“Bunun üçün də biz öz təhsilimizdə, elmi-tədqiqatlarımızda milli-mənəvi dəyərlərin və milli vətənpərvərlik ruhunda tərbiyə məsələsinin təbliğini həyata keçirməliyik”
Cəmiyyətimizin aparıcı qüvvəsi olan gənclər bütün sahələrdə təmsil olunurlar. Gənclik ümid deməkdir, xalqın və dövlətin aydın sabahı gənclərlə bağlıdır. Gənclər öz üzərlərinə düşən vəzifələri layincə dərk etsələr, biz sabahımızdan narahat olmarıq.
Bu gün 2 Fevral Gənclər Günüdür. Bu münasibətlə fevralın 1-də respublika toplantısı keçirilib və Prezident İlham Əliyev sözügedən tədbirdə iştirak edib. Prezident çıxışında gənclərin qarşısında duran vəzifələrə toxunaraq qeyd edib ki, Azərbaycan gəncləri milli vətənpərvərlik ruhunda tərbiyə almalıdır. “Bizim gənclərimiz milli ruhda, vətənpərvərlik ruhunda tərbiyə almalıdırlar. Əsrlər boyu bizim xalqımız başqa dövlətlərin, imperiyaların tərkibində yaşamışdır. Ancaq biz milli mənsubiyyətimizi, adət-ənənələrimizi qorumuşuq. Nəyə görə?! Ona görə ki, biz həmişə öz dəyərlərimizə bağlı olmuşuq və bugünkü gənclər daim bu məsələyə çox böyük diqqət yetirsinlər. Azərbaycan dəyərləri bizim üçün ən başlıca dəyərlərdir. Bizi bir xalq kimi, millət kimi qoruyan, əsrlər boyu assimilyasiyadan qoruyan məhz bizim dəyərlərimiz, ana dilimiz, mədəniyyətimiz, ədəbiyyatımız, incəsənətimiz olubdur. Azərbaycan gəncləri mütləq milli ruhda tərbiyə almalıdırlar ki, gələcəkdə dövlət maraqlarını, xalqımızın milli maraqlarını layiqincə qoruya bilsinlər. Hesab edirəm ki, bu iki əsas amil hər bir gənc üçün çox vacibdir”-deyə ölkə başçısı bildirib.
Gənclər Prezidentin qoyduğu tələblərə nə dərəcədə cavab verir?
Azərbaycan Milli Elmlər Akademiyasının (AMEA) Elm Tarixi İnstitutunun aparıcı elmi işçisi, iqtisadiyyat üzrə fəlsəfə doktoru gənc alim Amal Həsənli “Bakı-Xəbər”ə bildirdi ki, bütün sahələrdə olduğu kimi, elm sahəsində də milli-mənəvi dəyərlərimizə, dövlətçiliyimizə bağlı, vətənpərvər gənclərimiz minlərlədir. A.Həsənli qeyd etdi ki, müasir Azərbaycan gəncliyi kifayət qədər dövlətçi, kifayət qədər vətənpərvərdir. Azərbaycan tarixinin hər bir dövründə müasir gəncliyə örnək olan qəhrəmanlarımızın olduğunu xatırladan A.Həsənli vurğuladı ki, müasir gənclik də onların yolu ilə gedir. “Bildiyimiz kimi, Azərbaycan çox qədim mədəniyyətə və tarixə malik bir dövlətdir. Tariximizə nəzər salsaq, Azərbaycanda mövcud olmuş qüdrətli dövlətlərin qurulmasında gənclərimizin rolunun yüksək olduğunu görərik. Məsələn, Babək Hürrəmilər hərəkatına başçılıq edəndə 25, Şah İsmayı Xətai Səfəvi dövlətini yaradanda 15 yaşı var idi. I Şah Təhmasib 19 yaşında artıq qüdrətli dövlətin başçısı idi. Bu cür faktları çox söyləmək olar. Bu onu göstərir ki, qədim zamanlardan bügunə qədər Azərbaycan gəncləri milli dövlətçiliyimizin qurulmasında və qorunmasında mühüm rol oynayıblar. Cənab Prezidentin gənclər üçün yaratdığı imkanlar göz önündədir. Azərbaycan gəncləri öz əməlləri, fəaliyyətləri ilə Azərbaycanın ictimai-siyasi, elm və təhsil, mədəniyyət, idman və s həyatında əhəmiyyətli rol oynayır, dövlət maraqlarının müdafiəsində, dövlətimizin nüfuzunun qorunmasında öz üzərilərinə düşən vəzifəni uğurla yerinə yetirirlər. Ölkə baçsısı Azərbaycan gənclərinin milli vətənpərvərlik tərbiyəsində, dövlətçiliyə bağlı gənclər olaraq inkişaf etməsini tövsiyə edir. Bu da onu göstərir ki, Prezident İlham Əliyev gəncliyə çox böyük inam bəsləyir, etimad göstərir. Biz də gənclər olaraq ölkə başçımızın etimadını doğrultmağa borcluyuq. Prezidentin Azərbaycan gənclərinin milli vətənpərvərik ruhunda tərbiyə almalı olduğunu deməsi həm biz gənclərin çiyinlərinə böyük məsuliyyət qoyur, həm də bizə üzərimizə düşən vəzifələri bir daha xatırladır”-deyə gənc alim qeyd etdi.
O həmçinin bildirdi ki, Azərbaycan çoxmillətli və çoxkonfessiyalı dövlətdir. Onun sözlərinə görə, müstəqillik illərindən sonra dövlətin elm və təhsilə göstərdiyi qayğı və diqqət gənclərin bu sahədə fəallıq göstərməsinə şərait yaradıb. “Bu gün Azərbaycan Milli Elmlər Akademiyasında və respublikamızın digər sahələrində gənclərin rolunun artırılması Prezident İlham Əliyevin daxili siyasətinin prioritet istiqamətlərindən biridir. Bunun üçün də biz öz təhsilimizdə, elmi-tədqiqatlarımızda milli-mənəvi dəyərlərin və milli vətənpərvərlik ruhunda tərbiyə məsələsinin təbliğini həyəta keçirməliyik”-deyə A.Həsənli qeyd etdi.
İradə SARIYEVA
