Son günlər avronun məzənnəsi dəyər itirməkdə davam edir. Xatırladaq ki, bu il ilk dəfə martın 30-da Azərbaycanda avronun məzənnəsi 2 manatdan aşağı düşərək 1,9998 manat olub. Cari il yanvarın 7-də ölkədə avronun məzənnəsi 2,0958 manata çataraq 32 aylıq maksimumu yeniləmişdi. Ümumiyyətlə, həmin tarixdən avro manata nisbətdə 4,6% dəyər itirib.
Maraqlıdır, Azərbaycanda avronun ucuzlaşmasının səbəbi nə ilə bağlıdır və proses ölkə iqtisadiyyatına necə təsir edəcək?
“...Avropa Mərkəzi Bankı tərəfindən avronun emissiyasının kəskin şəkildə artırılması, pul-kredit siyasətinin yumşaldılması ilə bağlıdır”
Azərbaycan Dövlət İqtisad Universitetinin (UNEC) professoru Elşad Məmmədov bildirdi ki, Azərbaycanda avronun ucuzlaşması, ilk növbədə, Avropa Mərkəzi Bankı tərəfindən avronun emissiyasının kəskin şəkildə artırılması, pul-kredit siyasətinin yumşaldılması ilə bağlıdır: "Avronun devalvasiya prosesi davam edəcək. Dollarda da artıq devalvasiya baş verir. Dolların xüsusi çəkisi dünya ticarətində, dünya iqtisadiyyatında azalır. Dollar və avronun devalvasiya prosesinin baş verməsi qaçılmazdır. Eyni zamanda, Avropa iqtisadiyyatındakı problemlər, qeyri-tarazlıq avronun tədricən ucuzlaşmasına səbəb olacaq".
Həmsöhbətimiz onu da əlavə etdi ki, ixracat baxımından aparıcı ehtiyat valyutaların zəifləməsi Azərbaycan üçün problemlərin yaranmasına səbəb olur. Çünki manat sabitdir, amma ixracat nəticəsində ölkəyə gələn valyuta zəifləməkdədir. Belə olan halda, bunun ixracata mənfi təsiri olur. Lakin bütün bunlara baxmayaraq, manatın məzənnəsinin sabitliyi qorunmalıdır. Əks halda, bu, ölkə iqtisadiyyatında ciddi qeyri-tarazlıqların dərinləşməsinə səbəb ola bilər. Ona görə də avronun ucuzlaşmasının beynəlxalq ticarətə, o cümlədən, Azərbaycanın xarici ticarətinə təsiri olacaq. İxracatda, ilk növbədə, yüksək texnoloji tutumlu sahələrin xüsusi çəkisinin artırılmasına nail olmalıyıq. Eyni zamanda, tədricən texnologiyaların idxalına nail olmalıyıq ki, ölkəmizin rəqabət üstünlüyünün gücləndirilməsinə şərait yarada bilək".
Günel CƏLİLOVA
