Rüfət Quliyev: “Postsovet məkanında olan diaspor təşkilatları da Şirinov qardaşlarının etdiyi qəhrəmanlığı dünyanın dörd bir yanına bəyan etməlidir”
“Ukraynada yaşayan Umud və Sabir qardaşları Azərbaycanın adını, nüfüzünü nəinki Ukraynada, bütün dünyada yüksəyə qaldırdılar”
Məlum olduğu kimi, ötən həftə Ukraynanın Nikolayevo şəhərində yaşayan Umud və Sabir Şirinov yanan avtomobildən azyaşlı uşaq, qadın və kişini xilas edib. Ukraynada yaşayan azərbaycanlıların qəhrəmanlığı hər kəs tərəfindən yüksək qiymətləndirilir.
Qeyd edək ki, Şirinov qardaşları işlədikləri "İngül” kafe-hotelindən geri qayıdan zaman TIR-dan qoşqunun ayrıldığını görüb və maşını saxlayıblar. Hadisə yerinə yaxınlaşanda yük maşınından 40-50 metr aralıda, yol kənarında minik avtomobilinin çevrildiyini, salonunda uşağın ağladığını görüblər. Qardaşlar öz həyatlarını təhlükəyə ataraq, yanan cipdən uşağı və sonra anasını çıxarıblar.
Onların bu qəhrəmanlığı təkcə ölkəmizdə deyil, Ukraynada da yüksək qiymətləndirilir. Qardaşlar Ukraynanın dövlət mükafatı olan Müqəddəs Nikolay Xaçı ilə bərabər, "Azərbaycan- Ukrayna" beynəlxalq alyansının Mübariz İbrahimov medalı ilə də təltif edilib.
Fevralın 1-də Bakı Konqres Mərkəzində Azərbaycan Gəncləri Gününə həsr olunmuş respublika toplantısı başa çatandan sonra Prezident İlham Əliyev və birinci xanım Mehriban Əliyeva Ukraynada yaşayan soydaşlarımız Sabir və Umud Şirinov qardaşları ilə görüşüb.
Dövlət başçısı həyatı təhlükəyə məruz qalan insanların xilası zamanı göstərdikləri şəxsi şücaətə görə onları "İgidliyə görə” medalı ilə təltif edib.
Ölkə başçısının Şirinov qardaşlarını qəbul edərək onları medalla təltif etməsinin dövlətin diaspor əlaqələri baxımından nə kimi əhəmiyyəti var?
Azərbaycan-Ukrayna parlamentlərarası əlaqələr üzrə işçi qrupunun rəhbəri, millət vəkili Rüfət Quliyev “Bakı-Xəbər”ə açıqlamasında qeyd etdi ki, Ukraynada yaşayan Umud və Sabir qardaşları Azərbaycanın adını, nüfüzünü nəinki Ukraynada, bütün dünyada yüksəyə qaldırdılar: “Şirinov qardaşlarının etdiyi qəhrəmanlıq hər kəs tərəfindən yüksək qiymətləndirilir. Məlumdur ki, Prezident İlham Əliyev qəhrəman qardaşları qəbul edib və onları “İgidliyə görə” medalı təltif edib”.
Millət vəkili qeyd etdi ki, bu gün Ukraynada çoxlu sayda azərbaycanlı yaşayır. Onun fikrincə, qəhrəman qardaşların məlum şücaətinin diaspor əlaqələri baxımından mühum rolu olacaq. R.Quliyev dövlət və qeyri hökümət təşkilatlarına müraciət edərək qeyd etdi ki, o cümlədən postsovet məkanında olan diaspor təşkilatları da Şirinov qardaşlarının etdiyi qəhrəmanlığı dünyanın dörd bir yanına bəyan etməlidir.
Günel CƏLİLOVA
