“Təxmin edirdim ki, beş ayın yekunları artıq tənəzzülü əks etdirəcək, belə də oldu”. Bunu Prezident İlham Əliyev modul tipli xəstəxananın açılışından sonra həkim kollektivi ilə görüşündə çıxışı zamanı deyib.
Ölkə başçısının sözlərinə görə, bu müddət ərzində Azərbaycan dövləti çox böyük məsuliyyət göstərib: “İlk növbədə, ölkə daxilində. Çünki iki seçim var idi - ya iqtisadiyyatı xilas etmək, ya da insanların sağlamlığını. Şəxsən mənim üçün, birmənalı qaydada, tərəddüdsüz insanların sağlamlığı həmişə birinci yerdə olubdur, o cümlədən, pandemiya dövründə. Ona görə biz şüurlu şəkildə, bunun iqtisadi fəallığımıza mənfi təsir göstərəcəyini bilərək, məhdudlaşdırıcı addımlara getdik. Mən bildirmişdim ki, keçən ay əldə edilmiş nəticələrdə kiçik də olsa, artım var - 0,2 faiz. Ancaq təxmin edirdim ki, beş ayın yekunları artıq tənəzzülü əks etdirəcək, belə də oldu. Mənə verilən məlumata görə, ümumdaxili məhsul beş ayda 1,7 faiz aşağı düşüb. Ancaq yenə də bir çox inkişaf etmiş ölkələrlə müqayisədə bizdəki tənəzzül çox kiçikhəcmlidir. Bununla paralel olaraq bildirməliyəm ki, sənaye istehsalı bir qədər artıb. Amma qeyri-neft sektorunda sənaye 14 faiz artıb. Kənd təsərrüfatı 3,6 faiz artıb. İnsanların orta əməkhaqqı 740 manata yaxınlaşıb. Bu, təqribən 430 dollardan çoxdur. İnflyasiya 3 faizdən aşağıdır, yəni proqnozlaşdırılmış səviyyədədir”.
Göründüyü kimi, ölkə başçısının koronavirus dövrü ilə bağlı daha bir proqnozu özünü doğrultdu. Bu, bir daha onu təsdiq edirmi ki, Azərbaycanda koronavirusla bağlı bütün proses tam dəqiq idarə olunur?
“Bir sıra inkişaf etmiş ölkələrlə müqayisədə Azərbaycanda koronavirusla bağlı proseslər daha düzgün idarə edilir”
Məsələyə münasibət bildirən iqtisadçı-ekspert Fuad İbrahimovun sözlərinə görə, bir sıra inkişaf etmiş ölkələrlə müqayisədə Azərbaycanda koronavirusla bağlı proseslər daha düzgün idarə edilir: “Azərbaycanda bu proseslər kifayət qədər uğurla idarə edilir. Bizdə proseslər idarəolunma çərçivəsindən kənara çıxmayıb. Hesab edirəm ki, bu, uğurlu göstəricidir. Hansısa ölkədə əhalinin say nisbətini götürüb Azərbaycan əhalisi ilə müqayisə edəndə biz bir sıra dövlətlərdən irəlidəyik. Söhbət problemin öhdəsindən gəlməkdən və prosesləri peşəkarcasına idarə etməkdən gedir. Çünki vəziyyət nəzarətdən çıxdığı halda, o zaman bu, xaosla nəticələnə bilər. Bu gün iqtisadi cəhətdən inkişaf etmiş İspaniya, Birləşmiş Ştatlar, İtaliya koronavirus pandemiyası ilə mübarizədə çox çətin vəziyyətdədir. Azərbaycan isə bu baxımdan çox yaxşı durumdadır. Düzdür, bizdə vətəndaşlarda bir az məsuliyyətsizlik var, yoluxma sayı artır. Ancaq buna baxmayaraq, bu günə qədər idarəetmədə effektivlik müşahidə edilir. O baxımdan hesab edirəm ki, Azərbaycanda koronavirusla bağlı proseslər dəqiq idarə olunur”.
Vidadi ORDAHALLI
