Sosial evlərin inşası ilə bağlı yeni mərhələ başlanır

Tarix: 24.11.2014 / 02:40
Bölmə: İqtisadiyyat

Gələn ilin dövlət büdcəsinin parlamentdə müzakirəsi zamanı deputatların xüsusi diqqət çəkdiyi məqamlardan biri də sosial evlərin inşası və ipoteka kreditləşməsi ilə bağlı oldu. Deputatların böyük əksəriyyəti həm ipoteka şərtlərinin yumşaldılmasını, həm də artıq sosial evlərin inşasına başlanmasının zəruriliyini ön plana çəkdilər. Məsələyə münasibət bildirən Mərkəzi Bankın İdarə Heyətinin sədri Elman Rüstəmov diqqətə çatdırıb ki, bu günə qədər vətəndaşlara 1 milyarddan çox ipoteka kreditləri verilib.
O qeyd edib ki, gələn ilin dövlət büdcəsində ipoteka kreditləri üçün vəsaitin artırılması nəzərdə tutulub: "Belə ki, bu vəsait cari illə müqayisədə 10 milyon manat artırılaraq 50 milyon manata çatdırılıb. Bu siyasətin həyata keçirilməsi çox düzgün addımdır".
Onun sözlərinə görə, əhaliyə verilən ipoteka kreditinin 600 milyon manatı İpoteka Fondunun xətti ilə və dövlətin ayırdığı vəsaitlər hesabına verilib: "Bura Fondun bazardan cəlb etdiyi vəsaitlər də daxildir. Qalan məbləğ isə bankların öz hesabına verilib. Bütövlükdə isə, bu günə qədər İpoteka Fondu vasitəsilə 15.400 ailə ipoteka krediti alıb". Bundan başqa, Elman Rüstəmov yeni ipoteka strategiyasının bəzi detallarını açıqlayıb. O deyib ki, yeni ipoteka strategiyasında üç prinsip əsas götürülüb: "Bunlardan birincisi güzəştli ipotekanın dövlətin himayəsində qalması və bu vəsaitin gələcəkdə optimallaşdırılmasıdır. İkinci əsas prinsip isə kommersiya kreditləşməsinin daha da liberallaşdırılması və bu işin bankların üzərinə qoyulması, banklar üçün yeni təklif kanalları, yeni uzunmüddətli vəsait kanallarının yaradılmasıdır. Bu isə maliyyə bazarlarının digər seqmentlərinin, xüsusilə də, pensiya fondlarının, sığorta fondlarının vasitəsilə baş verir. Digər tərəfdən isə, alman modeli deyilən ipotekanı irəli sürürük. Bu ipoteka əhalinin öz yığımları hesabına baş verir. Bu modelə görə, xüsusi bir təsisat yaradılır. Əhali müəyyən məbləğə qədər bu vəsaiti toplayır. Nəzərdə tutulan məbləğ formalaşandan sonra əhali həmin bankdan ipoteka krediti əldə edə bilir. Hesab edirəm ki, bu model Azərbaycanda çox yararlı ola bilər". Maliyyə naziri Samir Şərifov da bu mövzuya toxunub: "İpoteka kreditləri ilə bağlı hökumətlə Mərkəzi Bank arasında dialoq var və əlavə tədbirlər görüləcək".
Ekspertlər isə hesab edir ki, ölkənin maliyyə imkanları böyük olduğundan, sosial evlərin inşasına start verilə bilər. Eyni zamanda, ipoteka şərtləri də sadələşdirilə bilər. Millət vəkili Əli Məsimli təklif edir ki, Azərbaycanda yeni sosial evlər tikilən zaman insanların gəliri nəzərə alınsın və vətəndaşlar aylıq 70-100 manat ödəməklə, kirayə kimi qaldığı bu evləri 20-25 ildən sonra şəxsi mülkiyyətinə çevirsinlər. Deputat bildirib ki, Milli Məclisdə aparılan müzakirələr zamanı millət vəkilləri ipoteka kreditləri ilə bağlı təkliflər versələr də, hökumət nümayəndələri yeni bir söz deməyiblər.
Əli Məsimli "salamnyus" portalına açıqlamasında qeyd edib ki, deputatların təqdim etdiyi təkliflər əsas üç istiqaməti əhatə edir: "Birincisi, ipoteka kreditlərinin sosial bloku üzrə ayrılan 50 milyon manat tədricən artırılmalı, kredit faizləri 4 faizdən 2 faizə endirilməli və ilkin ödənişləri birinci mərhələdə müəyyən qədər azaltdıqdan sonra xüsusi fond yaradılmalıdır. Bu fond vasitəsilə ilkin ödəniş problemini həll etmək olar. İkincisi, ipoteka kreditləri təkcə Bakı şəhəri ilə məhdudlaşmamalı və bunun ölkənin digər regionlarına da yayılmasını təmin etmək üçün tədbirlər görülməlidir. Üçüncü təklif isə odur ki, ipoteka kreditləri ilə yanaşı, sosial evlərin tikilməsi məsələsini həll etmək lazımdır". Deputatın sözlərinə görə, bu günə qədər ipoteka kreditləri vasitəsilə 16 min ailə mənzil alıb: "2015-ci il üçün nəzərdə tutulan 50 milyon manatdan yalnız 1000-1200 ailə mənzil ala biləcək ki, bu da mənzilə ehtiyacı olan vətəndaşların 35 faizini də təşkil etmir. Bu prosesi sürətləndirmək üçün sosial evlərin tikintisini təşkil etmək lazımdır. Məlumdur ki, bu gün Azərbaycanda orta əməkhaqqı 400-450 manat, dövlət təşkilatlarında çalışan şəxslərin isə orta əməkhaqları 200-250 manatdır. Bizim təkliflər isə ondan ibarətdir ki, sosial evlər tikilən zaman bu gəlirlər nəzərə alınsın və vətəndaşlar aylıq 70-100 manat ödəməklə, kirayə kimi qaldığı bu evləri 20-25 ildən sonra şəxsi mülkiyyətinə çevirsinlər". Millət vəkili qeyd edib ki, əvvəlki illərə nisbətən bu il hökumət bu istiqamətdə daha fəal addımlar atmağa başlayıb.
Belə təkliflər də səslənir ki, sosial evlərin tikintisi üçün Bakı Şəhər İcra Hakimiyyəti ödənişsiz torpaq sahələri ayırmalıdır. Eləcə də hökumət tikinti şirkətlərini bu istiqamətdə işləməyə maraqlı etməli, onları bu layihələrə cəlb etməlidir.
Maya dəyəri aşağı olsa, torpaq sahəsi şəhər icra hakimiyyəti tərəfindən pulsuz ayrılsa, proses tikinti şirkətləri üçün də maraqlı olar. İndilikdə isə maya dəyəri baha olduğundan, tikinti şirkətləri də sosial ev layihəsinə həvəs göstərmir.

