Azərbaycanda qeyri-neft sektorunun inkişafı ixrac qabiliyyəti yüksək olan məhsulların daha geniş istehsalına şərait yaradır. Bu mənada, regionlarda texniki bitkilərin yetişdirilməsinin daha da genişləndirilməsi pambıqçılığın da inkişafında yeni mərhələnin başlanğıcını qoyub. Belə ki, ölkəmizdə pambıqçılığın inkişafına göstərilən diqqət və qayğı bu sahənin yenidən yüksəlişinə imkan verir.
Vurğulanmalıdır ki, pambıqçılığın inkişafı dünya bazarına çıxışımız, eləcə də kənd təsərrüfatının inkişafında mühüm rola malikdir. Eyni zamanda, pambıqçılıq əməktutumlu kənd təsərrüfatı sahəsidir.
Onu da qeyd edək ki, pambıqçılığın daha yüksək səviyyədə inkişafı üçün dövlətimiz sahibkarlara hərtərəfli yardım göstərir. İstər subsidiyaların verilməsi, istər yeni texnikalarla təminat məsələsinin həll edilməsi, istərsə də yeni torpaqların əkinə cəlb edilməsi regionlarda pambıqçılığın inkişafında yeni səhifələr açır.
Son illər bölgələrdə pambıq yığımı sürətlə artır. Bu sahədə yüksək inkişaf qeydə alınıb.
Dekabrın 19-da Prezident İlham Əliyevin yanında pambıqçılıq mövsümünün yekunları və 2020-ci ildə görüləcək tədbirlərlə bağlı müşavirədə də bu məsələyə toxunuldu. Qeyd olundu ki, 2019-cu ildə 50 sentnerdən artıq məhsul götürən fermerlərin sayı 953 olub. O da bildirildi ki, 2018-ci ildə 30 sentnerdən çox məhsul götürən 3096 fermer vardısa, 2019-cu ildə bu rəqəm iki dəfədən çox artaraq 7110 fermer təşkil edib. 7110 fermer tərəfindən yığılmış pambıq ümumi istehsalın 39 faizini təşkil edir: “Bu məhsulun 29,5 min hektar sahədən yığıldığını nəzərə alsaq, hektardan orta məhsuldarlıq 39 sentnerdir. 2019-cu ildə 50 sentnerdən artıq məhsul götürən fermerlərin sayı 953 olub. 2018-ci illə müqayisədə hesabat ilində fermerlərin əldə etdikləri gəlirlərin ümumi həcmi 45 milyon manatdan çox artıb”.
Sevindirici haldır ki, cari ildə 50 sentnerdən artıq məhsul götürən fermerlərin sayı artıb. Necə etmək olar ki, digər bölgələrdə də analoji hal yaşansın?
“Fermerlərin daha yüksək həcmdə məhsul götürməsi üçün onlara dəstək olmaq və lazımi şərait yaratmaq lazımdır”
Azərbaycan Dövlət İqtisad Universitetinin (UNEC) professoru Elşad Məmmədov “Bakı-Xəbər”ə açıqlamasında qeyd etdi ki, son zamanlar ölkədə iqtisadiyyatın şaxələndirilməsi istiqamətində həyata keçirilən tədbirlər təqdirəlayiqdir: “Hökumət tərəfindən kənd təsərrüfatının inkişafında pambıqçılıq prioritet istiqamətlərdən biri seçilib. Bu istiqamətə yönləndirilmiş resursların həcmi keyfiyyət dəyişikliklərinə səbəb olub. Həm ixrac, həm yerli bazarın təyin olunması baxımından qeyd olunan sektorda artım müşahidə olunur. Artım yeni texnologiyaların tətbiqi ilə müşahidə ediləndə məhsuldarlığın daha yüksək templə inkişafına səbəb olur”.
Həmsöhbətimiz onu da əlavə etdi ki, pambıqçılıq elə bir sektordur ki, bu sahəyə xüsusi diqqət ayrılmalıdır. Bəzi bölgələrdə pambıq yığımı sahəsində yüksək nəticə müşahidə olunub: “Bu il 953 fermer 50 sentnerdən artıq məhsul götürüb. Məhsuldarlığın artması iqtisadiyyatın inkişafına müsbət təsir edir. Elə etmək lazımdır ki, digər bölgələrdə də məhsuldarlıq yüksək səviyyədə olsun. Bunun üçün fermerlərə dəstək olmaq və onlara lazımi şərait yaratmaq lazımdır”.
Günel CƏLİLOVA
