Azərbaycan Alıcılıq Qabiliyyəti Pariteti əsasında hesablanmış minimum və orta aylıq pensiya göstəricilərinin beynəlxalq dollar ifadəsində MDB ölkələri və Gürcüstan üzrə müqayisədə lider mövqeyini qoruyub saxlamaqdadır. Əmək və Əhalinin Sosial Müdafiəsi Nazirliyinin yaydığı məlumatda qeyd olunur ki, ölkəmizdə aparılan sosial islahatlar sosial ödənişlərin, habelə pensiyaların əhəmiyyətli dərəcədə artımı ilə nəticələnir.
Məlumat üçün qeyd edək ki, bu gün Azərbaycanda ödənilən pensiyaların minimum məbləği 233 manat, orta aylıq məbləği isə 300 manat, o cümlədən, yaşa görə pensiyanın orta aylıq məbləği 330 manatdır.
“Əhalinin sosial rifahının yaxşılaşdırılması istiqamətində həyata keçirilən islahat tədbirlərindən biri də pensiyaların artırılması ilə əlaqədardır”
İqtisadçı Kamran Məmmədli qeyd etdi ki, əhalinin sosial rifahının yaxşılaşdırılması istiqamətində həyata keçirilən islahat tədbirlərindən biri də pensiyaların artırılması ilə əlaqədardır: “Bu islahat 2019-cu il ərzində əmək pensiyalarının 72% artımı ilə Azərbaycanı MDB məkanında minimal pensiyanın dollarla ifadəsinə görə 1-ci yerə yüksəltmiş oldu. Bu göstərici Ermənistanın minimal pensiya göstəricisindən 3.7 dəfə, Gürcüstanın göstəricisindən 2 dəfə, Rusiyanın göstəricisindən 1.3 dəfə, Qazaxıstanın minimal pensiya göstəricisindən isə 1.1 dəfə çoxdur. Orta pensiya göstəricisinə görə isə Azərbaycan MDB-də ilk sıralarda yer alır”.
Həmsöhbətimizin sözlərinə görə, son illərdə Azərbaycan Respublikasının iqtisadi, sosial və humanitar inkişafı çox sürətli və innovativ olmaqla yanaşı, dünyanın XXI əsr üçün əsas prioriteti sayılan davamlı və eyni zamanda, hər bir vətəndaşın rifahına müsbət təsir göstərən inklüziv inkişaf tələblərinə yüksək dərəcədə cavab verir. Bu səbəbdən bir çox nüfuzlu beynəlxalq təşkilat Azərbaycanın bu sahədə də qazandığı nailiyyətləri xüsusi qeyd edir və ölkənin yüksək reytinqləri haqqında mütəmadi olaraq hesabatlar dərc edir: “Azərbaycan Respublikası davamlı inklüziv inkişafın optimal idarə edilməsi sahəsində dünya lideridir. Məlum olduğu kimi, inklüziv inkişaf tərəqqinin elə bir yoludur ki, bu zaman ölkə hərtərəfli inkişaf edir və bu prosesin müsbət nəticələrini ölkənin bütün vətəndaşları hiss edirlər”.
Günel CƏLİLOVA
