“Azərbaycan apardığı islahatlara, gördüyü işlərə və əldə etdiyi nəticələrə görə reytinq agentliklərinin hesabatlarında öncül mövqedədir”
Azərbaycan Amerikanın tanınmış "The Heritage Foundation" analitik mərkəzinin tərtib etdiyi 2019-cu il üzrə İqtisadi Azadlıq İndeksində 7 pillə irəliləyərək mövqeyini xeyli yaxşılaşdırıb.
Belə ki, yeni tərtib olunmuş indeksdə Azərbaycan 65,4 bal toplamaqla (il üzrə 1.1 bal daha yaxşı) 180 ölkə arasında 60-cı yeri tutub.
İndeksdə bildirilir ki, Azərbaycan "əmlak hüququ", "investisiya azadlığı", "dövlət xərcləri", "məhkəmə sisteminin effektivliyi" və "hökumət bütövlüyü" kimi kateqoriyalar üzrə mövqelərini yaxşılaşdırıb.
Hesabatda diqqətçəkən məqamlardan biri odur ki, Azərbaycan bütün MDB ölkələrindən ön sırada qərarlaşıb. Qeyd edək ki, Qazaxıstan reytinqin 59-cu pilləsində, Türkiyə 69-cu, Qırğızıstan 79-cu, Rusiya 98-ci, Belarus 104-cü, Tacikistan 122-ci, Özbəkistan 140-cı, Ukrayna 147-ci, Türkmənistan isə 164-cü pilləsində qərarlaşıb.
Görünən odur ki, dayanıqlı ictimai-siyasi sabitlik, zəngin potensial, şaxələndirilmiş iqtisadiyyat və qeyri-neft sektorunun inkişafı Azərbaycanda 2013-2020-ci illər üçün nəzərdə tutulan vəzifələrin həllini sürətləndirir. Bütün bunlar Azərbaycanın reytinq cədvəllərindəki mövqeyini daha da gücləndirir. Məsələn, keyfiyyətcə yeni iqtisadi modelini formalaşdıran, dövlətlərarası ticarət əlaqələrini genişləndirən, qlobal enerji və nəqliyyat layihələri ilə maraq doğuran Azərbaycanın iqtisadi nailiyyətləri Dünya Bankının “Doing Business-2019” hesabatında yüksək nailiyyət kimi göstərilib. Azərbaycan dünyanın ən çox islahat aparan ölkəsi elan olunub.
Son illər Azərbaycanda aparılan iqtisadi islahatlar nəticəsində ölkədə maliyyə sabitliyi və iqtisadi artım bərpa olunub, bir çox sahələrdə, xüsusilə kənd təsərrüfatı, qeyri-neft sənayesi və digər sektorlarda əhəmiyyətli irəliləyiş əldə edilib. Bütün bunlarla yanaşı, son hesabatda Azərbaycanın öncül yerdə qərarlaşmasını ekspertlər necə dəyərləndirirl’r?
Məsələyə münasibət bildirən iqtisad elmləri doktoru Fikrət Yusifovun sözlərinə görə, dünyada tanınmış fondun Azərbaycanla bağlı bu dəyərləndirməsi çox müsbət haldır: “2019-cu il üzrə İqtisadi Azadlıq İndeksində Azərbaycanın 7 pillə irəli getməsi, əslində, tam məntiqli bir hadisədir. Çünki bundan öncə də digər reytinq agentliklərinin hesabatlarında Azərbaycan ön mövqedə qərarlaşmışdı. Digər sahələrdə islahatların aparılmasına, iqtisadiyyatda əldə olunan nailiyyətlərə görə öncül pillədə qərar tutmuşdu. Əsasən də Azərbaycanın Dünya Bankının “Doing Business-2019” hesabatında irəliləməsi xüsusi qeyd edilməlidir. Bütün bunlar reytinq agentlikləri üçün ciddi bir çağırışdır. Məsələ ondadır ki, Azərbaycan apardığı islahatlara, gördüyü işlərə və əldə etdiyi nəticələrə görə reytinq agentliklərinin hesabatlarında öncül mövqedədir. Bu qədər irəliləyə bilir. Hesab edirəm ki, Azərbaycanın bu ilin başlanğıcında başladığı struktur islahatları nəticəsində əldə olunacaq nailiyyətlər, uğurlar bundan sonrakı dönəmlərdə reytinq hesabatlarında ölkənin daha öncül yerə keçməsinə stimul verəcək. Azərbaycan bu gün ABŞ-ın tanınmış "The Heritage Foundation" təşkilatının hesabatında 7 pillə irəliləməklə yanaşı, Rusiya, Belarus, Türkiyə kimi ölkələri geridə qoyub. Bu o deməkdir ki, biz Prezident İlham Əliyevin müəyyən etdiyi iqtisadi strategiyanı mərhələ-mərhələ reallaşdırmaqla uğurlar qazanırıq. Bu uğurlar da təbii ki, aparıcı reytinq agentliklərinin və maliyyə institutlarının diqqətindən kənarda qalmır. Onlar da bunu öz hesabatlarında olduğu kimi əks etdirirlər. Hesab edirəm ki, bu ilin sonunda əvvəlki illərlə müqayisədə Azərbaycan daha böyük nəticələr əldə edəcək. Növbəti ilin cədvəllərində Azərbaycanın yeri daha yüksək olacaq”.
Vidadi ORDAHALLI
