Azərbaycanda mehmanxana və mehmanxana tipli obyektlərin təsnifati, ulduz kateqoriyalarinin müəyyənləşdirilməsi və qiymətləndirmədə meyarlarının tətbiq edilməsi barədə yeni standartlar hazırlanıb.
Trend Ədliyyə Nazirliyinin reyestrinə istinadən xəbər verir ki, bu standart "Mehmanxana və mehmanxana tipli obyektlərin təsnifati, ulduz kateqoriyalarının müəyyənləşdirilməsi və qiymətləndirmədə meyarlarının tətbiq edilməsi” dövlət standartına dəyişikliklər edilməklə hazırlanıb. Dövlət standartında müəyyən edilən tələblərin beynəlxalq standartlara, norma, qayda və tövsiyyələrə və digər dövlətlərin müvafiq mütərəqqi milli standartlarına, elm, texnika və texnologiyanın müasir nailiyyətlərinə əsaslanmasını müəyyən etmək üçün standartın ilkin yoxlama müddəti 2020-ci il, dövrü yoxlama müddəti 5 ildir.
Bu standart mehmanxana və mehmanxana tipli obyektlərin təsnifatı, ulduz kateqoriyalarının müəyyənləşdirilməsi və qiymətləndirməsi meyarlarının müəyyən edilməsi və tətbiq edilməsi məqsədi ilə hazırlanıb.
Beynəlxalq təcrübə nəzərə alınmaqla yerli və xarici turistlərin mehmanxana, mehmanxana tipli obyektlərin, otaqların təsnifatı barədə ətraflı məlumat almaları üçün obyektlərin və otaqların adı azərbaycan dili ilə yanaşı xarici dillərdə göstərilib.
Yeni standartlara əsasən, mehmanxana və mehmanxana tipli obyektlərin kateqoriyası "ulduz” işarəsi ilə müəyyən olunur. Burada ən yüksək kateqoriya - "beş ulduz”, ən aşağı kateqoriya isə "bir ulduz” kimi qəbul edilir.
Bir ulduzlu obyektlərdə sadə aksessuarlar, otaqda bir gecəlik qalmaq üçün nəzərdə tutulan lazımi ənənəvi vasitələr çox təmiz və qüsursuz vəziyətdə olmalıdır.
İki ulduzlu obyektlərdə funksional və rahat aksessuarlar, gecə qalmağa imkan verən xidmətlərlə yanaşı, digər məhdud xidmətlər təklif edilir. Qurğuların və vasitələrin keyfiyyəti onların funksionallığı və təmizlik meyarı ilə ölçülür, istifadə olunan materiallar daha az əhəmiyyətə malikdir.
Üç ulduzlu obyektlərdə qonaqların görüntü dairəsində olan nəfis və vahid formalı aksessuarların mövcudluğu zəruridir. Elektron avadanlıqlar yaxşı vəziyyətdə olmalı və yaxşı xidmət göstərməlidir.
Dörd ulduzlu obyektlərdə yüksək səviyyəli aksessuarlar, keyfiyyətli və vaxtlı-vaxtında yeniləşdirilmiş aksessuarlara malik geniş otaqlar olmalıdır. Yaxşı səs izolyasiyası, yüksək səviyyəli xidmət və çox yaxşı vəziyyətdə olan elektron avadanlığın mövcudluğu vacibdir.
Beş ulduzlu obyektlərdə hər yerdə eksklüziv, lüks aksessuarlar, nəfis, yüksək keyfiyyətli və zərif materiallarla müşayiət olunan xüsusi dizayn, qüsursuz vəziyyətdə olan elektron avadanlıqlar olmalıdır. Beynəlxalq dəbdəbəli mehmanxana standartlarında təklif olunan arxitektura, qurğular, vasitələr, ətraf mühit və xidmətlərin mövcudluğu vacibdir.
