Taxılçılıq Azərbaycanda əkinçilik təsərrüfatının ən qədim və aparıcı sahəsi sayılır. Əlverişli təbii-coğrafi şərait burada qədim zamanlardan müxtəlif təsərrüfat sahələrinin yaranmasına və inkışafına əsaslı təsir göstərib.
Tarixən taxılçılıq azərbaycanlı əkinçilərin başlıca məşğuliyyəti olub. Bol məhsul nəinki əhalinin ehtiyac və tələbatını ödəyir, hətta xeyli hissəsi daxili və xarici bazarlara satışa göndərilirdi. Bu gün Azərbaycanın dünya taxıl bazarında tutduğu mövqe xarici ölkələrin diqqətini cəlb edir. Hətta Azərbaycanın dünya taxıl ticarətində tranzit məntəqəyə çevrilməsi məsələsi də müzakirə olunur.
“AgriCensus” jurnalının redaktoru Tom Houghton bu günlərdə keçirilən tədbirlərin birində qeyd edib ki, Azərbaycan Yaxın Şərqə taxıl çatdırılması üçün maraqlı marşrut ola bilər: “Azərbaycanın öz bazarının həcmi imkan verir ki, kifayət qədər taxıl daxil olsun, eyni zamanda, ixracı da mümkündür. Bir sözlə, Azərbaycan Yaxın Şərqə taxıl ixracı üçün əlverişli bir mövqedə yerləşir”.
Azərbaycanın dünya taxıl bazarında gələcək rolundan danışan Houghton deyib ki, hazırda ölkədə bir sıra layihələr icra olunur. Yaxşı olar ki, əkin sahələri artırılsın, məhsuldarlıq daha da inkişaf etdirilsin.
Nicat Nəsirli: “Azərbaycan taxıl ticarətində tranzit ölkəyə çevrilə bilər”
Azərbaycanın taxıl ticarətində tranzit ölkəyə çevrilməsi şansının mümkünlüyü barəsində danışan aqrar sahə üzrə ekspert Nicat Nəsirli “Bakı-Xəbər”ə açıqlamasında qeyd etdi ki, Azərbaycanın iqlim şəraiti tək kənd təsərrüfatı məhsullarının deyil, eyni zamanda, qeyri-kənd aqrar məhsullarının da tranziti baxımından çox əlverişlidir: “Əsas taxıl istehsalçıları Rusiya, Qazaxıstan və Yaxın Şərq ölkələri sayılır. Bu ölkələrin Avropa qitəsinə və digər ölkələrə birbaşa çıxış imkanları yoxdur. Nəzərə almaq lazımdır ki, hazırda dünyada ərzağa, taxıl məhsullarına tələbat artır. Azərbaycan bu istiqamət üzrə gözəl mövqe tuta bilər. Məlumat üçün bildirim ki, Hollandiya tək bir il ərzində kənd təsərrüfatı məhsullarının dövriyyəsinə nail olub. 59 milyardın, demək olar ki, hamısı ticarətdə formalaşıb. Hollandiya artıq logistika qovşağına çevrilib”.
Həmsöhbətimiz hesab edir ki, Azərbaycan taxıl ticarətində tranzit ölkəyə çevrilə bilər: “Bu sahənin inkişaf etdirilməsi üçün dövlət sektoru ilə özəl sahə birgə əməkdaşlıq etməlidir. Taxıl və digər məhsulları Orta Asiya və Yaxın Şərq ölkələri ilə yanaşı, Şimali Afrika ölkələrinə də göndərmək mümkündür. Nəzərə almaq lazımdır ki, çoxlu sayda iri sahibkar tranzitlərini Azərbaycan üzərindən edir”.
N.Nəsirlinin sözlərinə görə, Azərbaycanın logistik imkanları yüksək səviyyədə olduğu üçün, bundan istifadə etmək lazımdır. Taxıl və digər aqrar məhsulların ticarətində Azərbaycan tranzit ölkə rolunu oynaya bilər.
Günel CƏLİLOVA
