“Biz özəl sektora, xüsusilə pandemiyadan əziyyət çəkən sahələrə, turizm və onunla əlaqəli sahələrin bərpasına yardım edəcəyik”. Bunu Prezident İlham Əliyev “Microsoft” şirkətinin təşəbbüsü ilə şirkətin vitse-prezidenti Filip Roq, Mərkəzi və Şərqi Avropa bölgəsinin korporativ əlaqələr və hüquqi məsələlər üzrə rəhbəri Nanna-Luize Linde və “Microsoft” şirkətinin digər nümayəndələri ilə keçirilən videokonfrans zamanı deyib.
Dövlət başçısı bildirib ki, əsas diqqəti insanların koronavirusdan qorunmasına yönəltdik və bunun bizim iqtisadi artımımıza çox mənfi təsir göstərəcəyini aydın şəkildə başa düşürük: “Bizim bu il üçün çox böyük perspektivlərimiz var idi və ilin birinci rübü çox ümidverici idi. Lakin indi beş ayın nəticələri ümumdaxili məhsulda kiçik azalmanın – təxminən 1,7 faiz azalmanın olduğunu göstərir. Lakin, eyni zamanda, iqtisadiyyatın bəzi sektorlarında, xüsusilə neft və qazla əlaqəli olmayan sektorlarda artım qeydə alınıb. Bu səbəbdən bu gün biz məhdudiyyət tədbirlərini uzlaşdırırıq, çünki COVID-19 hələ də mövcuddur. Eyni zamanda, biz ölkəmizi açmağa və həyatımızın müxtəlif sahələrinin fəaliyyətini bərpa etməyə başlayırıq. Beləliklə, ümidvaram ki, bu balanslaşdırılmış yanaşma bizə, ilk növbədə, pandemiyaya qarşı uğurlu mübarizəni davam etdirməyə kömək edəcək. Eyni zamanda, biz özəl sektora, xüsusilə pandemiyadan əziyyət çəkən sahələrə, turizm və onunla əlaqəli sahələrin bərpasına yardım edəcəyik”.
Məlum olduğu kimi, pandemiya ilə əlaqədar bundan əvvəl biznesin müəyyən sahələrinə yardım edilib. Sözügedən yardımın yenidən edilməsinin planlaşdırılması həmin sahələrin ayaqda qalmasında, turizm sektoruna əlavə böyük investisiyaların cəlb edilməsində necə rol oynayacaq?
Məsələyə münasibət bildirən iqtisadçı-ekspert Fuad İbrahimov Prezidentin müəyyən sahələrə, o cümlədən, turizm sektoruna yardımların edilməsini gündəmə gətirməsinə müsbət prizmadan yanaşdı: “Ölkə başçısı hər zaman özəl sektorun inkişafına xüsusi önəm verir. O baxımdan yenidən yardımın edilməsi özəl sektora müsbət təsir göstərəcək. İqtisadiyyatda elə sahələr var ki, pandemiyadan çox zərər çəkib. Xüsusən də turizm sahəsinə bunun vurduğu ziyan daha böyükdür. Hazırda da sözügedən tendensiya davam edir. Əvvəl-axır, bu problem aradan qalxmalıdır. Bunun üçün, ilk növbədə, koronavirusla bağlı sağlam informasiya daxil olmalıdır. Məsələn, məlum olsa ki, koronavirusla bağlı vaksin hazırlanıb, bu, o dəqiqə turizm sektoruna müsbət əsir göstərəcək. Bu zaman turizm sektoruna qoyulan sərmayələr daha effektli olacaq. Çünki pandemiya nəinki Azərbaycanda, bütün dünyada turizmi iflic vəziyyətə salıb. Ona görə də sözügedən sahənin canlanması pandemiya ilə bağlı gedən proseslərdən asılıdır. Bu nöqteyi-nəzərdən diqqətli olmalıyıq. Ancaq bu sahələrə müəyyən yardım edilməlidir ki, turizm sektoru çökməsin. Çünki, əvvəl-axır, bu problem öz həllini tapacaq. Nəicədə turizm ölkənin ən gəlirli sahələrindən birinə çevriləcək. O üzdən, biz özəl sektoru qorumalıyıq”.
Vidadi ORDAHALLI
