“Kirillin açıq səviyyədə bunu bəyan etməsi bir daha göstərir ki, Azərbaycanda dinlərarası münasibətlər ən yüksək səviyyədədir”
Azərbaycandakı pravoslavlar da müsəlman əksəriyyəti kimi bütün imkanlardan istifadə edirlər.
Məlum olduğu kimi, bu barədə Moskvanın və bütün Rusiyanın Patriarxı Kirill Bakıda Prezident İlham Əliyevlə görüşü zamanı bildirib.
Patriarx bildirib ki, Azərbaycana səfər edərkən həmişə dinlərarası münasibətlərin yüksək səviyyəsinə diqqət yetirir: “Həm də bu münasibətlər yalnız hansısa rəsmi səviyyədə göstərici deyil. Bütün bunlar sadə insanların həyatına birbaşa aiddir. Azərbaycandakı pravoslavlar da müsəlman əksəriyyəti kimi bütün imkanlardan istifadə edirlər. O cümlədən Azərbaycanda millətlərarası, dinlərarası sülhün möhkəmlənməsində həm də çox müsbət işlər görən dostum Şeyxülislam Paşazadənin rolunu xüsusi qeyd etmək istərdim. O həm də, şübhəsiz, rus kilsəsi ilə təkcə Azərbaycanın müsəlmanları ilə deyil, həm də Qafqazın ali dini rəhbəri olduğuna görə Rusiya müsəlmanları ilə münasibətlərin inkişafında böyük işlər görür”.
Patriarx Kirill onu da qeyd edib ki, həmişə zati-müqəddəsləri Aleksandr ilə görüşəndə o bu münasibətləri çox nikbin təsvir edir: “Mən dəqiq bilirəm ki, bu, reallıqdır və həqiqətən belədir. Azərbaycanda yaşayan pravoslavlar heç bir narahatlıq hiss etmirlər. Onlar öz ölkələrinin həm vicdanlı vətəndaşlarıdır, eyni zamanda, pravoslavdırlar. Onları həm dini əqidələrinə, həm də ənənəyə görə tarixi vətəni – Rusiya ilə bağlayan çox şey var”.
Bütün bunlar bir daha Azərbaycanda dinlərarası münasibətlərin yüksək səviyyədə olmasının göstəricisidir. Azərbaycanda müxtəlif dinlərə sitayiş edən vətəndaşlara olan münasibətin yaxşı səviyyədə olması bir reallıqdır. Hamıya bərabər etiqad azadlığı yaradılıb. Bütün bu deyilənlərin fonunda, Patriarx Kirillin məlum açıqlamasını ekspertlər necə dəyərləndirirlər?
Məsələyə münasibət bildirən şərqşünas Seyid Camal Əzimbəylinin sözlərinə görə, Patriarx Kirillin Prezident İlham Əliyevlə görüşü zamanı səsləndirdiyi fikirlər reallığı özündə əks etdirir: “Onun açıq səviyyədə bunu bəyan etməsi bir daha göstərir ki, Azərbaycanda dinlərarası münasibətlər ən yüksək səviyyədədir. Ölkədə bütün dinlərə etiqad edənlər bərabər hüquqa malikdirlər. Onlara münasibətdə ayrıseçkilik yoxdur. Dövlət büdcəsindən edilən yardımlardan onlar da istifadə edirlər. Bu bir daha Azərbaycandakı tolerantlığa, birgə yaşayışa verilən yaxşı qiymətdir. Bu, ölkədə dinlərarası, millətlərarası münasibətlərin hansı səviyyədə olmasına əyani misaldır. Düşünürəm ki, Azərbaycanla müharibə vəziyyətində olan Ermənistanı müqayisə etsək, bu ayıb sayılar. Bütövlükdə, səslənən fikirlər özünü demokratiyanın carçısı hesab edən ölkələrə Azərbaycanın timsalında gözəl çağrış oldu. Ümumilikdə, Azərbaycan tarixən müxtəlif xalqların və dinlərin nümayəndələrinin dostluq və qardaşlıq şəraitində birgə yaşadığı məkan olub. Müstəqillik dövründə xalqımızın öz kökünə qayıdışı tolerantlığa, islami dəyərlərə daha böyük üstünlük verilməsinə, adət-ənənələrimizin bərpasına və cəmiyyətin əxlaqi-mənəvi yüksəlişinə zəmin yaratdı. Bu ali dəyərlərin qorunması dövlət siyasətinin prioritet istiqamətinə çevrildi. Bununla paralel, digər dinlərə də bərabər münasibət ölkədə hökm sürür. Uzun illərdir ölkəmizdə müxtəlif dinə etiqad edən xalqlar azərbaycanlılarla çiyin-çiyinə yaşayırlar. Bu xalqların monolit birliyi Azərbaycan tolerantlığı ilə vəhdət təşkil edir. Tolerantlıq xalqımızın mənəvi zənginliyidir. Bu baxımdan Azərbaycan zəngin ölkədir”.
Vidadi ORDAHALLI
