Yanvarın 9-da qəzetimizdə “Azərbaycanda 450 min fermer? – Az qala hər məntəqəyə 100 fermer düşür... Şübhələrin qaynaqları...” adlı yazı dərc olunub. Yazıda elektron hökumət portalında qeydiyyatdan keçən 449 259 fermerlə bağlı təhlil aparılıb.
Qeyd edilib ki, 65 rayonu və 4354 kəndi olan bir ölkədə 450 minə yaxın fermerin olması real görünmür. Bununla bağlı müxtəlif arqumentlər ortaya qoyulub. Çünki Azərbaycanın ərazisi o qədər də böyük deyil. Bundan başqa, ölkə ərazisinin 20 faizi işğal altındadır. Azərbaycanda göstərildiyi qədər fermerin olmasını ekspertlər də birmənalı qarşılamayaraq buna şübhə ilə yanaşıblar.
“Burada birinci torpaq islahatı nəticəsində dövlət aktı əldə etmiş vətəndaşlardan başqa, islahata qədər torpaq əldə etmiş subyektlər də var”
Yazı ilə əlaqədar Kənd Təsərrüfatı Nazirliyinin rəsmisi qəzetimizə müraciət edib. Belə ki, “Bakı-Xəbər”lə əlaqə saxlayan Kənd Təsərrüfatı Nazirliyinin Torpaqdan istifadəyə nəzarət şöbəsinin müdürü Firudin Tağıyev fermerlərin sayı ilə bağlı rəqəmə aydınlıq gətirdi. Onun sözlərinə görə, 16 iyun 1996-cı ildə Azərbaycanda “Torpaq islahatı haqqında” Qanun qəbul olunduqdan sonra kütləvi şəkildə ölkədə 2030-dan çox kolxoz və sovxoz ləğv edilərək islahat aparıldı: “Nəticədə 860 mindən çox ailə və subyekt olaraq 3 milyon 400 mindən çox şəxs torpaq payına sahib oldu. Deməyim odur ki, 860 minin fonunda 450 min fermerin qeydiyyatdan keçməsi elə də böyük rəqəm deyil. Biz hər bir torpaq sahibi olanı fermer kimi qeydiyyata alırıq, amma bu onların əkinçiliklə məşğul olması demək deyil. Yəni qeydiyyatdan keçən gələn il də əkin əkə bilər, 3 ildən sonra da bu işlə məşğul olar. Burada əsas götürülür əkin bəyanları. Məsələn, bizim əkin bəyanları yenilənir, həcmi artır. Müqayisə üçün qeyd edim ki, 450 mindən 316 mini təsərrüfat fəaliyyəti barədə elektron formada məlumat verib. Yəni bu adamlar əkdiklərini bəyan ediblər, subsidiya almaqla bağlı müraciət olunub. Deməyim odur ki, 450 min arta da bilər. Çünki burada birinci torpaq islahatı nəticəsində dövlət aktı əldə etmiş vətəndaşlardan başqa, islahata qədər torpaq əldə etmiş subyektlər də var. Hansı ki, bunlar əvvəlki dövlət aktları ilə torpaq əldə ediblər. Onlar da bu sistemdə qeydiyyatdadırlar. Bizim məqsədimiz həm də statistikanı təkmilləşdirməkdir. Biz hazırda elektron sistemdə qeydiyyata düşmüş sənədlər üzrə təhlillər aparırıq. Sonda bu sənədlər hökumətə təqdim olunacaq. Deməyim odur ki, subsidiyaların elektron formada verilməsi şəffaflığa xidmət edir”.
Vidadi ORDAHALLI