DİGƏR XƏBƏRLƏR

Tarix: 10.07.2026 / 20:55

Rusiyada dərin yanacaq qıtlığının Azərbaycana təsirləri gündəmdə...

Tarix: 10.07.2026 / 17:50

Əli Əsədovun rəhbərliyi ilə İqtisadi Şuranın iclası keçirildi - FOTO

Tarix: 10.07.2026 / 15:52

Beyləqan şəhərində fermerlər üçün aqrar sığorta ilə bağlı maarifləndirici təlim keçirilib

Tarix: 10.07.2026 / 14:47

Rusiya alimindən Ermənistan iqtisadiyyatı barədə inanılmaz rəylər - böhran olmayacaq...

Tarix: 10.07.2026 / 13:56

Azərbaycanın xarici dövlət borcu azaldı - 4 milyard 616,8 milyon...

Tarix: 10.07.2026 / 11:58

Rusiya Azərbaycan üzərindən Ermənistana propan və gübrə göndərəcək...

Tarix: 10.07.2026 / 09:17

Azərbaycan və Rusiya Samur çayının bölüşdürülməsini müzakirə edib

Tarix: 09.07.2026 / 19:05

Azərbaycana diri heyvan idxal edən iri şirkətlər əsas məlumatları "gizli" saxlayır...

Tarix: 09.07.2026 / 17:56

Britaniya “Zəngəzur” tankerini sanksiya siyahısından çıxardı

Tarix: 08.07.2026 / 15:30

"Avropa Yaşıl Enerji Dəhlizi" layihəsi icra mərhələsinə keçdi

Tarix: 08.07.2026 / 10:53

Beyləqanda şəkər çuğunduru fiaskosu...

Tarix: 07.07.2026 / 20:28

Sahibkarlara böyük şans açılır - üstəlik “qapı-qapı gəzməyə” son veriləcək...

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 09.07.2026 / 21:52

İrandan Trampa “İrəvan mesajı” - sülh olmasa, TRIPP marşrutuna dözmərik...

Tarix: 09.07.2026 / 19:38

Vətəndaşın məmurlarla birbaşa ünsiyyətində sıfır hədd - rəqəmsallaşma dövrünün hədəfi...

Tarix: 09.07.2026 / 18:51

Çin və ABŞ-ın mübarizə apardığı Gürcüstan limanında Azərbaycan həlledici söz sahibinə çevrilir...

Diasporumuza Rusiyada problemlər yaradılandan sonra Avropa, Amerika istiqamətində fəallıq başladı...