“Ancaq inanmıram ki, Ermənistan baş naziri bu istəkləri doğrulda bilsin”
Erməni mətbuatının yazdığına görə, Almaniyanın baş naziri Angela Merkel Berlində Ermənistan Baş naziri Nikol Paşinyanla görüşdən sonra mətbuat konfransında bir sıra məqamlara toxunub. Onun sözlərinə görə, Ermənistan və Almaniya ikitərəfli əlaqələrin inkişafını təşviq edir. Bununla yanaşı, Almaniya kansleri Paşinyanı tərifləyib. Onun sözlərinə görə, Ermənistan xalqı yeni baş nazirə inamlıdır: “Biz artıq ölkədəki əhval-ruhiyyəni müzakirə etdik və ikitərəfli münasibətlərin inkişafından danışdıq". Merkel qeyd edib ki, Almaniya Ermənistan üçün əhəmiyyətli bir beynəlxalq ortaqdır. O, eyni zamanda, Dağlıq Qarabağ məsələsinə də toxunub: “Dağlıq Qarabağ münaqişəsinin həllində bütün tərəfləri razı salacaq variant tapmaq üçün xeyli vaxt lazım olacaq”. Diqqət çəkən məqam odur ki, Merkel Paşinyanı tərifləyib. Belə bir rəy yaratmağa çalışıb ki, guya Ermənistan cəmiyyəti yekdilliklə Paşinyana inanır. Halbuki, Ermənistanda ötən ilin aprelində baş verən “məxməri inqilab”dan sonra gedən proseslərə nəzər salsaq görərik ki, bu heç də belə deyil. Ən azından, Paşinyan əvvəl verdiyi bir sıra vədləri yerinə yetirmədi. Ermənistan ictimaiyyyəti də bunun fərqindədir və bununla bağlı narazılıqlar artmaqdadır. Bu baxımdan Ermənistan xalqının Paşinyana yektilliklə inandığını demək çətindir. Maraqlıdır, Merkel Paşinyanı niyə bu qədər tərifləyir? Məsələyə münasibət bildirən AMİP funksioneri Əli Orucovun sözlərinə görə, bu bir sıra maraqlardan irəli gəlir: “Merkelin Paşinyanı tərifləməsi müəyyən maraqlardan irəli gəlir. Məsələ ondadır ki, 20 il idi Ermənistanda Rusiyayönümlü “Qarabağ klanı” hakimiyyətdə idi. Bu da Qərbin maraqlarına cavab vermirdi. Ötən il Ermənistanda baş verən hakimiyyət dəyişikliyindən sonra yeni qüvvələr iqtidara gəldi. Paşinyan açıq şəkildə Qərbyönümlü siyasət yeritdiyini bəyan etməsə də, hər halda, bu yöndə müəyyən planları var. Almaniya istəyir ki, Ermənistan Rusiyanın təsir dairəsindən çıxsın. Ona görə də Merkel Paşinyanı tərifləyir ki, Paşinyan islahatlara getsin. İslahatlarla yanaşı, Qərbə yönəlik addımlar atsın. Bu minvalla onu ruhlandırmağa çalışır. Ancaq inanmıram ki, Ermənistan baş naziri bu istəkləri doğrulda bilsin. Ona görə ki, Ermənistandakı durum göz qabağındadır. Bu ölkə əhəmiyyətli dərəcədə Rusiyadan asılıdır. Paşinyanın hansısa gedişləri ona baha başa gələ bilər. Başqa bir tərəfdən, Paşinyan elə bir güclü siyasi fiqur deyil ki, hansısa ciddi işlər görə bilsin”.
Vidadi ORDAHALLI
