Almaniyanın federal kansleri Angela Merkellə birgə mətbuat konfransında Ermənistanın baş naziri Nikol Paşinyan özünün əvvəllər verdiyi bəyanatı xatırladıb ki, münaqişənin istənilən həll variantı Ermənistan, Dağlıq Qarabağ və Azərbaycan xalqları üçün məqbul olmalıdır.
Erməni KİV-inin verdiyi məlumata görə, N.Paşinyan bununla əlaqədar deyib: “Ümid edirdim ki, münaqişənin həllinin Qarabağ və Ermənistan xalqları üçün məqbul olmasının zəruriliyi barədə Azərbaycan tərəfi də bəyanat verəcək. Təəssüf ki, belə bir şey eşitmədik. Bu bəyanatln tarixçəsi danışıqlar prosesindəki bütün vəziyyəti əks etdirir. Hələ ki, Azərbaycandan belə bəyanatlar yoxdur, biz, təəssüf ki, irəli gedəcəyimizlə bağlı böyük ümidlər bəsləyə bilmərik”. O bildirib ki, Ermənistan Qarabağ münaqişəsinin sırf sülh yolu ilə həlli prinsipinə sadiqdir: “Lakin qeyd etmək istəyirəm ki, Ermənistanın baş naziri kimi mən yalnız Ermənistanın adından danışıqlar apara bilərəm, Dağlıq Qarabağın adından yox”. Görünüdyü kimi, Paşinyan yenidən köhnə ampluasına qayıtmalı olub. Bununla o bir daha sübut etdi ki, Ermənistanın Qarabağ siyasəti qeyri-ardıcıl, bir-birinə zidd mərhələlərdən ibarətdi. N.Paşinyanın Azərbaycanın işğal olunmuş ərazilərində yaradılmış qondarma rejimi tərəf kimi danışıqlar masasına gətirmək cəhdlərini ilk dəfə etmir. Aydındır ki, Paşinyan qondarma rejimi müstəqil tərəf kimi danışıqlar prosesinə qatmaqla sülh danışıqlarını və status-kvonu uzatmaq, rejimin müstəqilliyini möhkəmləndirmək cəhdini nümayiş etdirmək istəyir. Təbii ki, bu mərhələ də əvvəlkilər kimi uğursuzluğa məhkumdur. Çünki Paşinyan hakimiyyətə gələn kimi bu məzmunda bəyanatlar verməyə başladı. Lakin beynəlxalq birliyin, xüsusilə də ATƏT-in Minsk Qrupu həmsədrlərinin sərt basqısı ilə üzləşəndən sonra Ermənistan xarici işlər nazirləri və ölkə başçıları səviyyəsində bir neçə dəfə konfliktin həlli ilə bağlı müzakirələrdə iştirak etdi. Paşinyanın özü şəxsən 3 dəfə İlham Əliyevlə görüşərək bu istiqamətdə müzakirələr aparıb. Azərbaycanın Qarabağ probleminin əsl mahiyyətini dünyaya çatdırması, bir sıra qətnamə və sənədlərin qəbuluna nail olması, status-kvonu dəyişdirməyin qaçılmazlığına dünya rəsmilərini inandıra bilməsi və bütün dünyanın qondarma rejimi tanımaqdan imtina etməsi Ermənistan hakimiyyətini Qarabağ taktikasında yeni ziddiyyətlərə sövq edən güclü faktorlardır. Məhz buna görə də, Paşinyan ziqzaqlı gedişlər etməyə məhkum olur. Ən maraqlısı isə budur ki, Paşinyan Azərbaycandan özünün istədiyi və təqribən “Azərbaycan tərəfinin güzəştləri; münaqişənin həllinin Dağlıq Qarabağ və Ermənistan xalqları üçün məqbul olması” məzmunda bəynatın səslənməsini eşitmək istədiyini deyib. Paşinyanın Almaniyada səsləndirdiyi bu fikirlərə Azərbaycanın Xarici İşlər Nazirliyi səviyyəsində də cavab verilib. XİN mətbuat xidmətinin rəhbəri Leyla Abdullayeva bildirib ki, münaqişənin həlli ilk növbədə Ermənistan əhalisi üçün böyük iqtisadi imkanlar açacaq: "Onu da bildirmək istərdim ki, münaqişənin həlli ilə bağlı qəbul olunan bütün sənədlərdə və ATƏT-in Minsk Qrupunun həmsədrlərinin təkliflərində söhbət “xalq” yox, erməni və azərbaycanlı əsilli iki əhalidən gedir. Yekunda qeyd etmək istərdim ki, Ermənistanın baş naziri kimi cənab Paşinyan anlamalıdır ki, münaqişənin həlli Ermənistanın müstəqilliyinə təkan verəcək və ilk növbədə Ermənistan əhalisi üçün böyük iqtisadi imkanlar açacaq yeni siyasi vəziyyəti yaradacaq".
Əslində münaqişənin həllinin Ermənistan xalqı üçün yaxşı imkanlar aça biləcəyini Paşinyan hamıdan gözəl anlayır. Çünki Azərbaycan rəhbərliyi dəfələrlə bəyan edib ki, Ermənistanın bugünkü rəzil və səfil vəziyyətə düşməsinin səbəbi onların yürütdüyü işğalçılıq siyasətidir. Məhz bu səbəbdən də Ermənnistan regionu əhatə edən bütün gəlirli meqalayihələrdən kənarda qalıb. Ermənistan anlamalıdır ki, blokada şəraitində yaşamasının əsl səbəbkarı özüdür. Türkiyə hakimiyyəti də dəfələrlə bəyan edib ki, Dağlıq Qarabağ və ətraf rayonlar işğaldan azad olmayacağı təqdirdə Türkiyə-Ermənistan sərhədlərinin açılacağı müzakirə mövzusu ola bilməz. Bu baxımdan da, Paşinyanın Azərbaycandan “Qarabağ xalqı” ilə bağlı bəyanat gözləməsi absurd fikirdi. Çünki Dağlıq Qarabağ Azərbaycanın ərazi subyektidi. Oradakı əhalinin əsas tərkibini azərbaycanlı və erməni icmaları təşkil edir ki, bunun da adı Paşinyanın ifadə etdiyi kimi deyil. Azərbaycan dəfələrlə bəyan edib ki, öz ərazi bütövlüyü çərçivəsində həmin subyektə ən yüksək statuslu müxtariyyət verməyə hazırdır. Təbiidir ki, Azərbaycan, milliyyətindən asılı olmayaraq, istənilən vətəndaşının azad, təhlükəsiz yaşamasına təminat verir. Torpaqlar işğaldan azad ediləndən sonra isə Azərbaycanın iqtisadi qüdrətindən Dağlıq Qarabağ ərazisində yaşayan erməni əsilli vətəndaşlarımız da yararlana biləcək. Bu baxımdan da, Paşinyanın bu mövzu ətrafında saxta gedişlər edib danışıqlar prosesinə yeni terminlər gətirmək cəhdləri süni manipulyasiyadan başqa bir şey deyil. Bu, eyni zamanda, onun tərəfindən danışıqlar prosesini pozmağa yönəlmiş təxribatçı addımlardı.
Məhəmmədəli QƏRİBLİ
