Prezident İlham Əliyev “Microsoft” şirkətinin təşəbbüsü ilə şirkətin vitse-prezidenti Filip Roq, Mərkəzi və Şərqi Avropa bölgəsinin korporativ əlaqələr və hüquqi məsələlər üzrə rəhbəri Nanna-Luize Linde və “Microsoft” şirkətinin digər nümayəndələri ilə keçirilən videokonfrans zamanı deyib ki, Azərbaycan artıq sənaye inqilabı üzrə regional mərkəzə çevrilir:
"Bu dəfə Davos İqtisadi Forumu zamanı cənab Borge Brende və mən Davosun Dördüncü Sənaye İnqilabı üzrə Regional Mərkəzinin Bakıda yaradılması ilə bağlı sənədi imzaladıq. Beləliklə, bu mərkəz nəinki təkcə Azərbaycanı, region ölkələrini də əhatə edəcək. Buna görə düşünürəm ki, bizim üçün daha da irəliləmək və sizinlə innovasiya mərkəzi üzərində çalışmaq təbii olardı. Bizim əsas strategiyamız, sizin də bildiyiniz kimi, karbohidrogen ehtiyatlarından asılılığı azaltmaq və innovasiyalar, yeni texnologiyalar və müasir idarəçilik əsasında dayanıqlı inkişafa nail olmaqdır. Buna görə düşünürəm ki, bu məsələ üzərində birgə çalışmağımız əməkdaşlığımızı gücləndirə bilər. Bu videobağlantıya görə təşəkkür edirəm. Bu, 2018-ci ildə Bakıda keçirilmiş görüşümüzdən sonra görülmüş işlərə nəzər salmaq və gələcək addımları planlaşdırmaq üçün yaxşı imkandır. Düşünürəm, artıq 15 ildən çoxdur ki, “Microsoft” Azərbaycanda fəaliyyətə başlayandan bu yana davam edən tərəfdaşlığın böyük potensialı və böyük gələcəyi var. Biz qarşıdakı uzun illərdə tərəfdaş olacağıq. Bir daha təşəkkür edirəm. Sizi görməyə məmnun oldum. Sizə uğurlar arzulayıram. Pandemiyadan sonra sizi Bakıda görməyə ümid edirəm".
Sənaye inqlabı üzrə regional mərkəz statusu Azərbaycana fərqli nə verə bilər?
Beynəxlaq qiymətləndirmə üzrə ekspert, iqtisadçı Asif İbrahimov “Bakı-Xəbər”ə açıqlamasında bildirdi ki, dördüncü sənaye inqlabı dünyanın iqtisadi xəritəsinin yenidən qurulması deməkdir:“Bu, nəticədə bir çox şirkətlərin sıradan çıxması, əl dəyişdirilməsi və yeni oyunçuların meydanda görünəcəyi anlamına gəlir. Xüsusilə də burada innovativ texnologiyaların tətbiqi, İKT sistemlərinin daha da zənginləşdirilməsi baxımından əhaməyyətə malik olacaq. Buna uyğun bir regional mərkəzin Azərbaycanda yaradılması ölkəmizə böyük töhvələr verə bilər. Azərbaycan hazırda uğurlu inkişaf yolu keçir. MDB ölkələri sırasında İKT-nin inkişaf reytinqinə görə ön sıralardan birini tutur. Dünya ölkələri arasında 65-ci nəticəmiz də qənaətbəxş sayıla bilər. Yeni mərkəzin bizə verə biləcəyi faydalar çoxdu. Xüsusilə də bir çox sahələrdə yeni texnologiyalar tətbiq ediləcək. Ortaya yeni idarəçilik metodları çıxacaq. Texnologiyaların tətbiqi ilə təhsil sistemi inkişaf edəcək. Xüsusilə də təhsildə texnoloji sahənin inkişafına zəmin yaranacaq. Azərbaycana daha əvvəl az tətbiq edilən İKT standartları üzrə beynəlxalq təhlükəsizlik standartları, məsələn İSO- 27001, İSO-27002 kimi standartlar məcburi tətbiq ediləcək. Müasir dünya ilə ayaqlaşmaq üçün bir çox ölkə məcbur qalacaq ki, investisiyalar yatırsın, infrastrukturu təkmilləşdirsin. Bu da ölkəmizdə yeni iş yerlərinin açılmasını stimullaşdıracaq. İnfrastrukturun təkmillədirilməsi istiqamətində yaradılacaq iş yerləri daha gəlirli sahələri əhatə edəcək. Bir sözlə, ölkəmiz üçün çox böyük uğur sayıla blər”.
Məhəmmədəli QƏRİBLİ
