Şəhid ailələrinə, qazi və yaralılara daha bir dövlət sosial dəstək layihəsi…

Kamran Məmmədli: “Bu qərar sayəsində banklara olan inam və etimad yüksələcək”

img

Son zamanlar bəzi mətbu orqanlarında və sosial şəbəkələrdə bankların kredit borcunun ödənməsi üçün şəhid ailələrini və qaziləri narahat etməsi barədə məlumatlar yayılırdı. Artıq bu tip xəbərlərə son qoyuldu. Belə ki, “Azərbaycan Banklar Assosiasiyası” (ABA) İctimai Birliyi şəhid ailələrinin kredit borcları ilə bağlı qərar verib və bununla bağlı bəyanat yayıb.

Bəyanatda qeyd olunur ki, ölkə Prezidentinin tapşırıqları və Azərbaycan Mərkəzi Bankının tövsiyəsi ilə hərbçilərimizin və düşmən təxribatı nəticəsində zərər dəymiş vətəndaşlarımızın dəstəklənməsi məqsədilə banklar yekdil olaraq aşağıdakı qərarları qəbul ediblər: “Torpaqlarımızın azad edilməsi uğrunda döyüşlərdə şəhid olmuş hərbçilərimizin banklara olan istehlak kreditləri və onlara hesablanmış faizlər və digər ödəmələr tam həcmdə silinsin.

Düşmən təxribatı nəticəsində həyatını itirmiş mülki vətəndaşlarımızın banklara olan istehlak kreditləri və onlara hesablanmış faizlər və digər ödəmələr tam həcmdə silinsin.

Hərbi əməliyyatlar zamanı yaralanmış hərbçilərin banklara olan kredit öhdəliklərinə faizlərin və digər ödəmələrin hesablanması 27 sentyabr 2020-ci il tarixindən tam dayandırılsın”.

Şəhid ailələri, döyüşçülərin və müharibədə əziyyət çəkmiş mülki vətəndaşların kredit borclarının silinməsi təqdirəlayiqdir. 

  • “Şəhid ailələrinin, yaralıların, müharibə zamanı terrora məruz qalan mülki vətəndaşların kredit borcunun silinməsi müsbət qərardır”

İqtisadçı-ekspert Kamran Məmmədli qeyd etdi ki, İkinci Qarabağ savaşında 44 günlük Vətən müharibəsinin iştirakçıları, şəhidlərimiz və qazilərimiz çox böyük fədakarlıq göstərdilər: “Bu gün Azərbaycanın həm siyasi, həm də geopolitik anlamda ata biləcəyi addımların genişləndirilməsi, torpaqlarımızın işğaldan azad edilməsi kifayət qədər mühüm hadisədir. Həmin insanların bir çox probleminin həlli həm vətəndaş olaraq bizim, həm də dövlətin borcudur. Şəhid ailələrinin, yaralıların, müharibə zamanı terrora məruz qalan mülki vətəndaşların kredit borcunun silinməsi müsbət qərardır. Bu qərar həmin ailələrin sosial durumunun inkişaf etməsinə səbəb olacaq. Müharibədə iştirak edən hər bir insana və onun ailəsinə qayğı göstərilməlidir. Bu qərar sayəsində banklara olan inam və etimad yüksələcək”.

Günel CƏLİLOVA

Son xəbərlər