Bakı-Tbilisi-Qars dəmir yolu xəttinin istifadəyə verilməsi, "KDY Logistics"dəmiryol habının işə düşməsi, o cümlədən Həştərxanda Azərbaycan İşgüzar Mərkəzinin yaradılması ölkəmizdə fəaliyyət göstərən sahibkarların da xaricə, xüsusilə də Rusiya bazarına məhsul ixracını asanlaşdırıb.
Belə ki, yerli fermerlər istehsal etdikləri məhsulları birbaşa Rusiya bazarına çıxarmaq imkanı əldə ediblər. Məsələn, elə bu günlərdə Türkiyədən 400 ton yüklə Bakı-Tbilisi-Qars dəmiryolu ilə hərəkət edən və "Azərbaycan Dövlət Dəmir Yolu" ilə birgə "KDY Logistics" dəmiryol habına qoşulan vaqonlar vasitəsilə Azərbaycan sahibkarlarının istehsal etdikləri 160 ton xurma da Rusiyanın Həştərxan şəhərinə yola salınıb.
Qeyd edək ki, bu günlərdə Rusiya Federasiyasının Həştərxan vilayətinin Qubernatoru İqor Babuşkinin rəhbərlik etdiyi nümayəndə heyəti ölkəmizdə işgüzar səfərdə olub. Nümayəndə heyətini Prezident İlham Əliyev qəbul edib. Görüş zamanı Prezident dəmiryol habının yaradılmasını, Həştərxanda Azərbaycan İşgüzar Mərkəzinin açılmasını və Bakıda analoji mərkəzin yaradılması üçün tikinti işləri aparılmasını çox mühüm hadisə adlandırıb, bildirib ki, Həştərxanla Bakını bağlayan amillər çoxdur: "Əlbəttə, gələcəkdə birgə fəaliyyətimizi elə planlaşdırmalıyıq ki, qarşılıqlı əlaqələrimiz daha sıx olsun". "KDY Logistics" şirkətinin Azərbaycan qrupunun Direktorlar Şurasının sədri Qalib Məmmədov “Olaylar”ın əməkdaşı ilə söhbətində bildirib ki, prezidentlə görüş şirkətin daha geniş və əhatəli fəaliyyət göstərməsi üçün münbit şərait yaradıb. Belə ki, görüş zamanı şirkətin rəhbərinin verdiyi təkliflər cənab prezident tərəfindən müsbət qarşılanıb və həmin təkliflərin həyata keçirilməsi üçün anındaca müvafiq qurumlara tapşırıq verilib. Qalib Məmmədov onu da xüsusilə qeyd edib ki, "KDY Logistics" şirkətin fəaliyyətində prezidentə xüsusi xoş gələn məqam şirkətə Rusiyanın müxtəlif bazarlarına səpələnən və bir sıra adamlar tərəfindən sıxışdırılan soydaşlarımızın bu şirkətin ətrafına toplaşmasıdır. Azərbaycan Prezidenti İlham Əliyevi ad günü münasibətilə təbrik edən və Azərbaycan və Azərbaycan insanı naminə gördüyü bütün işlərdə prezidentin yanında olduqlarını deyən Qalib Məmmədov sahibkarlar adından Prezident İlham Əliyevə təşəkkürünü bildirib, "Azərbaycan Dövlət Dəmir Yolu" İdarəsinə isə göstərdikləri dəstəyə görə minnətdarlıq edib.
Xatırladaq ki, "KDY Logistics" yüksək texnologiyanı, etibarlı yük daşınmasını birləşdirən müasir logistikanın bariz nümunəsidir. Bu gün şirkət beynəlxalq ticarətin inkişafında əsas yerlərdən birini tutur. "KDY Logistics" dəmir yolu sistemlərinin inkişafı dövrünün və Qərblə Şərqi birləşdirən yolun böyük bir hissəsidir.
Belə ki, idxal olunan məhsullar şirkətin Həştərxan vilayətində yaradılmış saxlanma kameralarında saxlanılır və müvafiq qurumların həmin məhsullara keyfiyyət və ünvana çatdırılma proseduruna operativ nəzarətindən sonra nəzərdə tutulmuş yerlərə daşınır. Qeyd edək ki, Xəzəryanı ölkələr, Orta Asiya respublikaları, Gürcüstan, Türkiyə, İran və İraqın da daxil olduğu bu şəbəkəyə Azərbaycan da qoşulub. Ötən ildən etibarən Azərbaycanın məhsulları da dəmir yolu vasitəsilə həmin ünvana çatdırılır. Azərbaycanın göndərdiyi məhsullar sırasında daha çox kənd təsərrüfatı məhsulları üstünlük təşkil edir. Məlumata görə bir çox ölkələrin iş adamlarının əlaqəsini dəfələrlə asanlaşdıran və məhsulların tranzitdən fərqli olaraq rahat və tez daşınmasını təmin edən bu layihə vasitəsilə tikinti materialları da daşınır. Ehtiyacı olan ölkələrə isə Rusiyadan gətirilmiş arpa və buğda toxumları göndərilir. Başqa sözlə, şəbəkəyə daxil olan ölkələrdən olan iş adamları asan və rahat yolla mal və məhsul mübadiləsini həyata keçirə bilirlər. Onu da qeyd edək ki, hazırda Həştərxanda "KDY Loqistika" layihəsinin daha çox ölkəni əhatə etməsinin həyata keçirilməsi üzərində iş gedir. Məqsəd sözügedən layihənin coğrafiyasının daha da genişləndirilməsidir. Belə ki Əfqanıstan, Pakistan, Qazaxıstan və Qırğızıstanın, o cümlədən Çinin bu böyük iqtisadi xəritəyə daxil edilməsi gözlənilir. İqtisadi ekspertlər hesab edirlər ki, meyvə-tərəvəzin Həştərxana 4-5 günə çatdırılması "Bakı-Tbilisi-Qars" xəttinin vizit kartı və Azərbaycanın, o cümlədən ölkənin dəmir yollarının brendidir.
