Tarix boyu hər bir xalqın davamlı sabitlik, iqtisadi inkişaf və tərəqqi yoluna çıxaraq dövlətçilik ənənələri formalaşdırması milli lider amili ilə sıx bağlı olub. Bu günün özündə də dünyanın bir sıra nüfuzlu dövlətləri məhz öz liderlərinin müəyyənləşdirdikləri mütərəqqi strategiya əsasında irəliləyir, gələcək perspektivlərini bu uğur yolundan kənarda təsəvvür etmirlər.
Xüsusilə hazırkı pandemiya dövründə ölkədə uğurla reallaşdırılan iqtisadi islahatlar, eləcə də sahibkarlığa dövlət dəstəyi tədbirləri davam etdirilir.
Danılmaz faktdır ki, dünya ölkələrinin əksəriyyəti son 6 ayda koronavirus pandemiyası qarşısında ciddi sosial-iqtisadi, tibbi, mənəvi-psixoloji problemlərlə üzləşib. Hətta onlar vəziyyətə nəzarəti itirdiyi bir zamanda Azərbaycan iqtisadi inkişaf tempini qoruyub saxlayıb, eləcə də ciddi sosial paketin reallaşdırılması dövlətimizin rəhbərinin müdrik və uzaqgörən siyasətinin nəticəsi kimi cəmiyyətdə yüksək qiymət alır. Son 3 ayda Azərbaycan Prezidentinin təşəbbüsü ilə keçirilən onlayn beynəlxalq tədbirlərin nüfuzlu əcnəbi iştirakçıları, dövlət və hökumət başçıları, müxtəlif təşkilatların nümayəndələri respublikamızın bu sahədə keçirdiyi tədbirləri mütərəqqi, öyrənilməsi və tətbiqi zəruri olan model kimi dəyərləndirirlər. İqtisadi tənəzzül keçirən 150-dən çox ölkənin Beynəlxalq Valyuta Fondu və Dünya Bankına yardım üçün müraciət etdiyi bir dönəmdə Azərbaycanın digər dövlətlərə və qurumlara yardım göstərməsi mühüm uğurlar sırasında qeyd olunmalıdır.
Prezident İlham Əliyevin 19 mart 2020-ci il tarixli Sərəncamı əsasında pandemiyanın iqtisadiyyata, məşğulluq məsələlərinə və sahibkarlıq subyektlərinə mənfi təsirinin azaldılması məqsədilə dəyəri 3,5 milyard manata çatan sosial-iqtisadi dəstək paketinin qəbulu cəmiyyətdə böyük razılıqla qarşılandı. Pandemiya dövründə kiçik, orta və iri sahibkarlıq subyektləri üçün ciddi güzəştlərin nəzərdə tutulması iş adamlarına dəyən zərərin kompensasiya edilməsi baxımından olduqca əhəmiyyətlidir. Eyni zamanda, pandemiyadan ən çox zərər çəkən sahələrdə işləyən 300 mindən çox insanın əməkhaqlarının əhəmiyyətli hissəsinin dövlət tərəfindən dəstəklənməsi, 300 minə yaxın mikro sahibkarın, ümumilikdə, 600 minə yaxın insanın dövlətdən maddi yardım alması ölkə rəhbərinin daim xalqın yanında olduğunun əyani təsdiqidir.
Qeyd etdiyimiz kimi, pandemiya dövründə xarici ölkələrlə müqayisədə Azərbaycan iqtisadiyyatında artım qeydə alındı. Hansı sahələrdə artımın qeydə alındığını öyrənmək məqsədilə mütəxəssislərə müraciət etdik.
“...neft ölkələrində iqtisadiyyatın daha çox zərər görməsini müşahidə etsək də, Azərbaycanda bu müşahidə olunmadı”
Millət vəkili Rüfət Quliyev qeyd etdi ki, koronavirus pandemiyası dövründə bütün ölkələrin iqtisadiyyatında geriləmə müşahidə olundu və bəzi inkişaf etmiş ölkələrin statistikasına nəzər salanda görürük ki, mənfi amillər özünü büruzə verdi: "Çox az sayda ölkə var ki, bu baxımdan iqtisadiyyatının dayanıqlı və davamlı olması üçün həyata keçirdikləri tədbirlər nəticəsində qlobal iqtisadi göstəricilərdə mənfi amillər olsa da, burada tamamilə fərqli bir mənzərə yaranıb. Belə ki, iqtisadi göstəricilərində müsbət hallar qeyd olunan ölkələrdən biri də Azərbaycandır.
Prezident İlham Əliyevin tapşırığı əsasında, koronavirus pandemiyası tüğyan etməyə başlayan zaman ölkəmizdə zəngin sosial paketin təqdim edilməsi ilə yanaşı, eyni zamanda, iqtisadiyyatın dayanıqlı və davamlı olması üçün də müxtəlif tədbirlər həyata keçirildi. Bunun nəticəsidir ki, ölkəmizdə iqtisadiyyatın fəaliyyəti pandemiya dövründə də uğurlu olub. Xüsusilə də koronavirus pandemiyası dövründə dünya enerji və səhm bazarlarında kəskin dalğalanmaların nəticəsi olaraq neftin qiymətinin düşməsinə baxmayaraq, qeyri-neft sektorunun ölkədə müsbət saldo ilə göstəriciləri oldu. Yəni ölkə iqtisadiyyatının vaxtında düzgün istiqamətlənməsi, düzgün qurulması ona gətirib çıxardı ki, məhz elə koronavirus pandemiyası dövründə neft ölkələrində iqtisadiyyatın daha çox zərər görməsini müşahidə etsək də, Azərbaycanda bu müşahidə olunmadı".
Günel CƏLİLOVA
