll edilməyib. Ona görə də çıxış yolu odur ki, MB bu yöndə işləri sürətləndirsin. Çünki qurum ləğv edilsə də, səlahiyyətləri MB-yə verilib. Keçmiş MBNP-nin həll etmədiyi işləri MB həll etməlidir. Çünki bu qurumda peşəkarlıq daha yüksəkdir. Ona görə də MB bu yöndə fəaliyyətini artırmalıdır”.
Vidadi ORDAHALLI
