“O gənclər bilməlidir ki, onlar hansa ayrı-ayrı qrupların, siyasətbazların deyil, Azərbaycan dövlətinin, Azərbaycan xalqının maraqlarını müdafiə etməlidirlər”
Gənclər Günü münasibətilə keçirilən respublika toplantısı gənclərin həyatında, şüurunda, taleyində dərin izlər buraxıb. Çünki bu toplantıda ölkə başçısı İlham Əliyev çıxış edərək Azərbaycan gənclərinə mühüm mesajlar verdi. Gəncliyin qarşısında duran vəzifələr barədə danışan Prezident qeyd etdi ki, gənclərimiz vətənə, dövlətə, milli dəyərlərə bağlı olmalıdır.
Sirr deyil ki, bu gün Azərbaycanın əldə etdiyi uğurları gözü götürməyən qüvvələr var. Çox təəssüf ki, bəzən gənclərimiz o qüvvələrin toruna da düşürlər. Uzağa getməyək, heç bir uğur qazanmayan radikal müxalifət qüvvələri. az da olsa, gəncləri də öz sıralarına qatmağa müvəffəq olur. Heç şübhəsiz, o gənclərin xeyli bir hissəsi atdığı addımın yanlış olduğunu anlayaraq bu yoldan çəkilib.
Prezidentin konfransda çıxışı radikal müxalifətin aksiyalarına meylli olan azsaylı gənclərin səhv yoldan qayıtmasında hansı təsirli rolu oynaya bilər?
Gənc alim, tədqiqatçı Leyla Məmmədəliyeva Bakı-xəbər.com-a bildirdi ki, Prezident İlham Əliyevin verdiyi tövsiyələr gənclərin həyatında, onların düzgün yola yönəldilməsində mühüm rol oynayır. L.Məmədəliyevanın sözlərinə görə, Azərbaycan gəncliyi yaxşı bilir ki, onun söykənc və ümid yeri Azərbaycan dövləti, Azərbaycan Prezidentidir. Bəzi gəncləri radikal müxalifət öz toruna saldığını deyən L.Məmmədəliyevanın bildirdiyinə görə, gənclər özləri o insanların yanından geri çəkiləcək. “Azərbaycan gəncliyində həm sağlam ruh var, həm milli kimlik, həm də dövlətçilik hissinə sadiqlik. Prezident İlham Əliyev respublika Prezidenti seçildiyi gündən indiyə qədər hər zaman gənclərin yanında olub və gəncləri dövlətin, dövlətçiliyin, milli maraqların təəssübkeşi kimi görüb. Sevindirici haldır ki, Azərbaycan gəncliyi öz əməli fəaliyyətilə dövlət maraqlarına xidmət edir. Prezident gəncliyə xitabən çox maraqlı, dəyərli fikirlər söylədi, tövsiyələr verdi. Bu tövsiyələrin hər birinə əməl etməliyik. Çünki bu tövsiyələr Vətənimizin, dövlətçiliyimizin, milli ruhumuzun, milli kimliyimizin qorunması ilə bağlıdır. Hesab edirəm ki, cənab Prezidentin tövsiyələri radikal müxalifət tərəfindən müxtəlif şirnikləndirici təkliflərlə tora salınan gənclərin bu yoldan qayıtmasına səbəb olacaq. Onu da deyim ki, onlara qoşulan gənclərin sayı çox azdır. Bilirsiz ki, indiyə qədər vaxtilə onlara qoşulmuş gənclər radikal müxalifətçilərin, onların qaraguruhçu liderlərinin vədlərinin saxta olduğunu bilib o düşərgəni tərk ediblər. Bu bizim qazancımızdır. Mehman Hüseynovun özü həmin radikal müxalifətin bədbəxt etdiyi gənclərdən biridir. Görsüz, o son anda Azərbaycan Prezidentinə, Azərbaycan dövlətinə sığındı. Cənab Prezident də onunla bağlı ədalətli qərar qəbul etdi. Düşünürəm ki, Prezidentin Gənclər Gününə həsr edilmiş tədbirdəki çıxışından, orada gənclərə verdiyi tövsiyələrdən radikal müxalifətə qoşulan azsaylı gənclər nəticə çıxaracaq. Çünki onların özlərinin buna ehtiyacı var. O gənclər bilməlidir ki, onlar hansa ayrı-ayrı qrupların, siyasətbazların deyil, Azərbaycan dövlətinin, Azərbaycan xalqının maraqlarını müdafiə etməlidirlər”-deyə bildirən gənc alimin sözlərinə görə, onsuz da gənclər radikal müxalifətdən qopmaqda davam edirlər. Müsahibimiz qeyd etdi ki, bu gənclər radikal müxalifətin dövlətçilik maraqlarına xidmət etmədiyini yaxşı anlayırlar.
İradə SARIYEVA
